Read Изге Язма, 2015 Яратылыш 16 Bible Online

Яратылыш 16 - Изге Язма, 2015 bible

Яратылыш 16

¹Хатыны Сарая Ибрамга бала тапмады. Сараяның Һаҗәр исемендә мисырлы бер асравы бар иде.

²Сарая Ибрамга әйтте: — Менә, Раббы мине бала табудан мәхрүм кылды, — диде. — Син асравым белән йоклап кара әле. Шулай, бәлкем, мин дә аңардан нәсел анасы була алырмын [21]. Ибрам Сараяның сүзен тыңларга булды.

³Шулай итеп, Сарая мисырлы Һаҗәрне ире Ибрамга хатынлыкка бирде. Бу хәл Ибрам Кәнганда ун ел гомер кичергәннән соң булды.

⁴Ибрам Һаҗәр белән йоклады, һәм Һаҗәр балага узды. Балага узганын белгәннән соң, Һаҗәр үзенең хуҗабикәсен санламый башлады.

⁵Сарая Ибрамга: — Минем башка төшкән бу хаксызлыкка син гаепле! — диде. — Асравымны синең кочагыңа мин үзем бирдем. Ә ул, балага узганын белгәч, мине бөтенләй санламый башлады. Синең белән минем араны Раббы Үзе хәл итсен!

⁶Ибрам Сараяга: — Асравың синең кул астында бит, нәрсә телисең, шуны эшлә, — диде. Шуннан соң Сарая үзенең асравына җәбер күрсәтә башлап, асрау өйдән качып китте.

⁷Раббының фәрештәсе Һаҗәрне чүлдәге бер чыганак — Шурга бара торган юл буендагы кое яныннан эзләп тапты.

⁸Аңардан сорады: — Сараяның асравы, и Һаҗәр! Син каян килдең дә кая юл тотасың? — диде. Һаҗәр: — Мин хуҗабикәм Сараядан качып барам, — дип җавап бирде.

⁹Раббының фәрештәсе: — Хуҗабикәң янына кире кайт та аңа буйсын, — диде. —

¹⁰Синең нәселеңне үрчеткәннән-үрчетәчәкмен, шулкадәр ки, аны санап та бетерерлек булмас.

¹¹Раббының фәрештәсе тагын болай диде: — Менә, син хәзер йөкле, бер угыл табарсың һәм аңа Исмәгыйль [22] дип исем кушарсың. Чөнки Раббы синең кичергән газапларыңны ишетте.

¹²Углың кыргый ишәкне хәтерләтер. Аның кулы — бар кешегә каршы, бөтен кешенең кулы аңа каршы күтәрелер. Кардәшләре белән мөнәсәбәте низаглы булыр.

¹³Һаҗәр: — Әллә чыннан да мине күрүче Затны күрдем микән? — дип, үзе белән сөйләшкән Раббыга «Син — Эл-Рои [23]» дип исем кушты.

¹⁴Менә шунлыктан Кадыш белән Беред арасындагы әлеге кое «Беер-Лахай-Рои» [24] исемен йөртә.

¹⁵Һаҗәр Ибрамга бер угыл тудырды. Һаҗәрдән туган бу углына Ибрам Исмәгыйль дип исем кушты.

¹⁶Һаҗәр Исмәгыйльне тапканда, Ибрам сиксән алты яшендә иде.