Read Изге Язма, 2015 Яратылыш 15 Bible Online

Яратылыш 15 - Изге Язма, 2015 bible

Яратылыш 15

¹Бу вакыйгалардан соң Раббы, Ибрамга күренеш иңдереп, болай диде: «Курыкма, Ибрам! Мин — синең калканың. Аласы бүләгең зур булыр».

²Ибрам: — Хуҗа-Раббым, Син миңа нәрсә бирмәкчесең? — диде. — Бала атасы булалмадым. Минем өемдәге бар хуҗалык дәмәшкъле Элигызыр кулына калачак.

³— Менә, Син бит миңа бала насыйп итмәдең, — дип сүзен дәвам итте Ибрам. — Шуңа күрә өемдәге бер хезмәтче минем мирасчым булачак.

⁴Раббы Ибрамга Үзенең катгый сүзен ирештерде: — Юк, ул синең мирасчың булмаячак. Синнән туган үз балаң сиңа мирасчы булыр, — диде.

⁵Раббы Ибрамны һавага алып чыкты һәм әйтте: — Күк йөзенә башыңны күтәреп кара да, булдыра алсаң, андагы йолдызларны санап чык, — диде. — Синең нәсел варисларың менә шул йолдызлар санынча булачак.

⁶Ибрам Раббыга ышанды, һәм шуның белән Раббы алдында тәкъва булып саналды.

⁷Һәм Раббы Ибрамга әйтте: — Бу җирләрне сиңа мирас итеп бирү өчен, сине килданиләрнең Ур шәһәреннән алып чыккан Раббы — Мин ул! — диде.

⁸Ибрам: — Йа Хуҗа-Раббым! Бу җирләрне мирас итеп алачагымны мин нидән белә алам? — дип сорады.

⁹Раббы әйтте: — Миңа бер тана, бер кәҗә, бер сарык тәкәсе китер, — диде. — Һәрберсе өчәр яшьлек булсын. Бер урман күгәрчене белән бер бала күгәрченне дә китер.

¹⁰Ибрам, хайваннарны алып килеп, суеп, һәркайсын урталай ярды да кисәкләрне бер-берсенә каршы тезеп куйды. Фәкать кошларны гына урталай ярмады.

¹¹Ит кисәкләре өстенә ябырылып ташланган ерткыч кошларны Ибрам куа торды.

¹²Кояш баеган вакытта, Ибрамны тирән бер йокы биләп алды — дәһшәтле дөм караңгылык эченә чумды ул.

¹³Раббы Ибрамга болай диде: — Шуны белеп тор: нәселеңнең киләчәк буыннары дүрт йөз ел буена чит-ят җирдә килмешәк хәлендә, золым-җәбер күреп, кол тормышы белән яшәргә мәҗбүр булырлар.

¹⁴Әмма синең нәсел варисларына коллык китергән ул халыкны Мин хөкем итәрмен. Варисларың коллыктан зур мал-мөлкәт белән чыгарлар.

¹⁵Ә син үзең дөньядан ата-бабаларың янына тыныч күңел белән, олы яшьләргә җитеп күчәрсең.

¹⁶Нәселеңнең дүртенче буыны бирегә кире кайтыр. Чөнки амориләрнең яман эшләре әле чиктән ашмаган.

¹⁷Кояш баеп, караңгы төшүгә, мич морҗасыннан чыккандай, бер төтен баганасы һәм ут көлтәсе урталай ярылган хайваннарның кисәкләре арасыннан сызылып узды.

¹⁸18-21 Бу көнне Раббы, Ибрам белән килешү төзеп, аңа болай диде: — Мисыр елгасыннан алып бөек Фөрат елгасына кадәр сузылган бу җирләрне — кыни, кынази, кадмуни, хитти, фәризи, рефаимнәрнең, шулай ук амори, кәнгани, гиргәши һәм явүсиләрнең җирләрен Мин синең нәсел токымыңа бирәчәкмен.