Read Boros Dusun 1 SAMUEL 1 Bible Online

1 SAMUEL 1 - Boros Dusun bible

1 SAMUEL 1

¹Di desa Ramah di pagunungan Epraim, aya hiji jelema kaom Epraim, ngaranna Elkana bin Yeroham, incu Elihu, warga Tohu ti kaom Sup.

²Boga bojo dua, Hana jeung Penina. Penina boga anak, Hana henteu hiji-hiji acan.

³Saban-saban taun Elkana sok indit ngabakti jeung ngurban ka PANGERAN Nu Maha Kawasa di Silo. Harita anu jadi imam PANGERAN teh duaan, putra Eli, jenenganana Hopni jeung Pinehas.

⁴Unggal-unggal tas ngurban Elkana sok ngirim daging ka Penina saanak-anak.

⁵Ka Hana oge ngirim, ngan ari ka Hana mah sakumaha nyaaheunana oge ngirimanana teu sabaraha, da ieu mah ku PANGERAN teu dikersakeun boga anak.

⁶Turug-turug ku maruna ngan dipapanas bae, dihaja sina nyerieun hatena pedah teu boga anak.

⁷Kituna teh saban taun, unggal ka gedong PANGERAN tara teu dipeupeurih, nepi ka Hana ceurik jeung teu daekeun dahar-dahar acan.

⁸Ku Elkana dibeberah, ”Nyai, ku naon ceurik? Ku naon teu daek dahar? Nguluwut ku naon? Lain Akang teh leuwih nyaah ka Nyai ti batan ka barudak sapuluh?”

⁹Dina hiji poe tas dalahar di gedong PANGERAN di Silo, Hana ngejat tuluy sasambat ka PANGERAN bari ceurik sesegruk. Kabeneran Imam Eli harita keur calik hareupeun lawang.

¹¹Hana ikrar kieu, ”Nun PANGERAN Nu Maha Kawasa, tingali ieu abdi nuju kasesahan. Mugi mikaemut. Upami abdi ku Gusti dikersakeun gaduh anak tur lalaki, bade diiklaskeun sumeja kasanggakeun, saumurna sina kumawula ka Gusti sareng moal dicukur-cukur.”

¹²Sabot Hana manteng neneda ka PANGERAN lila pisan, biwirna ku Eli diawas-awas.

¹³Ku sabab nenedana henteu kedal, ngan semet kuwas-kuwes henteu soraan, disangkana teh mabok.

¹⁴Eli ngalahir, ”Meugeus mabok teh! Nanaonan, geura eling!”

¹⁵Wangsul Hana, ”Bapa, abdi sanes keur mabok, teu nginum naon-naon. Nuju neneda, ngucutkeun kanalangsaan ka PANGERAN.

¹⁶Bapa ulah lepat panggalih nyangka abdi awewe teu puguh. Neneda dugi ka kieu teh ku margi parantos teu kiat ku nalangsa.”

¹⁷Waler Eli, ”Euh, sing gede hate atuh, mugia paneda Nyai diijabah ku Allah Israil.”

¹⁸Wangsul Hana, ”Nyuhunkeun pidu’ana ti kersa Bapa.” Geus kitu tuluy kaluar, seug barang dahar. Hatena geus janglar.

¹⁹Isukna Elkana sakulawarga harudang, tuluy sembahyang ka kersa PANGERAN, ti dinya marulang ka Ramah. Hana ku Elkana ditemahan, sarta PANGERAN ngabulkeun panuhunna.

²⁰Hana ngandeg, tuluy ngalahirkeun hiji anak lalaki, seug dingaranan Samuel, da carekna, ”Beunang nyuhunkeun ti PANGERAN.”

²¹Geus meujeuhna Elkana sakulawarga ka Silo deui nyanggakeun kurban taunan, jeung mayar kaulna ka PANGERAN.

²²Tapi Hana henteu milu, carekna ka salakina, ”Abdi mah engke bae ari si ujang parantos eureun nyusu. Si ujang bade dibantun ka gedong PANGERAN, sina terus di ditu bae saumur hirupna.”

²³Ceuk Elkana, ”Heug kumaha Nyai bae, dagoan di dieu nepi ka si ujang disapih. Mugia PANGERAN ngalaksanakeun pangandika-Na ka Nyai.” Hana tetep di lembur bari ngasuh orok.

²⁴Sanggeus disapih, Samuel ku Hana dibawa ka Silo, bari mawa sapi hiji umur tilu taun, tipung sapuluh kilo jeung anggur sawadah. Basa dibawa ka Kemah PANGERAN di Silo teh Samuel alit keneh pisan.

²⁵Sanggeus sapina dipeuncit, eta murangkalih teh dibawa ka Eli.

²⁶Piunjuk Hana ka Eli, ”Punten Bapa, emut keneh manawi ka abdi, anu kapungkur katingali ku Bapa neneda di dieu, ka PANGERAN?

²⁷Harita abdi teh nyuhunkeun dipaparin anak, ayeuna parantos dimakbul. Ieu pun anak teh.

²⁸Ayeuna seja dibaktikeun ka PANGERAN, saumur hirupna sina ngawula ka Mantenna.” Geus kitu aranjeunna sembahyang di dinya ka PANGERAN.