Read Boros Dusun YOHANES 1 Bible Online

YOHANES 1 - Boros Dusun bible

YOHANES 1

¹Ari nu disebut Pangandika teh geus jumeneng ti memeh ieu dunya dijadikeun; Pangandika sasarengan jeung Allah, Pangandika sarua jeung Allah.

²Ti mimiti keneh Pangandika teh geus sasarengan jeung Allah.

³Allah ngajadikeun sagala rupa teh nya ku Pangandika; teu aya hiji oge ciciptan Allah anu dijadikeunana henteu jeung Pangandika.

⁴Pangandika teh nya eta anu jadi sumberna hirup; ari hirup nya eta anu mere caang ka manusa.

⁵Eta caang cahayaan gumebyar di nu poek, ari poek teu bisaeun mareuman eta caang.

⁶Allah ngintunkeun utusana-Na, jenenganana Yohanes,

⁷pikeun nerangkeun caang tea ka jalma-jalma, sangkan tarerangeun jeung palercayaeun kana hal eta.

⁸Yohanes ku anjeun lain anu disebut caang tea; anjeunna mah anu mere terang hal eta caang,

⁹caang sajati, anu turun ka ieu dunya, nyaangan sakumna manusa.

¹⁰Pangandika lungsur ka dunya, tapi dunya teu nyahoeun ka Anjeunna, padahal dunya dijadikeunana ku Allah teh nya ku Pangandika. Dunya teh kagungana-Na, manusa teh umat-Na,

¹¹Dunya anu disumpingana-Na teh nagri kagungana-Na, tapi umat-Na embungeun narima.

¹²Tapi loba oge anu narima jeung palercaya ka Anjeunna teh; jelema-jelema anu kitu ku Anjeunna dipaparin hak jadi putra-putra Allah.

¹³Jadina putra-putra Allah teh lain ku cara anu lumrah di manusa, lain ku cara anu yuga ti bapa sipat manusa; Rama maranehna teh Allah ku manten.

¹⁴Pangandika teh terus mijalma, jadi manusa, hirup di kalangan urang, jembar kurnia jeung saestu sipat-Na tur mulya kaayaana-Na, sarta kamulyaana-Na teh tembong ka urang, kamulyaan ti nu jadi Rama ka Putra tunggal.

¹⁵Hal Anjeunna, kieu ditetelakeunana ku Yohanes, ”Anjeunna teh nya eta anu ceuk kami kieu tea, ’Sumping-Na pandeurieun kami, tapi ngungkulan kami, reh Anjeunna mah memeh kami dijurukeun oge geus jumeneng.’ ”

¹⁶Ku kajembaran manah-Na, Anjeunna teu kendat-kendat maparin berkah ka urang.

¹⁷Ku jalan Musa, Allah ka urang maparin Hukum-Na. Tapi ku jalan Yesus Kristus Allah nganyatakeun sih kurnia jeung kasayaktiana-Na.

¹⁸Jelema can aya anu geus ningal Allah. Tapi urang bakal terang ka Mantenna ti Yesus Kristus, Putra tunggal Allah, anu sarua jeung Allah, anu salawasna sasarengan jeung Allah.

¹⁹Para gegeden urang Yahudi di Yerusalem ngutus sawatara imam jeung jelema-jelema urang Lewi, nanyakeun kieu ka Yohanes, ”Anjeun teh saha?”

²⁰Ku Yohanes diwaler sajujurna, saurna, ”Kaula lain Kristus.”

²¹”Upami sanes, saha?” ceuk utusan, ”Anjeun teh Elias?” ”Lain, lain eta,” waler Yohanes. ”Sanes Nabi nu diarep-arep tea?” ceuk utusan. ”Lain,” walerna.

²²”Saha atuh, wartoskeun,” ceuk utusan. ”Sim kuring kedah ngahaturkeun jawaban anu pasti ka nu ngutus. Cobi, ceuk anjeun, anjeun teh saha?”

²³Yohanes ngawalerna ku pilahir Nabi Yesaya: ”Kaula teh, ’Soara anu cumeluk di gurun keusik: Sadiakeun jalan anu lempeng, pikeun Pangeran!’ ”

²⁴Eta para utusan anu diutus ku urang Parisi,

²⁵naranya deui, ”Kristus sanes, Elias sanes, Nabi tea sanes, naha atuh anjeun ngabaptis?”

²⁶Waler Yohanes, ”Kaula ngabaptis teh ku cai. Tapi di aranjeun aya saurang anu aranjeun teu wawuh.

²⁷Sumpingna pandeurieun kaula, tapi kaula pikeun mangudarankeun tali tarumpah-Na ge teu layak.”

²⁸Eta kajadian teh di Betania sisi Walungan Yordan peuntas wetan, paragi Yohanes ngabaptis.

