Read Boros Dusun YOSUA 13 Bible Online

YOSUA 13 - Boros Dusun bible

YOSUA 13

¹Ayeuna Yosua geus sepuh pisan. PANGERAN ngadawuh, ”Ayeuna maneh geus sakitu kolotna. Padahal rea keneh tanah anu kudu direbut.

²Sakuliah tanah Pelisti jeung Gesur,

³kitu deui sakuliah tanah Awim ka kidul. (Ieu tanah ti semet Walungan Sihor anu ngawates ka tanah Mesir, terus ka kaler nepi ka wates tanah Ekron anu kaitung ka tanah Kanaan; ari raja-raja urang Pelisti maratuhna di Gasa, Asdod, Askelon, Gat jeung Ekron.)

⁴Terus sakuliah tanah Kanaan, tanah Meara (bogana urang Sidon), tanah Apek anu ngawates ka tanahna urang Emor;

⁵tanah urang Gebal, sakuliah Libanon ka wetan, ti semet Baal Gad kiduleun Gunung Hermon, nepi ka Hamat.

⁶Sakuliah tanah urang Sidon anu maratuh di daerah pagunungan, antara Pagunungan Libanon jeung Misrepot Maim. Di mana eta diperangan ku urang Israil, nu barogana ku Kami baris diusir sina kalaluar ti dinya. Bagi-bagikeun tanahna ku maneh ka urang Israil sakumaha timbalan Kami ka maneh.

⁷Ari tanah anu ieu, ayeuna bagikeun ka kaom-kaom Israil anu salapan deui sina dipiboga. Kaom Menase anu saparona deui oge bere bagian.”

⁸Ari kaom Rubin, kaom Gad jeung kaom Menase anu saparona deui, eta mah geus dibagianan tanah ku Musa, abdi PANGERAN tea, nya eta di wetaneun Walungan Yordan.

⁹Wewengkonna legana nepi ka Arur (di tungtung Lebak Arnon) jeung kota nu aya di tengah-tengah eta lebak, kaasup oge sakuliah padataran luhur ti Medeba nepi ka Dibon,

¹⁰terus nepi ka wates daerah Amon, kaasup sakumna kota anu kungsi digeugeuh ku Sihon raja urang Emor, anu kalungguhanana di Hesbon.

¹¹Ngurung oge tanah Gilad, daerah-daerah Gesur jeung Maaka, Gunung Hermon sagemblengna, jeung sakuliah tanah Basan nepi ka tanah Salka.

¹²Terus sakarajaan Og, turunan bangsa Repaim anu pangahirna tea, anu marentahna di Astarot jeung Edrei. Eta kabeh geus areleh, geus diusiran ku Musa.

¹³Tapi urang Gesur jeung urang Maaka mah ku urang Israil teh henteu diusir, araya keneh bae di Israil.

¹⁴Kaom Lewi ku Musa henteu dibagianan tanah. Lantaran geus aya dawuhan PANGERAN ka anjeunna, saur-Na maranehna mah bagianana teh tina altar PANGERAN, Allahna Israil, tina kurban-kurban anu dibeuleum.

¹⁵Sabagian eta tanah ku Musa geus dimilikkeun ka warga kaom Rubin.

¹⁶Wewengkonna legana nepi ka Arur (di tungtung Lebak Arnon), jeung kota anu aya di tengah-tengah eta lebak, kaasup oge sakuliah padataran luhur di sakurilingeun Medeba,

¹⁷tanah Hesbon katut sakabeh kota-kotana anu di tanah padataran di Dibon, Bamot Baal, Bet Baal Meon,

¹⁸Yahas, Kedemot, Mepaat,

¹⁹Kiryataim, Sibma, Seret Sahar anu ayana di hiji pasir di eta padataran.

²⁰Bet Peor, lamping-lamping Gunung Pisga jeung Bet Yesimot.

²¹Kitu deui nagri-nagri di tanah padataran jeung sakuliah tanah karajaan Emor bawahan Raja Sihon anu kalungguhanana di Hesbon. Eta raja geus dielehkeun ku Musa katut bupati-bupati Midian bawahanana, nya eta Ewi, Rekem, Sur, Hur jeung Reba. Eta kabehanana kungsi marentah nagri pikeun Raja Sihon.

²²Waktu urang dinya ditumpes, tukang torah anu ngaranna Balhum bin Beor tea oge dipaehan.

²³Ari wates daerah kaom Rubin, di beulah kulon, nya eta Walungan Yordan. Ieu kota-kota jeung desa-desana kabeh dimilikkeun ka kulawarga-kulawarga kaom Rubin.

²⁴Tanah anu dijangjikeun ku PANGERAN ka umat Israil teh sabagian ku Musa geus dipaparinkeun oge ka kulawarga-kulawarga kaom Gad jadi milikna.

²⁵Wewengkonna ngurung tanah Yaser jeung sakabeh kota di tanah Gilad, sabeulah tanah Amon nepi ka Arur di wetaneun Raba.

²⁶Eta tanah teh mimiti ti semet Hesbon nepi ka Ramat Mispe jeung Betonim, ti Mahanaim nepi ka wates tanah Lodebar.

²⁷Di Lebak Yordan, ngurung tanah Bet Haram, Bet Nimra, Sukot jeung Sapon, sesa karajaan Sihon, raja Hesbon tea. Di beulah kulon watesna Walungan Yordan, terus ka kaler ka Talaga Galilea.

²⁸Sakitu kabehna kota-kota jeung desa-desa anu dimilikkeun ka kulawarga-kulawarga kaom Gad.

²⁹Sabagian eta tanah anu dijangjikeun ku PANGERAN ku Musa dibikeun ka saparo kulawarga-kulawarga kaom Menase, dijieun milikna.

³⁰Wewengkonna ti semet Mahanaim ngurung tanah Basan, karajaan Og, raja Basan tea, kitu deui genep puluh desa anu di daerah Yair di tanah Basan;

³¹sabeulah tanah Gilad, Astarot jeung Edrei, ibukota karajaan Raja Og di Basan. Ieu bagian jadi milikna anak incu Makir bin Menase anu saparona tea.

³²Kitu ku Musa dibagi-bagina tanah anu pernahna di wetaneun Yeriho peuntaseun Walungan Yordan teh. Dibikeunna basa anjeunna di tanah Moab keneh.

³³Ari kaom Lewi ku anjeunna henteu dibagianan tanah. Saurna, maranehanana mah bagianana teh tina kurban-kurban, anu dikurbankeun ka PANGERAN, Allahna Israil.