Read Изге Язма, 2015 Яратылыш 3 Bible Online

Яратылыш 3 - Изге Язма, 2015 bible

Яратылыш 3

¹Раббы Алла яраткан барлык кыр җанварларыннан иң мәкерлесе елан иде. Елан хатыннан: — Аллаһы чыннан да бакчадагы һичбер агачтан җимеш ашамагыз дидеме? — дип сорады.

²— Бакчадагы агачлардан җимеш ашарга безгә рөхсәт бар, — дип җаваплады хатын. —

³Әмма Аллаһы әйтте, бакча уртасындагы агачның җимешләренә кагылмагыз, аларны ашамагыз, юкса үләрсез, диде.

⁴Елан: — Юк, үлмисез, — диде. —

⁵Чөнки Аллаһы белә: ул агачның җимешен ашаган көнне сезнең күзләрегез ачылачак, яхшылык белән яманлыкның ни икәнен белеп, Аллаһының Үзе кебек [4] булачаксыз.

⁶Хатын әлеге агачның карап торышка гүзәл, җимешенең ризык өчен хуш булуын күрде. Белем бирү хасиятенә ия булган агач хатынның нәфесен кузгатып, хатын агачтан җимеш өзеп алып ашады, иренә дә өзеп алып бирде — ул да ашады.

⁷Икесенең дә күзләре ачылды. Шәп-шәрә икәнлекләрен күрделәр. Инҗир яфракларыннан үреп, үзләренә бил каплагычлары ясадылар.

⁸Җиләс көн иде, алар бакчада йөргән Раббы Алланың тавышын ишеттеләр. Аңа күренмәс өчен, адәм һәм аның хатыны бакча агачлары арасына кереп постылар.

⁹Раббы Алла адәмгә: — Син кайда? — дип эндәште.

¹⁰Адәм: — Бакчада тавышыңны ишеттем дә куркып калдым. Чөнки мин шәрәмен, шуңа яшерендем, — диде.

¹¹Раббы Алла: — Шәрә икәнеңне сиңа кем әйтте? — дип сорады. — Мин җимешен ашама дигән агачтан җимеш өзеп ашадыңмы әллә?

¹²Адәм: — Яныма Син куйган хатын, ул агачтан җимеш өзеп алып, миңа бирде, мин аны ашадым, — дип җаваплады.

¹³Раббы Алла хатынга әйтте: — Моны син ничек эшли алдың? Хатын әйтте: — Мине елан котыртты, шуңа ашадым, — диде.

¹⁴Раббы Алла еланга болай диде: «Бу эшең өчен син җир йөзендәге барлык хайваннар, җәнлекләр каршында каһәр ияседер! Гомерең буе карының өстендә шуышып йөрерсең һәм туфрак ашап туенырсың.

¹⁵Синең белән хатын-кыз арасына, синең токымың белән аның нәселе арасына дошманлык җебе сузармын. Аның нәселе [5] башыңны сугып ярыр, син исә аны үкчәсеннән чагарсың».

¹⁶Хатынга исә Раббы Алла әйтте: «Сине чиктән тыш каты авыртуларга дучар итәчәкмен: баланы зур газаплар чигеп табачаксың. Күңелең иреңә тартылыр, ул исә синең өстеңнән хакимлек итәр», — диде.

¹⁷Ә адәмгә Раббы Алла болай диде: «Менә синең аркада, хатыныңның сүзен тыңлап, Мин ашама дип кисәткән агачның җимешен ашаганың өчен, җир туфрагына Минем ләгънәтем төште. Гомерең буе тамагыңа ризыкны җәфа чигеп табарсың.

¹⁸Туфрак сиңа тикән дә чүпүлән үстерер. Син кыргый үлән ашап туенырсың.

¹⁹Яратылмыш туфрагыңа кире әйләнеп кайтканчыга кадәр, син ашар икмәгеңне маңгай тирен түгеп табарсың. Чөнки син үзең туфрак, туфрактан яратылдың һәм янә туфракка әверелерсең».

²⁰Адәм хатынга Һава [6] дип исем кушты, чөнки ул барлык адәм балаларының анасы иде.

²¹Раббы Алла, Адәм [7] белән хатыны Һава өчен тиредән киемнәр ясатып, аларны киемле итте.

²²Аннары болай диде: — Кеше, яхшылыкны һәм яманлыкны танып белеп, безнең арадан беребез кебек булды. Инде ул, тереклек агачыннан да җимеш сузылып алып һәм аны ашап, үлемсез булып китмәгәе.

²³Шулай дип, Раббы Алла, Адәмгә үзе яратылган туфракны эшкәртү-игү хезмәтен йөкләп, аны Гадән бакчасыннан чыгарды.

²⁴Аны куды; тереклек агачына юлны бикләү өчен, Гадән бакчасының көн чыгышы тарафына керубимнәр һәм әйләнмәле утлы кылыч куйды.