²⁹Poe isukna Yohanes ningali Yesus anu rek ka anjeunna. Yohanes ngalahir, ”Tuh itu Anjeunna, Anak Domba Allah, anu bakal ngaleungitkeun dosa ti alam dunya!

³⁰Nya Anjeunna anu ceuk kami, ’Anu sumpingna pandeurieun kami tapi ngungkulan kami, reh Anjeunna mah memeh kami dijurukeun oge geus jumeneng.’

³¹Mimitina mah kami henteu terang Anjeunna teh saha. Tapi kami ngabaptis ku cai teh nya eta pikeun ngenalkeun Anjeunna ka bangsa Israil.”

³²Geus kitu Yohanes ngucapkeun panyaksi kieu, ”Kami geus nenjo Anjeunna diauban ku Roh Allah anu lungsur ti sawarga ngarupakeun manuk japati.

³³Nepi ka harita ge kami can terang keneh yen Anjeunna teh Anjeunna. Tapi memeh eta kami geus didawuhan kieu ku Allah, anu ngutus kami supaya ngabaptis ku cai, ’Maneh bakal nenjo Roh Kami ti sawarga turun ka hiji jelema; nya Anjeunna engke anu bakal ngabaptis ku Roh Suci.’

³⁴Ieu anu diaku ku kami teh hiji kajadian anu geus katenjo ku kami,” saurna deui, ”nu matak ayeuna kami ngabejaan ka maraneh: Anjeunna teh Putra Allah.”

³⁵Poe isukna deui, waktu Yohanes keur ngadeg di tempat kamari jeung dua muridna,

³⁶ningali Yesus ngalangkung. ”Tuh, Anak Domba Allah!” saurna.

³⁷Sanggeus anjeunna ngalahir kitu, eta dua murid teh arindit naluturkeun ka Yesus.

³⁸Yesus nyoreang, ningalieun ka nu naluturkeun tuluy mariksa, ”Keur nareangan naon?” Jawabna, ”Di mana Rabi linggih?” (Rabi hartina ”Guru”).

³⁹”Hayu ka ditu, tenjo engke,” waler-Na. (Harita kira-kira geus pukul opat sore.) Maranehna tuluy marilu, jadi nyarahoeun ka tempat Anjeunna. Poe eta maranehna aya di Anjeunna.

⁴⁰Anu saurang ngaranna Andreas, boga dulur ngaranna Simon Petrus.

⁴¹Gancang Andreas manggihan Simon, tuluy nyarita, ”Kuring geus papanggih jeung Mesias.” (Mesias teh hartina ”Kristus”, Jurusalamet.)

⁴²Simon tuluy dideuheuskeun ka Yesus. Yesus neuteup ka Simon, tuluy ngalahir, ”Ngaran maneh Simon, anak Yonas. Tapi maneh bakal disebut Kepas.” (Kepas saharti keneh jeung Petrus, nya eta ”batu karang”.)

⁴³Poe isukna Yesus angkat ka Galilea. Anjeunna pendak jeung Pilipus, tuluy diajak, saur-Na, ”Milu ka Kami!” (

⁴⁴Pilipus asal ti Betsaida, lemburna Andreas jeung Petrus.)

⁴⁵Pilipus manggihan Natanael, nyarita, ”Kuring geus papanggih jeung anu disebut-sebut ku Musa dina Kitab Hukum Allah jeung anu ditulis ku nabi-nabi tea. Anjeunna teh Yesus, putra Yusup urang Nasaret.”

⁴⁶”Na aya kitu anu hade ti Nasaret?” Natanael nanya. ”Hayu, tenjo sorangan,” jawab Pilipus.

⁴⁷Barang ningali Natanael datang, Yesus terus ngalahir ngeunaan dirina, saur-Na, ”Tah ieu urang Israil tulen, taya pisan kapalsuanana!”

⁴⁸”Geuning Bapa uninga ka abdi?” Natanael nanya. Yesus ngawaler, ”Memeh maneh dicalukan ku Pilipus, ku Kami katenjo di handapeun tangkal kondang.”

⁴⁹”Pa Guru!” jawab Natanael, ”Pa Guru teh geuning Putra Allah! Raja bangsa Israil!”

⁵⁰Saur Yesus, ”Maneh percaya kitu teh naha pedah bieu Kami nyebutkeun yen maneh ku Kami katenjo handapeun tangkal kondang? Loba keneh anu leuwih aheng, bakal kasaksian ku maneh.”

⁵¹Saur-Na deui ka sarerea, ”Sing percaya kana benerna ieu omongan Kami: Maraneh bakal narenjo langit muka, para malaikat turun unggah ti sawarga ka Putra Manusa.”