Read Изге Язма, 2015 Яратылыш 39 Bible Online

Яратылыш 39 - Изге Язма, 2015 bible

Яратылыш 39

¹Йосыф Мисырга китерелде. Мисыр фиргавененең сарай хезмәтчесе, җансакчылар башлыгы Потифар, аны исмәгыйлиләр кулыннан сатып алды.

²Раббы Йосыфны ташламады. Йосыфның бөтен эшләре уңышлы чыга иде. Ул үзенең мисырлы хуҗасы өендә яши башлады.

³Өй хуҗасы Йосыфка Раббысы химая итүен [86], ни генә эшләсә дә, аның һәр эшен уңышлы кылуын күрә иде.

⁴Йосыф шулай, хуҗасы күңеленә хуш килеп, аның хезмәтчесе булып китте. Ахырда Потифар үзенең өе белән идарә итүне, барлык хуҗалык эшләрен Йосыф кулына тапшырды.

⁵Хуҗалык эшләре, өй белән идарә итү вазифасы Йосыф кулына тапшырылганнан соң, Йосыф хакына Потифарның өен Раббы мөбарәк кылды, аның йортында һәм кырларында башкарылган барлык эшләргә бәрәкәт насыйп итте.

⁶Потифар үз хуҗалыгындагы бар нәрсәне шулай Йосыф хөкеменә калдырды, ашаган ризыгыннан башка бернәрсә турында да кайгыртып уйламады. Йосыф зифа буйлы, төскә-биткә чибәр егет иде.

⁷Потифар хатынының Йосыфка күзе төшеп: — Минем белән йокла, — дип, аңа тәкъдим ясады.

⁸Әмма Йосыф баш тартты, хуҗабикәгә: — Менә, мин монда булганга, хуҗа әфәндемнең үз өендәге эшләрдән бернинди кайгысы юк, ул бөтен эшләрне минем кулга тапшырды, — дип җавап бирде. —

⁹Бу өйдә мин дә аның кебек үк хуҗамын, — диде Йосыф. — Чөнки ул синнән кала бар нәрсәне минем ихтыярыма куйды. Әмма син — аның хатыны! Ничек инде мин, шундый яманлык эшләп, Аллаһы каршында үз өстемә зур гөнаһ алыйм?!

¹⁰Хуҗабикә һәркөн үзе белән йокларга, якынлык кылырга чакырса да, Йосыф аның сүзен тыңламады.

¹¹Шулай булды ки, беркөнне Йосыф үз эшләре белән өйгә керде. Бу юлы өй эчендә хуҗабикәдән башка беркем дә юк иде.

¹²Хуҗабикә янә: — Минем белән йокларга ят! — дип, кулы белән Йосыфның киеменнән эләктереп алды. Әмма Йосыф, өске киемен хуҗабикәнең кулында калдырып, тиз генә өйдән чыгып йөгерде.

¹³Хатын, Йосыфның, өс киемен ташлап калдырып, өйдән чыгып качуын күргәч,

¹⁴кычкырып, йорт хезмәткәрләрен чакырды һәм аларга: — Менә, күрегез! Бу гыйбри адәм безне мыскыл итәр өчен алып кайтылган, — диде. — Минем белән йокларга дип килгән булган, ләкин мин әче тавыш белән кычкырып җибәрдем.

¹⁵Шулай ачыргаланып, әче тавыш белән кычкыруымны ишеткәч, менә, киемен ташлап калдырып, өйдән чыгып йөгерде.

¹⁶Хуҗабикә, ире Потифар өйгә кайтканга кадәр, Йосыфның өс киемен үз янында саклап тотты.

¹⁷Кайткач, аңа баягыча сүзләр белән хәлне сөйләп бирде: — Монда син алып кайткан гыйбри колың мине мыскыл итәргә теләде,

¹⁸әмма мин әче тавыш белән кычкыргач, өс киемен монда калдырып, өйдән чыгып качты, — диде.

¹⁹Үзенең колы өстеннән хатынының зарлануын ишеткәч, Потифарның ачуы тәмам соң чиккә җитте.

²⁰Йосыфны ул тоткын итеп патшаның мәхбүсләре [87] ята торган зинданга яптырды. Йосыф зинданга ябылса да,

²¹Раббы аның янында булды, мәрхәмәтен ирештереп, зинданбашы күңелендә Йосыфка карата рәхимле караш уятты.

²²Зинданбашы Йосыфны төрмәдәге барлык тоткыннар өстеннән карап торучы назыйр итеп куйды. Тоткыннарның зиндандагы бөтен эшләре белән Йосыф җитәкчелек итә иде.

²³Зинданбашы үзе Йосыф кул астында эшләнә торган эшләрнең һичберсе белән кызыксынмады, чөнки Йосыфның янында Раббы булып, Раббы аның һәрбер эшен уңышлы кыла иде.