Read Boros Dusun YOSUA 16 Bible Online

YOSUA 16 - Boros Dusun bible

YOSUA 16

¹Tanah anu dibikeun jadi milik turunan Yusup, wates beulah kidul mimiti ti Walungan Yordan deukeut Yeriho, wetaneun sumber-sumber cai kota Yeriho, terus asup ka gurun keusik. Ti Yeriho nanjak ka pagunungan nepi ka Betel.

²Ti Betel maju ka Lus, terus ka daerah Atarot Adar, daerahna urang Arki.

³Terus ngulon ka wewengkon urang Yaplet, nepi ka wewengkon Bet Horon Hilir, terus ka Geser, anggeus di sisi Laut Tengah.

⁴Sakitu tanah anu dimilikkeun ka turunan Yusup, nya eta kulawarga-kulawarga kaom Epraim jeung kulawarga-kulawarga kaom Menase.

⁵Anu kaungel ieu nya eta wates tanah anu diselehkeun ka kulawarga-kulawarga kaom Epraim. Di beulah wetan watesna mimiti ti Atarot Adar nepi ka Bet Horon Girang,

⁶ti dinya kebat ka Laut Tengah. Di kalereunana nya eta Miktat. Di beulah wetanna garis watesna mengkol ka lebah Taanat Silo, terus ngaliwatan eta ti beulah wetanna maju ka Yanoa.

⁷Ti Yanoa eta wates teh mudun ka Atarot jeung Naharat, terus mapay Yeriho nepi ka Walungan Yordan.

⁸Di beulah kulon, wates tanah Epraim mimiti ti Tapua nepi ka anak Walungan Kana, nepi ka Laut Tengah. Eta tanah anu diselehkeun ka kulawarga-kulawarga kaom Epraim teh, sangkan jadi milikna,

⁹kaasup sababaraha kota leutik jeung desa-desa anu aya di jero wilayah kaom Menase.

¹⁰Tapi urang Kanaan anu maratuh di Geser ku maranehna henteu disingkahkeun. Nepi ka kiwari urang Kanaan anu di dinya mah harirupna teh campur jeung urang Epraim, tapi disina garawe paksa kawas abid.