Read Boros Dusun HAKIM-HAKIM 20 Bible Online

HAKIM-HAKIM 20 - Boros Dusun bible

HAKIM-HAKIM 20

¹Sakabeh urang Israil, ti semet wewengkon Dan ti kaler, nepi ka Bersyeba di kidul, kitu deui wewengkon tanah Gilad di wetan, kabeh kumpul jadi hiji di payuneun PANGERAN di Mispa.

²Aya opat ratus rebu urang umat Allah anu kumpul, bangsa perjurit badarat, diluluguan ku sakabeh pamingpin kaom-kaom Israil.

³Sajeroning kitu jalma-jalma kaom Binyamin geus ngadarengeeun yen urang Israil lianna kabeh geus kumpul di Mispa. Ceuk urang Israil, ”Caritakeun perkarana eta kajadian.”

⁴Pok urang Lewi anu selirna tiwas nyarita, ”Kuring jeung selir kuring meuting di Gibea, wewengkon Binyamin.

⁵Urang Gibea ngepung imah anu dipake mondok. Maksudna hayang maehan ka kuring, tapi selir kuring anu beunang tuluy diperkosa nepi ka tiwas.

⁶Mayitna ku kuring dibawa tuluy diteukteukan, ti dinya dikirim-kirimkeun ka dua belas kaom Israil, masing-masing sateukteuk. Eta bangsa di urang geus nyieun kalakuan anu aeb, ingkar tina susila.

⁷Anjeun anu araya di dieu kabeh bangsa Israil. Dina sual ieu urang kudu kumaha?”

⁸Jung urang Israil narangtung, ngajawab, ”Saurang ge ulah waka aya nu mulang, boh ka imah boh ka kemah.

⁹Kieu anu kudu dijalankeun: Gibea urang tarajang. Anu piinditeun perang urang tangtukeun ku lotre.

¹⁰Sapersapuluhna ti Israil kudu tatahar keur pibekeleun balad, nu sejenna kudu indit ngahukum Gibea, naur kalakuanana anu aeb di Israil.”

¹¹Jalma-jalma di Israil geus gumulung dina hiji tekad: Rek ngagempur Gibea.

¹²Ti dinya kaom-kaom Israil ngutusan ka sakuliah wewengkon kaom Binyamin, nepikeun ieu pamenta, ”Naon pingaraneunana eta kajahatan aranjeun teh!

¹³Serenkeun urang Gibea anu ingkar tina susila teh, rek ditumpes! Dosa anu siga kitu kudu musna ti Israil.” Tapi eta pamenta Israil ku Binyamin henteu didenge.

¹⁴Anggur murubul ka Gibea ti unggal kota wewengkon Binyamin, arek ngayonan dulur-dulurna papada urang Israil.

¹⁵Poe eta keneh ti sakabeh kota geus kumpul dua puluh genep rebu prajurit. Urang Gibea sorangan geus ngumpulkeun tujuh ratus jalma istimewa, jalma-jalma ngede, kabeh ahli ngabandring, tara mencog satungtung buuk.

¹⁶

¹⁷Ari kaom Israil geus boga opat ratus rebu prajurit, kabeh enggeus asak latih.

¹⁸Urang Israil kumpul di Betel, tempat paranti ngabakti. Tuluy naros ka Allah, ”Kaom mana anu kedah ti heula narajang ka kaom Binyamin?” Waler PANGERAN, ”Kaom Yuda.”

¹⁹Isukna urang Yuda maju, geus mangkalan deukeut kota Gibea,

²⁰rek mimiti narajang ka balad Binyamin. Tata pasukanana nyanghareup ka eta kota.

²¹Balad Binyamin kaluar ti jero kota, mapag ngayonan. Memeh burit geus hasil maehan 22.000 perjurit Israil.

²²Geus kitu urang Israil arindit ka tempat ngabakti, maridangdam di dinya payuneun PANGERAN nepi ka peuting. Ti dinya naros ka Mantenna, ”Kumaha abdi-abdi teh kedah mios deui merangan pun dulur Binyamin?” PANGERAN ngawaler, ”Enya.” Balad Israil timbul deui wawanenna. Pasukanana ditempatkeun cara kamari.

²³

²⁴Der deui narajang ka balad Binyamin kadua kalina.

²⁵Urang Binyamin kaluar deui kadua kalina ti Gibea, sarta hasil maehan deui 18.000 prajurit Israil.

²⁶Bangsa Israil arindit deui ka Betel, maridangdam. Brek marando di payuneun PANGERAN nepi ka peuting, teu nolih lapar. Geus kitu ngahaturkeun kurban karapihan jeung kurban beuleuman ka PANGERAN.

