Read Изге Язма, 2015 Яратылыш 17 Bible Online

Яратылыш 17 - Изге Язма, 2015 bible

Яратылыш 17

¹Ибрам туксан тугыз яшьтә чагында, аның хозурында янә Раббы күренеп: — Мин — Кадир [25] Алламын! — диде. — Минем юлымда йөр һәм кимчелексез бул!

²Синең белән төзегән килешүне үтәп, Мин сине бик тә, бик тә үрчемле итәчәкмен.

³Ибрам, сәҗдәгә китеп, йөзе белән җиргә орынды. Аллаһы Үзенең сүзен дәвам иттерде:

⁴— Менә, синең белән төзегән килешүем шулдыр: син бик күп халыкларның нәсел атасы булачаксың!

⁵Моннан соң синең исемең дә Ибрам [26] түгел, ә Ибраһим [27] булыр. Чөнки Мин сине күп халыкларның нәсел атасы итәчәкмен.

⁶Син бик тә үрчемле нәселнең башы булырсың, нәселеңнең тармакларыннан күп халыклар туар, патшалар чыгар.

⁷Килешүемне Мин сиңа һәм синең токымыңа мәңгегә күндерәм. Мин — синең һәм токымыңның Алласымын.

⁸Син горбәттә гизеп йөргән шушы Кәнган җирләрен Мин сиңа һәм синең токымыңа мәңгелек милек итеп бирермен, Мин аларның барысының да Алласы булырмын.

⁹Аллаһы Ибрамга: — Син һәм синең токымың Минем килешүемә тугры булыгыз! — диде. —

¹⁰Синең һәм токымың белән төзелгән килешүемнең шарты шулдыр: арагыздагы ир затларның барысы да сөннәткә утыртылырга тиеш!

¹¹Сөннәтле булыгыз, сөннәтле булу Минем белән сезнең арада төзелгән килешүемнең галәмәте итеп каралыр.

¹²Арагызда өйдә туганнар да, чит ыругтан акчага сатып алынганнар да — һәрбер ир бала тумышының сигезенче көнендә сөннәткә утыртылсын!

¹³Сезнең өегездә туган яки акчага сатып алынган һәр ир баланың сөннәткә катгый утыртылуы — бәдәнегездәге менә шул тамга — Минем килешүемнең мәңгелек билгесе булыр.

¹⁴Сөннәткә утыртылмаган һәр ир заты үз халкыннан киселеп калыр, чөнки ул Минем килешүемне бозган буладыр.

¹⁵Аллаһы Ибраһимга: — Хатының Сараяга да бүтән Сарая дип дәшмә, — диде. — Моннан соң аның исеме Сара [28] булыр.

¹⁶Мин аны мөбарәк кылам. Аңардан синең бер углың туар. Хатыныңны шулкадәр мөбарәк кылам ки, ул күп халык-кавемнәрнең анасы булыр, аның нәсел варислары арасыннан патшалар чыгар.

¹⁷Ибраһим, сәҗдәгә китеп, йөзе белән җиргә орынды һәм көлеп куйды. Эченнән: «Йөз яшьлек кеше ничек инде бала таптыра алсын?! — диде. — Туксан яшьлек Сарага да ничек бала тудырмак кирәк?!»

¹⁸Һәм Ибраһим Аллаһыга әйтте: — Синең хозурыңда һич югы Исмәгыйлем исән-имин булса иде! — диде.

¹⁹Аллаһы исә: — Нәкъ менә хатының Сара сиңа угыл табып бирер, — диде. — Аңа син Исхак [29] дип исем кушарсың. Мин аның белән һәм аның аша токымы белән килешүемне мәңгегә беркетеп куячакмын.

²⁰Исмәгыйльгә килгәндә, Мин сине ишеттем. Аны мөбарәк кылып, нәселен бик үрчемле, бик ишле итәчәкмен. Аңардан унике идарәче туар, нәселеннән бөек халык барлыкка килер.

²¹Әмма килешүемне Мин Исхак белән — киләсе елда нәкъ шушы вакытта хатының Сарадан туачак углың белән беркетеп куячакмын.

²²Шулай дип, Аллаһы сүздән туктады һәм, Ибраһимнан аерылып, күккә ашты.

²³Ибраһим исә углы Исмәгыйльне һәм кул астындагы барлык ир затын — өендә туганнарны да, акчага сатып алынганнарны да җыеп, Аллаһы кушканча, шул көнне сөннәткә утыртты.

²⁴Сөннәткә утыртылганда, Ибраһим туксан тугыз яшендә иде.

²⁵Ә углы Исмәгыйль, сөннәткә утыртылганда, унөч яшьтә иде.

²⁶Ибраһим да, углы Исмәгыйль дә бер үк көнне сөннәтле булдылар.

²⁷Ибраһим өендәге барлык ир заты — шунда туганнар да, чит ыругтан сатып алынганнар да Ибраһим белән бергә сөннәт иясе булдылар.