Read Boros Dusun MATEUS 7 Bible Online

MATEUS 7 - Boros Dusun bible

MATEUS 7

¹”Ulah ngahukuman batur, supaya maraneh ulah dihukuman ku Allah.

²Sabab sakumaha maraneh ngahukuman ka batur, nya kitu keneh, maraneh ge bakal dihukumanana ku Allah. Lamun maraneh ngukur kitu ka batur, maraneh ge bakal diukur kitu ku Allah.

³Ku naon nelek-nelek tatal dina panon dulur, ari balok dina panon sorangan diantep?

⁴Kumaha rek wani ngomong ka dulur maraneh, ʼCing, eta tatal dina panon urang pangnyabutkeun ku kuring,ʼ padahal dina panon sorangan aya balok?

⁵Eh nu marunapek! Piceun heula balok tina panon sorangan, kakara bisa awas mangnyabutkeun tatal tina panon dulur maraneh.

⁶Ulah mikeun barang suci ka anjing, supaya anjingna ulah malik ngarontok ka maneh. Ulah mikeun mutiara ka bagong, sabab tangtu eta mutiara bakal diidek-idek.”

⁷”Kudu menta, tangtu bakal nampa, kudu neangan, tangtu bakal manggih, kudu ngetrokan, tangtu dibuka pantona.

⁸Sabab nu menta tangtu dibere, nu neangan tangtu manggih, nu ngetrok panto tangtu dipangmukakeun.

⁹Di antara bapa-bapa di dieu, aya anu kalah ka mere batu lamun anakna menta roti?

¹⁰Atawa lamun anakna menta lauk kalah ka dibere oray?

¹¹Sakumaha jahatna maraneh, ka anak mah tangtu merelukeun mere anu mangpaʼat. Komo deui Rama maraneh nu di sawarga, moal teu maparin nu mangpaʼat ka nu nyuhunkeun ka Mantenna!

¹²Jieun kahadean ka batur, sakumaha maraneh oge hayang meunang kahadean ti batur. Kitu maksudna Hukum Musa jeung piwuruk nabi-nabi teh.”

¹³”Kudu milih asup kana lawang nu sempit. Sabab lawang anu rubak mah brasna ka naraka, jalan ka dinya gampang, nu matak loba anu ka darinya.

¹⁴Sabalikna lawang nu sempit mah lawang kana pihirupeun. Jalanna memang hese, nu matak anu ka darinya mah ngan saeutik.”

¹⁵”Sing awas ka nabi-nabi palsu! Datangna ka maraneh make ulat domba, tapi hatena mah hate ajag.

¹⁶Maraneh baris nyaho ka maranehna tina tingkah lakuna. Rungkun cucuk moal buahan anggur, tangkal cucuk moal buahan kondang.

¹⁷Tangkal alus buahanana tangtu alus, tangkal goreng buahanana tangtu goreng.

¹⁸Mun tangkalna sehat buahanana moal goreng, mun tangkalna goreng buahanana moal alus.

¹⁹Tangkal nu goreng buahanana tangtu dituar tuluy dialungkeun kana seuneu.

²⁰Jadi nyirikeun nabi-nabi palsu teh tina tingkah lakuna.”

²¹”Lain anu ngan semet nyambat ka Kami: ʼGusti, Gusti!ʼ anu bakal asup ka sawarga teh, tapi anu ngalampahkeun pangersa Ama Kami nu di sawarga.

²²Dina Poe Kiamat loba nu bakal ngaromong ka Kami, ʼGusti, Gusti! Ku pajenengan Gusti abdi parantos ngadongkapkeun amanat Allah. Ku pajenengan Gusti abdi nundung setan-setan sareng ngayakeun mujijat-mujijat!ʼ

²³Ku Kami bakal diwalon, ʼKami teu wawuh ka maraneh. Geura nyalingkir, eh durjana-durjana!ʼ ”

²⁴”Jadi, anu ngabandungan ieu piwulang Kami jeung terus ngalampahkeunana, eta ibarat jelema pinter anu nyieun imah dina luhur batu.

²⁵Imahna katinggang hujan gede, kateumbrag walungan caah, katebak ku angin ribut, tapi teu daekeun rugrug sabab ngadegna dina luhur batu.

²⁶Sabalikna anu ngadenge ieu piwulang tapi henteu ngalampahkeun, eta ibarat jelema teu boga pikiran nu ngadegkeun imah dina luhur keusik.

²⁷Katinggang hujan gede, kateumbrag walungan caah, katebak ku angin ribut, brug imahna runtuh. Ruksakna kacida!”

²⁸Yesus liren nyariosna. Jalma-jalma mani harookeun ku carana Anjeunna ngawulang.

²⁹Beda ti guru-guru agama maranehna, Anjeunna mah ngajarna teh pinuh wibawa.