Read Изге Язма, 2015 Яратылыш 1 Bible Online

Яратылыш 1 - Изге Язма, 2015 bible

Яратылыш 1

¹Әүвәл Аллаһы күкне һәм җирне яратты.

²Җир йөзе әле сурәтсез, буп-буш — төпсез упкын, караңгылык эченә чумган; Аллаһының рухы-сулышы сулар өстендә гизә иде.

³Аллаһы: — Яктылык булсын! — дип боерды, һәм яктылык булды.

⁴Аллаһы яктылыкның яхшы булуын күрде һәм аны караңгылыктан аерды.

⁵Яктылыкны «көн» дип, караңгылыкны «төн» дип атады. Кич булды, иртә булды — бер көн кичте.

⁶Аллаһы: — Суларның уртасында бер гөмбәз булсын, суларны бер-берсеннән аерсын! — дип боерды.

⁷Нәкъ шулай булды: Аллаһы гөмбәзне яратты. Гөмбәз астындагы суларны гөмбәз өстендәге сулардан аерды.

⁸Аллаһы гөмбәзне «күк» дип атады. Кич булды, иртә булды — икенче көн кичте.

⁹Аллаһы: — Күк астындагы сулар бер урынга җыелсын да, коры туфраклы ялан калкып чыксын! — дип боерды, һәм нәкъ шулай булды.

¹⁰Аллаһы коры туфрак яланын «җир» дип, җыелган суларны «диңгез» дип атады. Аллаһы боларның яхшы булуын күрде.

¹¹Аллаһы: — Туфрактан яшеллекләр үсеп чыксын, төренә күрә орлык бирә торган төрле үләннәр, җимешендә үз төренең орлыгын өлгертә торган җимеш агачлары үссен! — дип боерды, һәм нәкъ шулай булды.

¹²Җир өстендә яшеллекләр, төренә күрә орлык бирә торган үләннәр, җимешендә үз төренең орлыгын өлгертә торган җимеш агачлары үсеп чыкты. Аллаһы моның яхшы булуын күрде.

¹³Кич булды, иртә булды — өченче көн кичте.

¹⁴ 14-15 Аллаһы: — Күк гөмбәзендә җир йөзен яктырта торган, көнне төннән аера торган яктырткычлар булсын! — дип боерды. — Алар вакыт, ел фасылы һәм көн исәбе галәмәтләрен күрсәтеп торсыннар. Һәм нәкъ шулай булды.

¹⁶Аллаһы ике бөек күк җисемен — зурысы көн белән, кечесе төн белән идарә итүче яктырткычларны һәм йолдызларны яратты.

¹⁷17-18 Җир йөзен яктыртып, көн вә төн белән идарә итсеннәр һәм яктылыкны караңгылыктан аерып торсыннар өчен, Аллаһы аларны күк гөмбәзенә урнаштырды. Һәм моның яхшы булуын күрде.

¹⁹Кич булды, иртә булды — дүртенче көн кичте.

²⁰Аллаһы: — Сулар терек җан ияләре белән тулып ашсын, җир йөзе өстендә һәм күк гөмбәзе астында кошлар очып йөрсен! — дип боерды.

²¹Һәм Аллаһы зур диңгез җанварларын, төрләренә карап суда кайнашкан барлык җан ияләрен, барлык төр очар кошларны яратты. Моның яхшы булуын күрде.

²²Аллаһы аларга Үзенең фатихасын бирде: — Үрчегез, ишәегез, диңгез суларын тутырыгыз, җир йөзендә кош-корт үрчегәннән-үрчесен! — диде.

²³Кич булды, иртә булды — бишенче көн кичте.

²⁴Аллаһы: — Җир йөзе үзендә төрле токымдагы җан ияләрен — кыргый хайваннарны, терлек һәм хәшәрәтләрне булдырсын! — дип боерды. Һәм нәкъ шулай булды.

²⁵Аллаһы җир йөзендә төрле токымдагы җан ияләрен — кыргый хайваннарны, терлек һәм хәшәрәтләрне яратты. Моның яхшы булуын күрде.

²⁶Аллаһы: — Кешене Үз сурәтебездә, Үзебезгә охшатып яратачакбыз, — диде. — Кеше диңгездәге балыклар, күктәге кошлар, җирдәге хайваннар — җирдә хәрәкәт итүче барлык тереклек һәм хәшәрәтләр өстеннән, җир йөзе өстеннән хакимлек итсен!

²⁷Шулай итеп, Аллаһы кешене Үз сурәтендә, Аллаһыга охшатып яратты. Кешеләрне ир-ат һәм хатын-кыз итеп яратты.

²⁸Аларга фатихасын бирде: — Үрчегез, ишәегез! — диде. — Җир йөзен тутырыгыз, аны буйсындырыгыз; диңгездәге балыкларга, күктәге кошларга, җир йөзендә хәрәкәт иткән барлык җан ияләренә хуҗа булыгыз!

²⁹Аллаһы әйтте: — Менә, туфракта орлыктан үсә торган һәрбер үләнне, җимешендә орлыгы өлгерә торган һәрбер җимеш агачын сезгә тапшырам: алар сезгә ризык булсын! — диде. —

³⁰Җир йөзендәге һәрбер хайванга, күктәге һәрбер кошка, үзендә тереклек сулышын тойган һәрбер җанварга азык итеп яшел үлән насыйп итәм. Һәм нәкъ шулай булды.

³¹Аллаһы Үзе яраткан нәрсәләрне күздән кичерде һәм, менә, һәр нәрсәнең гаять яхшы икәнлеген күрде. Кич булды, иртә булды — алтынчы көн кичте.