Read Boros Dusun YOSUA 4 Bible Online

YOSUA 4 - Boros Dusun bible

YOSUA 4

¹Sanggeus kabeh mareuntasan Walungan Yordan, PANGERAN ngandika ka Yosua,

²”Cokot dua belas jelema ti saban kaom saurang-saurang,

³titah ngala batu dua belas siki ti tengah-tengah walungan, ti palebah urut narangtungna imam-imam. Sina dibarawa sarta engke peuting teundeun di pakemahan.”

⁴Seug Yosua nyandak dua belas urang,

⁵sarta saurna, ”Maraneh tarurun ka walungan heulaeun Peti Perjangjian PANGERAN Allah maraneh, ngala batu hiji sewang terus panggul keur kaom-kaom Israil sakaomna-sakaomna.

⁶Eta teh keur panginget-nginget urang Israil ka nu geus dipidamel ku PANGERAN. Baring supagi anak maraneh nanyakeun boga harti naon eta tumpukan batu teh keur maraneh,

⁷terangkeun yen Walungan Yordan kungsi mandeg ngocorna waktu dipeuntasan ku Peti Perjangjian PANGERAN. Eta teh sangkan urang Israil aringet salalawasna ka nu geus kajadian di dieu.”

⁸Eta parentah tuluy dijaralankeun. Akur jeung timbalan PANGERAN ka Yosua, maranehna ngarala batu ti tengah-tengah Walungan Yordan hiji sewang keur urang Israil sakaomna-sakaomna, dibarawa terus digoler-golerkeun di tempat pakemahanana.

⁹Yosua oge numpukkeun batu dua belas siki di tengah-tengah Walungan Yordan, dina urut narangtungna imam-imam anu ngagotong Peti Perjangjian. (Ieu tumpukan batu kiwari aya keneh.)

¹⁰Ari imam-imam ngararandegna di tengah-tengah eta walungan teh tepi ka beresna sagala hal anu kudu dilalampahkeun ku jalma-jalma, sakumaha anu geus didawuhkeun ku PANGERAN ka Yosua. Hal ieu cocog jeung anu bareto diparentahkeun ku Musa tea. Jelema-jelema teh mareuntasna gagancangan.

¹¹Sanggeus araya di peuntas ditu, imam-imam anu ngagotong Peti Perjangjian terus maraju heulaeun maranehna.

¹²Ari kaom Rubin, kaom Gad jeung kaom Menase satengahna anu geus siap tempur, mareuntasna geus ti heula, cocog sakumaha anu bareto diparentahkeun ku Musa ka maranehna.

¹³Aya kira-kira opat puluh rebu jalma di payuneun PANGERAN anu siap tempur geus hararanjat, terus muru hiji tegalan deukeut kota Yeriho.

¹⁴Ku padamelan PANGERAN dina poe eta, urang Israil ngarasa yen Yosua teh agung. Sapanjang jumenengna anjeunna dipikaajrih ku maranehna cara mikaajrih ka Musa.

¹⁵Geus kitu PANGERAN nimbalan ka Yosua

¹⁶sangkan marentah ka imam-imam anu ngagotong Peti Perjangjian sina haranjat ti eta walungan.

¹⁷Seug ku Yosua diparentahkeun,

¹⁸sarta barang imam-imam tea haranjat, ger cai walungan teh ngocor deui nepi ka mudal ka sisi.

¹⁹Eta jelema-jelema mareuntasan Walungan Yordan teh dina poe nu kasapuluh dina bulan nu kahiji, tuluy masang kemah di Gilgal wetaneun kota Yeriho.

²⁰Batu anu dua belas siki bawa ti Walungan Yordan tea ku Yosua disusun di dinya.

²¹Saurna ka urang Israil, ”Baring supagi anak maraneh nanyakeun boga harti naon ieu susunan batu teh,

²²terangkeun yen ieu jadi tanda pitulung PANGERAN, waktu Mantenna mendet Walungan Yordan nepi ka maraneh bisa mareuntas,

²³sakumaha Mantenna geus ngabendung Laut Beureum nepi ka urang bisa meuntas.

²⁴Sangkan unggal jelema di ieu bumi bakal nyaho kumaha rongkahna kakawasaan PANGERAN, sarta maraneh baris hormat ka PANGERAN Allah maraneh sapanjangna.”