Read Изге Язма, 2015 Яратылыш 46 Bible Online

Яратылыш 46 - Изге Язма, 2015 bible

Яратылыш 46

¹Ягъкуб, үзенең бар мал-мөлкәтен алып, юлга чыкты. Беер-Шебада туктап, атасы Исхакның Алласына багышлап, корбаннар китерде.

²Төнлә исә Исраилнең күз алдында Аллаһы күренеп: — Ягъкуб! Ягъкуб! — дип өн салды. — Мин тыңлыйм! — дип җавап бирде Ягъкуб.

³Аллаһы әйтте: — Мин — Аллаһы, атаңның Алласымын! — диде. — Курыкма, Мисырга күчеп кит! Мин анда синнән бөек бер халык тудырачакмын.

⁴Мин Мисырга синең белән бергә барам. Соңра сине аннан алып чыгучы да Мин булырмын. Йосыф үз куллары белән синең күзләреңне йомдырыр.

⁵Беер-Шебадан Ягъкуб янә кузгалды. Исраилнең угыллары, фиргавен җибәргән арбаларга үзләренең балаларын, хатыннарын һәм Ягъкубның үзен утыртып, Мисырга таба юлларын дәвам иттерделәр.

⁶6-7 Кәнганда туплаган бар мал-мөлкәтне һәм бөтен мал-туарны алар үзләре белән алганнар иде. Шул рәвешчә, Ягъкуб үзенең бөтен ыруг-нәселен — угылларын, кызларын һәм онык-туруннарын үзе белән бергә Мисыр җиренә алып килде.

⁸Мисырга күчеп килгән Исраил токымының исемнәре шулайдыр: Ягъкуб һәм аның угыллары. Ягъкубның иң беренче углы Рубин.

⁹Рубинның угыллары: Ханох, Паллу, Хесрон һәм Кәрми.

¹⁰Шимунның угыллары: Емуил, Ямин, Оһад, Яхин, Сохар һәм кәнгани хатыннан туган углы Шаул.

¹¹Левинең угыллары: Гершон, Коһат һәм Мерари.

¹²Яһүдәнең угыллары: Эр, Онан, Шела, Перес һәм Зерах. Ләкин Эр белән Онан Кәнган җирендә үк вафат булдылар. Пересның угыллары Хесрон һәм Хамул исемле иде.

¹³Исәсхәрнең угыллары: Тола, Пувва, Яшуб һәм Шимрон.

¹⁴Зәбулунның угыллары: Серед, Элон, Яхлел.

¹⁵Болар Ягъкубның Лия ягыннан туган угылларыдыр. Лия аларны һәм кызы Динәне Паддан-Арамда чакта тапты. Ягъкубның бу угыллары белән кызлары җәмгысы утыз өч җан иде.

¹⁶Гәднең угыллары: Сефон, Хәгги, Шуни, Эсбон, Эри, Аруди һәм Арели.

¹⁷Ашерның угыллары: Имна, Ишва, Ишви һәм Берига. Кыз кардәшләре — Серах. Бериганың угыллары: Хебер һәм Малкиел.

¹⁸Болар — Ягъкубның хатыны Лиягә атасы Лабан асрау кыз буларак ияртеп җибәргән Зилпә ягыннан туган балалардыр. Зилпә Ягъкубка җәмгысы уналты җан бала табып бирде.

¹⁹Ягъкубның хатыны Рахиләдән туган угыллары: Йосыф һәм Беньямин.

²⁰Мисырда Йосыфның Он шәһәре каһине Поти-Пераның кызы Асенаттан Менашше һәм Эфраим исемле ике углы туды.

²¹Беньяминнең угыллары: Бела, Бәхер, Ашбел, Гера, Нагаман, Эхи, Рош, Муппим, Хуппим һәм Ард.

²²Болар Ягъкубның Рахилә ягыннан туган угыллары һәм оныкларыдыр. Җәмгысы ундүрт җан.

²³Данның углы: Хушим.

²⁴Нәпталинең угыллары: Яхсиел, Гүни, Есер һәм Шиллем.

²⁵Болар Рахиләгә атасы Лабан ияртеп җибәргән асравы Билһаның угылларыдыр. Билһа Ягъкубка җәмгысы җиде бала табып бирде.

²⁶Угылларының хатыннарыннан башка, Ягъкуб токымыннан булган һәм аның белән берлектә Мисырга күчеп килгән кешеләр җәмгысы алтмыш алты җан иде. Болар һәммәсе Ягъкубның канкардәшләредер.

²⁷Йосыфның Мисырда туган угыллары икәүдер; Ягъкуб токымының Мисырдагы гомуми саны җитмеш җан тәшкил итә иде.

²⁸Ягъкуб, Яһүдәне Йосыф янына җибәреп, Гөшенгә бару юлын алдан белешеп куйган иде. Алар Гөшенгә килеп җитәрәк,

²⁹Йосыф та, арбасын җиктереп, атасы Исраилне каршылар өчен, Гөшенгә килде. Атасын күрүгә ул, атлыгып, аның муенына барып сарылды һәм кочагында бик озак үксеп елады.

³⁰— Инде үләргә дә була: йөзеңне күрдем, син исән! — диде Исраил Йосыфка.

³¹Йосыф үзенең кардәшләренә һәм атасының өй җәмәгатенә болай диде: — Мин, барып, фиргавенгә хәбәр ирештерим: «Кәнган җирләрендә яшәгән кардәшләрем белән атамның бөтен өй җәмәгате минем янга күчеп килделәр», — дип әйтим.

³²Аңа сезнең сарык асраучылар, көтүчеләр булуыгызны аңлатыйм. «Алар вак һәм эре терлектән барлык мал-туарларын, булган бар мөлкәтләрен үзләре белән алып килделәр», — дип әйтим.

³³Әгәр фиргавен, чакырып, сездән: «Шөгылегез нидән гыйбарәт?» — дип сораса,

³⁴сез әйтегез: «Ата-бабаларыбыз кебек, синең колларың без дә бала чагыбыздан бирле хайван асраучылык белән шөгыльләнәбез», — диегез. Бу сезгә Гөшен төбәгендә җирләшеп калу өчен кирәк. Чөнки мисырлылар көтүче халкын сөймиләр, мәкруһ саныйлар.