Read Boros Dusun MARKUS 3 Bible Online

MARKUS 3 - Boros Dusun bible

MARKUS 3

¹Yesus mulih deui ka imah ibadah. Di dinya aya hiji jelema anu leungeunna kemper sabeulah.

²Jeung aya nu sejen deui, anu saenyana ngarep-ngarep supaya Yesus midamel kasalahan, rek didakwa. Maranehna kacida ngarawaskeunana, sugan bae Anjeunna nyageurkeun eta jelema harita keneh dina poe Sabat.

³Yesus ngalahir ka nu kemper tea, ”Ka dieu, ka hareup!”

⁴Ti dinya saur-Na ka nu rea, ”Pagawean kumaha anu ku Hukum Agama urang meunang dipigawe dina poe Sabat? Nulungan atawa nyilakakeun, nyalametkeun nyawa batur atawa mergasa?” Maranehna teu narembal naon-naon.

⁵Yesus neuteup ka maranehna, manah-Na bendu pacampur jeung sedih ku anu sakitu baredegongna jeung saralahna. Tuluy ngalahir ka nu kemper tea, ”Lempengkeun leungeun hidep!” Ku manehna dilempengkeun, bet leungeunna nu kemper teh jadi cageur.

⁶Urang Parisi tinglaleos, terus ngabadamian jelema-jelema kaomna Herodes rek nelasan Yesus.

⁷Yesus angkat ka Talaga Galilea jeung pangiring-Na. Anu naluturkeun kacida lobana, ti Galilea, ti Yudea,

⁸ti Yerusalem, ti wilayah Idumea, ti wetaneun Walungan Yordan, jeung ti sakurilingeun kota-kota Tirus jeung Sidon, anu geus mareunang beja perkara anu dipidamel ku Anjeunna.

⁹Ku loba-lobana jelema, Anjeunna nepi ka mundut parahu ka murid-murid supaya ulah kasedekkeun.

¹⁰Geus loba anu gering anu dicageurkeun ku Anjeunna, sarta anu garering teh mani pasedek-sedek hayang nyabak ka Anjeunna.

¹¹Ari anu kasarurupan ku roh jahat mah barang ret ka Anjeunna teh terus bae sujud ka payuneuna-Na bari ngagero, ”Anjeun teh Putra Allah!”

¹²Tapi eta roh-roh jahat teh ku Yesus dicarek teu meunang pisan nyebut Anjeunna saha.

¹³Ti dinya Yesus unggah ka hiji pasir, tuluy nyaur sababaraha jelema anu cocog jeung manah-Na. Sanggeus karumpul,

¹⁴ku Anjeunna dipilih dua welas urang. Eta anu kapilih ku Anjeunna disebatna rasul. ”Maraneh ku Kami dipilih pikeun maturan Kami salawasna,” saur-Na. ”Sarta ku Kami baris diutus oge pikeun ngawurukan jalma-jalma,

¹⁵jeung bakal dibere kakawasaan ngusir roh-roh jahat.”

¹⁶Anu kapilih teh ieu ngaran-ngaranna: Simon (ku Yesus dipaparin ngaran Petrus);

¹⁷Yakobus jeung Yohanes (adi lanceuk anak Sebedeus, duanana ku Yesus dipaparin ngaran Boanerges, hartina ”Guludug”);

¹⁸Andreas, Pilipus, Bartolomeus, Mateus, Tomas, Yakobus bin Alpeus, Tadeus, Simon Patriot,

¹⁹jeung Yudas Iskariot, anu engkena ngahianat ka Anjeunna.

²⁰Yesus mulih ka bumi-Na. Breg deui digimbung ku jalma rea, nepi ka Anjeunna jeung murid-murid teu kaburu tuang-tuang acan.

²¹Barang wargi-wargina ngadarenge hal eta, tuluy nareang Anjeunna rek diajak mulih, sabab aya beja majar, ”Anjeunna geus owah!”

²²Aya sawatara guru-guru agama anu daratang ti Yerusalem, ngaromong kieu, ”Eta jelema teh kaasupan Beelsebul! Nu matak jadi bisaeun ngusir roh-roh jahat teh lantaran meunang kakawasaan ti eta kapala roh jahat.”

²³Maranehna ku Yesus disaur. Geus kitu Anjeunna nyarios, tapi ku ibarat-ibarat. ”Kumaha bisana Iblis ngusir Iblis?” saur-Na.

²⁴”Hiji kota anu pecah jadi sababaraha golongan anu silih lawan tangtu ancur.

²⁵Hiji kulawarga anu pecah jeung silih lawan, tangtu awut-awutan.

²⁶Nya kitu keneh karajaan Iblis, lamun pecah jadi golongan-golongan anu silih lawan, ngadegna moal lila, karajaanana tangtu enggeusan.

²⁷Moal aya anu bisa ngabongkar imah jelema bedas sarta nyokotan harta bandana, kajaba lamun eta nu bedas teh ditalikung heula kakara imahna bisa dijarah.

²⁸Kaula mere terang, jelema anu nyieun dosa jeung anu omonganana jahat bisa dihampura.

²⁹Tapi anu ngagogoreng Roh Suci mah teu bisa dihampura, sabab nu kitu mah dosana teh langgeng.” (

³⁰Yesus nyebatkeun kitu teh ka jelema-jelema anu nyebutkeun majar Anjeunna kaasupan roh jahat.)

³¹Ibu jeung saderek-saderek Yesus geus narepi ka dinya, tapi di laluar bae, nalatahkeun supaya Anjeunna kaluar.

³²Anjeunna keur dirariung ku jalma rea. ”Itu aya ibu di luar sareng saderek-saderek istri pameget, hoyongeun nepangan,” ceuk maranehna.

³³”Saha ari ibu Kami? Saha ari dulur-dulur Kami?” waler-Na,

³⁴bari terus neuteup ka anu ngariung ka Anjeunna. ”Ieu ibu jeung dulur-dulur Kami mah!” saur-Na deui.

³⁵”Saha-saha anu ngalampahkeun pangersa Allah, eta ibu Kami, dulur-dulur Kami awewe lalaki.”