Read Boros Dusun MATEUS 21 Bible Online

MATEUS 21 - Boros Dusun bible

MATEUS 21

¹Yesus jeung murid-murid geus dareukeut ka Yerusalem, geus aya di Betpage di Gunung Jetun. Ti dinya Yesus miwarang dua murid sina ti heula,

²sarta dilahiran kieu, ”Maraneh kudu ka kampung itu di hareup. Engke bakal manggih kalde keur dicangcang jeung anakna. Buka talina, bawa ka dieu duanana.

³Mun aya anu ngomong kitu kieu bejakeun, ʼRek dianggo heula ku Gusti,ʼ harita keneh ge tangtu mikeun eta kalde dibawa.”

⁴Hal ieu teh supaya laksana ucapan nabi anu kieu:

⁵”Bejakeun ka Sion, Itu Raja maneh sumping! Ngarendahkeun anjeun nitih kalde, kaldena anakna keneh.”

⁶Dua murid indit ngalakonan piwarangan.

⁷Kalde geus dibawa jeung anakna. Nu anakna disasarapan tonggongna ku jubah maranehna, Yesus terus nitihan eta kalde.

⁸Jalma-jalma loba anu ngalamparkeun jubahna di jalan, sawareh deui ngampar-ngamparkeun dangdaunan beunang ngala harita,

⁹tuluy ngaleut di payuneun jeung di pungkureun Anjeunna. Nu di tukang tinggarero, ”Wilujeng Putra Daud! Mugia anu sumping kalawan pajenengan Pangeran dirahmat ku Allah! Puji Allah!”

¹⁰Barang Yesus lebet ka Yerusalem, sakuliah kota geunjleung. ”Saha eta?” urang Yerusalem tingtaranya.

¹¹Tembal nu ngarak, ”Nabi Yesus ti Nasaret di Galilea!”

¹²Yesus lebet ka Bait Allah. Anu keur jual beuli di dinya diusiran. Meja-meja tukang nalukeuran duit jeung bangku-bangku tukang dagang japati dibalik-balikkeun.

¹³Saur-Na, ”Dina Kitab Suci disebut, kieu dawuhan Allah: ʼBait Kami bakal disarebut tempat paranti sembahyang.ʼ Ari ku maraneh dijieun sayang begal!”

¹⁴Jelema-jelema anu lolong jeung nu cingked daratang ka Anjeunna di Bait Suci, ku Anjeunna dicalageurkeun.

¹⁵Imam-imam kapala jeung guru-guru agama narenjo Anjeunna midamel kaahengan teh arambekeun, turug-turug barudak salusurakan di jero Bait Allah, ”Wilujeng Putra Daud!”

¹⁶Tuluy maranehna negor ka Yesus, ”Kadenge ku Anjeun kecapna eta barudak?” ”Puguh bae,” waler-Na. ”Na aranjeun tacan maraca ayat Kitab Suci anu kieu: ʼBarudak sareng orok ku Gusti diajar ngucapkeun pamuji anu sampurna.ʼ ”

¹⁷Geus kitu maranehna dikantun. Anjeunna terus ka Betania, ngawengi di dinya.

¹⁸Poe isukna isuk-isuk keneh, waktu keur angkat deui ka kota, Yesus ngaraos lapar.

¹⁹Di sisi jalan aya tangkal kondang tuluy dicaketan. Tapi teu aya buahna, daun wungkul. Ti dinya saur-Na ka eta tangkal, ”Maneh moal buahan-buahan deui!” Dadak sakala eta tangkal teh jadi garing.

²⁰Murid-murid mani arolohok. ”Ku naon enggal-enggal teuing garing eta tangkal teh?” ceuk maranehna.

²¹Waler Yesus, ”Maraneh ge, asal percaya jeung henteu cangcaya, bisa nyieun kitu cara Kami bieu ka eta tangkal kondang. Malah leuwih ti kitu. Pek ieu gunung titah kieu, ʼGeura ngangkat, terus nyeburkeun maneh ka laut,ʼ tangtu bukti.

²²Nya kitu deui, neneda menta naon bae, asal hate percaya, tangtu dikabul.”

²³Yesus lebet deui ka Bait Allah. Sabot keur ngawulang, jol imam-imam kapala jeung para kokolot daratang ka dinya tuluy nanya, ”Naon hak Anjeun migawe kitu? Meunang hak kitu ti saha?”

