Read Изге Язма, 2015 Яратылыш 35 Bible Online

Яратылыш 35 - Изге Язма, 2015 bible

Яратылыш 35

¹Аллаһы Ягъкубка әйтте: — Кузгал! Бәйт-Элгә китеп, шунда яшә! Туган кардәшең Эсаудан качып киткән чагында синең алда пәйда булган Аллаһы хөрмәтенә шунда мәзбәх яса! — диде.

²Ягъкуб, бөтен өй җәмәгатенә һәм янында булган барлык адәмнәргә мөрәҗәгать итеп: — Чит-ят илаһларыгызны ташлагыз! — диде. — Чистарынып, өс киемнәрегезне алыштырыгыз.

³Без кузгалабыз, Бәйт-Элгә китәбез. Бәлагә төшкән көннәремдә ярдәменнән калдырмаган һәм йөрер юлларымда һәрчак минем белән бергә булган Аллаһы хөрмәтенә Бәйт-Элдә мин мәзбәх корачакмын, — диде.

⁴Шуннан соң һәркайсы кулларында булган барлык чит-ят илаһларын, колак алкаларын Ягъкубка тапшырды. Ягъкуб исә аларны, Шәкем янындагы бер имән төбенә күмеп, күздән юк итте.

⁵Шулай итеп, алар юлга кузгалдылар. Бөтен тирә-яктагы шәһәрләрнең халкын Аллаһыдан курку биләп алган иде, шул сәбәпле Ягъкуб угылларын эзәрлекләүче булмады.

⁶Ягъкуб үзенең бөтен адәмнәре белән берлектә Кәнган җирендәге Луз шәһәренә, ягъни Бәйт-Элгә килде.

⁷Анда мәзбәх корып, бу урынга Эл-Бәйт-Эл [79] дип исем кушты, чөнки туган кардәшеннән качып барган чагында, Аллаһы аңа нәкъ менә шушы урында күренгән иде.

⁸Рәбиканың сөт анасы Дебора вафат булгач, аны Бәйт-Элдән түбәндәрәк бер имән агачы төбенә күмделәр. Шул уңайдан бу агачка Аллон-Бахут [80] дигән исем бирелде.

⁹Ягъкуб Паддан-Арамнан кайтканнан соң, Аллаһы, аның алдында янә бер күренеп, аңа мөбарәк фатихасын ирештерде,

¹⁰әйтте: — Моңарчы сине Ягъкуб дип атап йөрделәр, әмма бүгеннән синең исемең Исраил булыр, — диде. Шулай итеп, Аллаһы Ягъкубка Исраил дигән исем кушты.

¹¹Аллаһы тагын болай диде: — Мин — Кадир Алламын! Үрчемле бул һәм ишәй! Мин синнән зур халык һәм тагын күп халыклар тудырачакмын — син күп патшаларның нәсел атасы булачаксың.

¹²Мин Ибраһим белән Исхакка биргән җирләрнең һәммәсен сиңа һәм синнән соңгы нәсел варисларыңа бирәчәкмен.

¹³Шулай дип, Аллаһы Ягъкуб белән сөйләшеп торган урыннан күккә ашты.

¹⁴Ягъкуб исә Аллаһының сүзләрен ишеткән бу урынга таштан бер һәйкәл куйды һәм аның өстенә шәраб белән зәйтүн мае койды.

¹⁵Ягъкуб Аллаһы аның белән сөйләшкән бу урынга Бәйт-Эл дип исем кушты.

¹⁶Аннары алар, Бәйт-Элдән күчеп, ары киттеләр. Эфрата җиренә җитәрәк, юлда Рахиләнең тулгагы башланды. Баланы ул бик авыр тапты.

¹⁷Тулгак газабын кичергәндә, кендек әбисе аңа әйтте: — Курыкма, тагын бер углың булыр, — диде.

¹⁸Әмма Рахилә инде үлем түшәгендә иде. Җаны чыгып барганда, ул үзенең дөньяга яңа килгән углына Бенони [81] дип исем кушты. Ләкин атасы аның исемен Беньямингә [82] алыштырды.

¹⁹Рахилә шулай вафат булып, аны Эфратага, ягъни Бәйт-Лехемгә бара торган юл буена җирләделәр.

²⁰Ягъкуб Рахиләнең каберенә таш һәйкәл куйды, һәм ул һәйкәл ташы әле бүген дә шунда тора.

²¹Исраил бу урыннан янә күчте һәм Мигдал-Эдер аръягындагы җирләрдә чатыр корып яши башлады.

²²Ул шунда яшәгән заманда, Исраилнең углы Рубин атасының җариясе Билһа белән якынлык кылды. Исраил бу хәлне ишетеп белде. Ягъкубның унике углы бар иде.

²³Лиядән туган угыллары: иң өлкәне Рубин, аннан соң Шимун, Леви, Яһүдә, Исәсхәр һәм Зәбулун.

²⁴Рахиләдән туган угыллары: Йосыф белән Беньямин.

²⁵Рахиләнең җариясе Билһадан туган угыллары: Дан белән Нәптали.

²⁶Лиянең җариясе Зилпәдән туган угыллары: Гәд, Ашер. Ягъкубның Паддан-Арамда чакта туган угыллары шулардыр.

²⁷Ягъкуб кайчандыр үзенең бабасы Ибраһим һәм хәзер атасы Исхак яшәгән җирләргә — бүгенге көндә Хебрун дип йөртелгән Кыръят-Арба янындагы Мәмрегә, атасы Исхак янына әйләнеп кайтты.

²⁸Исхак йөз дә сиксән ел яшәде.

²⁹Картаеп, тормышта барысын татып-кичереп, ул соңгы сулышын алды, җан тәслим кылып, үзенең ата-бабалары белән кушылды. Угыллары Эсау белән Ягъкуб аны дәфен кылдылар.