Read Boros Dusun RUT 3 Bible Online

RUT 3 - Boros Dusun bible

RUT 3

¹Hiji poe Naomi nyarita ka Rut, ”Nyai teh alusna mah boga deui salaki, imah-imah sorangan. Keun ku Ema dipangneangankeun.

²Ras Ema teh ka Boas, baraya urang, anu humana tempat Nyai mulungan tea. Engke peuting tangtu Boas ka huma rek ngirik.

³Ayeuna Nyai mandi sing bararesih, dangdan ku nu pangalusna, make seuseungitan saeutik mah. Engke peuting tepungan ka ditu ka pangirikan. Tapi ulah waka nembongan samemeh bada tuang.

⁴Di mana anjeunna geus ampih-ampih rek sare, ilik di mana sarena. Mun geus tibra singkabkeun simbutna, Nyai ngedeng tunjangeunana. Engke ku anjeunna tangtu Nyai dibejaan kudu kumaha.”

⁵Jawab Rut, ”Mangga, kumaha saur Ema bae.”

⁶Rut geus indit ka pangirikan di huma, nedunan pituduh mitoha.

⁷Ari Boas, bada dahar hatena ngarasa senang tur lugina, terus reup bae sare, ngagoler dina tumpukan gandum. Rut nyulumun rerencepan nyingkabkeun simbut Boas, dug milu ngagoler di tunjangeunana.

⁸Tengah peuting Boas lilir. Ari hudang kaget bet aya awewe milu ngedeng.

⁹”Saha ieu?” saurna. Rut ngawalon, ”Abdi Rut, Juragan. Saur pun biang, Juragan teh baraya landes anu kedah nanggel abdi. Abdi sumeja masrahkeun diri.”

¹⁰Ari saur Boas, ”Muga Nyai mendak berkahna PANGERAN. Nyai sakitu pengkuhna nyekel kabarayaan. Tina omongan Nyai bieu beuki tetela ti batan nu enggeus-enggeus, kumaha kasatiaan Nyai ka baraya. Buktina Nyai henteu milih nu lian nu ngora keneh, anu beunghar atawa anu miskin.

¹¹Rut ulah salempang. Saha di lembur ieu anu teu nyaho yen Nyai awewe bageur. Keun ku Bapa diuruskeun.

¹²Ari Bapa, enya ge baraya landes anu wajib nanggung Nyai, tapi aya keneh baraya nu leuwih landes.

¹³Keun ayeuna mah sare bae heula di dieu. Isukan isuk-isuk urang coba aya henteuna anu daekeun nanggung Nyai. Lamun aya, kacida hadena. Lamun teu aya, Bapa sumpah demi Allah Anu Jumeneng, nya Bapa anu baris nanggung Nyai. Pek ayeuna mah sare deui nepi ka isuk.”

¹⁴Dug Rut ngedeng deui tunjangeun Boas. Subuh-subuh keneh pisan memeh aya nu nangenan geus hudang, sabab saur Boas ulah aya nu nyahoeun.

¹⁵Saur Boas deui, ”Laan harudum Nyai, amparkeun.” Bar diamparkeun, bro dieusian gandum kira-kira dua puluh lima kilo. Ret dibeungkeut tuluy disuhun, dipangjungjungkeun ku Boas, terus balik ka lembur.

¹⁶Sadatangna mitohana nanya, ”Kumaha bejana, Nyai?” Pok Rut cacarita perkara dirina jeung Boas.

¹⁷Omongna deui, ”Saurna, abdi teh ulah wangsul lengoh, nya dipaparin ieu gandum.”

¹⁸Ceuk Naomi, ”Sabar-sabar bae heula Nyai, dagoan buktina engke. Tangtu Boas oge poe ieu teh moal eureun-eureun ngihtiaran nepi ka beres.”