Read Изге Язма, 2015 Яратылыш 4 Bible Online

Яратылыш 4 - Изге Язма, 2015 bible

Яратылыш 4

¹Адәм үзенең хатыны Һава белән якынлык кылды. Һава, йөккә узып, Кабилне [8] тудырды. — Раббының мәрхәмәте белән бер ир заты кабул иттем, — диде.

²Тагы да соңрак Кабилнең энесе Һабилне тудырды. Һабил — сарыклар көтүче, Кабил исә игенче булды.

³Берникадәр вакыт узгач, Кабил җир җимешләре уңышыннан Раббыга бүләк китерде.

⁴Һабил дә үз көтүендә беренче булып туган мал-туар үрчеменнән берничәсен һәм куй мае алып килде. Раббы Һабилне һәм аның бүләген кабул итте,

⁵Кабилне һәм аның бүләген исә кире какты. Кабил бик нык рәнҗеде, ачуыннан башын түбән иде.

⁶Раббы Кабилдән: — Нигә шулай рәнҗисең? Ни өчен башыңны түбән идең? — дип сорады. —

⁷Яхшылык кылгач, башны түбән ияргә димени?! Яхшылык кылмыйсың икән, гөнаһ ишек төбендә посып торыр, сине сагалар. Ә син аңардан өстен бул!

⁸энесе Һабилгә Кабил: — Әйдә, кырга чыгабыз! — диде. Кырда чакта Кабил, энесе Һабилгә һөҗүм итеп, аны үтерде.

⁹Раббы Кабилдән: — Энең Һабил кайда? — дип сорады. Кабил: — Белмимен, энемнең җан сакчысы түгел ич мин! — дип җаваплады.

¹⁰Раббы: — Син ни кылдың? — диде. — Туфрактан кардәшеңнең кан ыңгырашуы Миңа ишетелеп тора.

¹¹Инде син кардәшеңнең түккән канын эчәргә авызын ачкан туфракның каргышын алдың.

¹²Эшкәртә торган туфрагың моннан соң сиңа көч-куәтен бирмәс; җир йөзендә син гомерең буе сөрелеп һәм качак булып яшәрсең.

¹³Кабил Раббыга: — Җәзам көчем җитмәс дәрәҗәдә авыр җәзадыр, — диде. —

¹⁴Бүген мине туган җиремнән сөрәсең. Синең хозурыңнан югалып, мин горбәттә [9] качак булып яшәргә мәҗбүр. Юлымда очраган теләсә кем мине үтерә алачак.

¹⁵Раббы әйтте: — Кем дә кем Кабилне үтерсә, аңардан җиделәтә артык үч алыныр, — диде. Шулай дип, Кабилне беркем дә күреп үтермәсен өчен, Раббы аны кисәтүле галәмәт белән тамгалады.

¹⁶Кабил, Раббысы хозурыннан аерылып, Гадән бакчасының көн чыгышы тарафындагы Нод [10] төбәгенә барып җирләште.

¹⁷Кабил үзенең хатыны белән якынлык кылды, хатыны йөккә узды һәм углы Ханохны тудырды. Кабил, ул арада бер шәһәр салдырып, аны углы хөрмәтенә Ханох дип атады.

¹⁸Ханохтан Ирад булды. Ирадтан Мәһүәил, Мәһүәилдән Мәтушаил, Мәтушаилдән Ләмех булды.

¹⁹Ләмех ике хатын алды. Бер хатынының исеме — Ада, икенчесенеке Силла иде.

²⁰Ада Явалны тудырды. Явал, көтү көтеп, чатырда яшәүчеләрнең нәсел атасы булды.

²¹Явалның бертуган кардәше Ювал исемле иде. Ювал саз һәм курайда уйнаучыларның атасы булды.

²²Силла Түбәл-Кабилне тудырды. Түбәл-Кабил бакыр һәм тимердән кораллар коеп ясау остасы иде. Түбәл-Кабилнең Нагама исемле кыз кардәше дә бар иде.

²³Ләмех үзенең хатыннарына болай диде: «Әй Ада һәм Силла, мине тыңлагыз! Әй Ләмех хатыннары, сүзләремә колак салыгыз! Мине берәр адәм яраласа — үтерәм! Берәр егет мине рәнҗетсә — үтерәм!

²⁴Кабил өчен җиделәтә артык үч алынасы булса, Ләмех өчен җитмеш җиделәтә артык үч алыначак!»

²⁵Адәм янә хатыны белән якынлык кылды. Һава бер угыл тудырды. — Кабил тарафыннан үтерелгән Һабил урынына Аллаһы миңа икенче бер угыл багышлады, — дип, Һава бу углына Шет [11] дип исем бирде.

²⁶Шетның бер углы булды, Шет аңа Энош [12] дип исем куйды. Шул заманнардан адәм балалары үзләренең догаларын Раббы исеменә багышлый башладылар.