²⁴Waler Yesus, ”Kaula ge rek nanya ka aranjeun saperkara. Lamun kajawab, kakara pertanyaan aranjeun perkara hak Kaula dijawab.

²⁵Ari Yohanes kagungan hak ngabaptis ti saha? Ti Allah atawa ti manusa?” Maranehna jadi patanya-tanya pada batur, ”Kudu kumaha jawabna? Lamun dijawab, ʼTi Allah,ʼ tangtu ceuk Manehna, ʼKu naon aranjeun teu percaya ka Yohanes?ʼ

²⁶Lamun dijawab ʼTi manusa,ʼ sieun ku rahayat, sabab rahayat yakin Yohanes teh nabi.”

²⁷Tungtungna ngajawabna teh, ”Duka teuing!” Saur Yesus, ”Ari kitu mah Kaula moal ngabejakeun make hak naon Kaula migawe kieu.”

²⁸”Ayeuna kumaha ieu ceuk aranjeun. Aya hiji jelema boga anak lalaki dua. Ngomong ka anakna nu kolotan, ʼUjang, poe ieu kudu digawe di kebon anggur.ʼ

²⁹Jawabna, ʼAh, alim!ʼ tapi lila-lila kaduhungeun, tuluy bae digawe.

³⁰Bapana tuluy nitah ka anakna nu ngoraan cara tadi. Jawabna, ʼMangga, Bapa,ʼ tapi henteu digawe.

³¹Tah, nu mana anu ngalampahkeun parentah bapana?” ”Nu kolot,” walon maranehna. Saur Yesus, ”Aranjeun bakal kapiheulaan asup ka Karajaan Sawarga ku tukang-tukang mulung pajeg jeung ku awewe tuna susila.

³²Sabab aranjeun heunteu palercaya ka Yohanes Jurubaptis anu nuduhkeun jalan bener. Sabalikna tukang-tukang mulung pajeg jeung awewe-awewe tuna susila mah percayaeun. Ari aranjeun sakitu geus nenjo hal eta, pikiran teu robah-robah, ka anjeunna teu palercaya.”

³³”Aya deui misil. Aya tuan tanah muka kebon anggur, sakurilingna dipager, nyieun bak pameresanana jeung munara jaga. Tuluy disewakeun sina digarap ku nu sejen, ari manehna terus nyaba.

³⁴Dina usum metik manehna nitahan bujang-bujangna sina narik hasil sewa kebonna ti nu nyarewa.

³⁵Tapi bujang-bujangna teh ku anu nyarewa kebonna dipahala, diparaehan, aya nu diteunggeulan, aya nu dibaledogan ku batu.

³⁶Tuan tanah nitahan bujang-bujang sejen leuwih loba, tapi sarua nasibna jeung nu ti heula.

³⁷Tungtungna nu dititah teh anakna, pamikirna, ʼKu anak aing mah tangtu sarieuneun.ʼ

³⁸Tapi barang eta datang, nu nyarewa kebon teh baradami, pokna, ʼIeu mah anakna. Urang paehan, warisanana jang urang!ʼ

³⁹Tuluy dicerek, dijongklokkeun ka luaran kebon, tuluy dipaehan.

⁴⁰Cik, lamun eta tuan tanah datang sorangan, bakal dikumahakeun eta nu nyarewa kebonna teh?”

⁴¹Tembalna, ”Eta jelema-jelema jahat teh tangtu ditumpes, kebonna disewakeun deui ka nu sejen, anu pibenereun mere hasil sewa kebonna dina waktuna.”

⁴²Saur Yesus, ”Kumaha aranjeun geus maraca ayat Kitab Suci anu kieu? ʼBatu anu teu kapake ku tukang ngadegkeun, ngajadi batu anu pangutamana. Kitu dipidamelna ku Pangeran, endahna kabina-bina!ʼ ”

⁴³Saur Yesus deui, ”Ku sabab kitu Kaula ngabejaan, hak aranjeun kana Karajaan Sawarga bakal dicabut, dibikeun ka bangsa sejen anu daraekeun ngajalankeun pangersa Allah. [

⁴⁴Anu ninggang kana eta batu tangtu remuk, anu katinggang tangtu bubuk.]”

⁴⁵Karasaeun ku imam-imam kapala jeung ku urang Parisi yen eta misil teh ku Yesus dianggo nyindiran maranehna.

⁴⁶Seug maranehna alihtiar rek nangkep Yesus. Tapi teu waranieun prak, sarieuneun ku jalma rea anu nganggap Yesus teh nabi.