²⁷Dina mangsa eta Peti Perjangjian Allah aya di Betel. Anu jadi imamna nya eta Pinehas bin Elasar putuna Harun. Maranehanana naros deui ka PANGERAN, ”Kumaha abdi-abdi teh kedah majeng deui ngalawan pun dulur Binyamin, atanapi parantos bae?” PANGERAN ngawaler, ”Lawan terus! Isukan ku Kami rek diselehkeun ka maraneh.”

²⁸

²⁹Sanggeus meunang dawuhan PANGERAN, urang Israil nempatkeun pasukanana sawareh sina ngadodoho di sakuriling Gibea.

³⁰Tuluy dina poe anu katilu maju deui narajang balad Binyamin. Tata pasukanana disanghareupkeun ka Gibea cara nu enggeus-enggeus.

³¹Urang Binyamin mapag ngayonan, seug kalejokeun anggang ti kota. Cara nu enggeus-enggeus maranehanana geus mimiti maehan sababaraha urang prajurit Israil di luar, di jalan anu ka Betel jeung anu ka Gibea. Geus aya tilu puluh prajurit Israil anu kasambut.

³²Ceuk urang Binyamin, ”Urang unggul deui bae cara kamari-kamari.” Padahal urang Israil ngahaja mundur, ngarah maranehanana barijil ti jero kota sina ka jaralan.

³³Barang pasukan inti balad Israil ditarik sina mundur sarta ngahiji deui di Baal Tamar, pasukan anu keur ngadodoho kota Gibea rabul kalaluar ti panyumputanana, tina cadas-cadas sabudeureun kota.

³⁴Sapuluh rebu prajurit Israil petingan ti saban kaom, narajang ka Gibea, der campuh ragot teu kira-kira. Urang Binyamin teu ngarasa yen geus tereh tumpur.

³⁵PANGERAN ngersakeun Israil unggul ngelehkeun balad Binyamin. Poe eta 25.100 musuh kasambut ku urang Israil.

³⁶Urang Binyamin ngarasa yen perangna geus kasoran. Pasukan inti balad Israil ditarik sina mundur ti urang Binyamin, sabab ngandelkeun jalma-jalmana anu keur nyarumput ngadodoho di sakuriling Gibea,

³⁷anu tuluy nyelempek ka Gibea kesit pisan. Sanggeus araya di jero kota gancang mencar, ngababad musuh anu di dinya.

³⁸Pasukan inti jeung jalma-jalma anu ngadodoho tea geus nangtukeun hiji isarat, nya eta: Lamun geus aya haseup kandel mumbul ti jero kota,

³⁹pasukan inti anu mundur kudu malik ngangseg musuh. Harita urang Binyamin geus bisa maehan tilu puluh prajurit Israil. Urang Binyamin geus ujub, pokna, ”Urang unggul deui cara kamari-kamari.”

⁴⁰Sanggeus haseup isarat tea katembong mumbul ti kota, urang Binyamin tinglalieuk sarta kacida ngararenjagna, nenjo kotana geus kagulung ku seuneu.

⁴¹Ku pasukan inti balad Israil dibalikan ditarajang. Urang Binyamin teu kira-kira garugupna, tina geus yakin baris kasoran.

⁴²Tarungna mimiti atar ti Israil, tuluy lalumpatan ka nu negrak. Tapi teu bisa kebat, sabab geus kakepung ku pasukan inti jeung ku jelema-jelema tea, anu ngarudag ti jero kota, terus digempur.

⁴³Eta musuh ku urang Israil ditingker sarta hantem dibeberik nepi ka tungtung Gibea beulah wetan, dibabad sapanjang jalan.

⁴⁴Aya dalapan belas rebu urang Binyamin anu kasambut, kabeh prajurit-prajurit anu panghadena.

⁴⁵Sesana kabur ka Cadas Rimon. Lima rebu deui anu kasambut sapanjang jalan. Sesana ku urang Israil diudag nepi ka Gidom, kasambut deui dua rebu urang.

⁴⁶Kabehna anu tiwas dina poe eta teh dua puluh lima rebu prajurit Binyamin, kabeh prajurit-prajurit anu garagah wungkul.

⁴⁷Tapi aya genep ratus urang anu bisa kabur ka Cadas Rimon, tuluy mubus nepi ka opat bulan.

⁴⁸Urang Israil malik deui ngagempur urang Binyamin sasesana, ditumpes kabeh, lalaki, awewe, budak katut jeung sasatoanana. Kota-kotana kabeh dihuru.