Read Изге Язма, 2015 Яратылыш 40 Bible Online

Яратылыш 40 - Изге Язма, 2015 bible

Яратылыш 40

¹Бу вакыйгалардан соң бервакыт Мисыр патшасының шәрабчысы белән икмәкчесе үзләренең хуҗалары алдында гаепле булдылар.

²Шунлыктан фиргавеннең шул сарай хезмәтчеләренә — баш шәрабчы белән баш икмәкчегә — бик тә нык ачуы чыкты,

³һәм ул аларны сак астына алдырды: үзенең җансакчылар башлыгы өе карамагындагы, Йосыф яткан зинданга ябарга кушты.

⁴Җансакчылар башлыгы бу ике тоткынга хезмәт күрсәтү вазифасын Йосыфка йөкләде. Алар шулай берникадәр вакыт сак астында бергә булдылар.

⁵Мисыр патшасының зинданга ябылган әлеге шәрабчысы белән икмәкчесе һәр икесе бер төндә үзенә аерым мәгънәдәге төш күрделәр.

⁶Иртән Йосыф, алар янына кергәч, боларның бик нык аптырашка калуын күрде.

⁷Шуннан Йосыф үзенең хуҗасы Потифар өе зинданында үзе белән бергә тоткынлык кичерүче бу ике фиргавен сарае түрәсеннән: — Бүген сезнең нигә чырайларыгыз бик боек? — дип сорады.

⁸Алар әйттеләр: — Без төш күрдек, тик төшләребезне юраучы кеше генә юк, — диделәр. Йосыф: — Төш юрау Аллаһы иркендә түгелме?! — диде. — Миңа сөйләгезче!

⁹Баш шәрабчы күргән төшен Йосыфка сөйләп әйтте: — Төшемдә мин бер йөзем агачы күрдем.

¹⁰Аның өч ботагы бар иде. Агач үсеп чәчәк атты, аннары тәлгәш-тәлгәш җимешләр өлгерде.

¹¹Мин фиргавеннең касәсен кулыма тотканмын имеш. Агачтан йөзем тәлгәшен алып касәгә сыктым да касәне фиргавенгә бирдем.

¹²Йосыф шәрабчының төшен юрап әйтте: — Төшеңнең тәгъбире болайдыр: өч ботак — өч көн ул;

¹³өч көннән фиргавен сине югары күтәрәчәк — элеккеге урыныңа кире кайтарачак. Электә фиргавеннең шәрабчысы булгандагы кебек, син янә фиргавен касәсен аның кулына биреп тора башлаячаксың.

¹⁴Тик сиңа бер үтенеч! Эшләрең җайлангач, мине дә хәтереңә төшер: игелек күрсәтеп, минем хакта фиргавенгә сүз җиткер һәм мине бу йорттан чыгарырга булыш.

¹⁵Мин — гыйбриләр иленнән урлап кителгән кеше! Мин бу илдә дә зинданга ябып куярдай бернинди яман эш эшләмәдем!

¹⁶Баш икмәкче, Йосыфның төшне яхшы юравын күреп, аңа: — Мин дә бер төш күрдем, — диде. — Баш түбәмә өсте-өстенә өч үрмә кәрзин куйганмын имеш.

¹⁷Иң өстәге кәрзиндә фиргавен өчен төрле нигъмәтләр, икмәкче пешергән ризыклар. Менә шул ризыкларны башым өстендәге кәрзиннән, чукып-чукып, кошлар алып китәләр иде.

¹⁸Йосыф икмәкчегә җавап биреп әйтте: — Төшнең тәгъбире болай: өч кәрзин — өч көн ул;

¹⁹өч көннән фиргавен сине дә югары күтәрәчәк — сине агачка асып куячак, күк кошлары исә, чукып-чукып, синең тәнеңдәге итне ашаячаклар.

²⁰Өч көннән, үзенең туган көнендә, фиргавен барлык сарай түрәләре өчен зур мәҗлес җыйды һәм алар алдында баш шәрабчы белән баш икмәкчене югары күтәрде —

²¹баш шәрабчыны элекке урынына кайтарды, һәм ул әүвәлгечә фиргавен кулына касәсен биреп тора башлады,

²²ә баш икмәкчене, Йосыф аларга юраганча, дарга асты.

²³Йосыфның тик үзен генә хәтергә төшерүче булмады, баш шәрабчы аны тәмам оныткан иде.