Read Изге Язма, 2015 Яратылыш 49 Bible Online

Яратылыш 49 - Изге Язма, 2015 bible

Яратылыш 49

¹Ягъкуб, угылларын янына җыеп, әйтте: «Бирегә җыелыгыз, сезне ниләр көтәсен әйтәчәкмен!

²Җыелыгыз, Ягъкубның угыллары, атагыз Исраилнең сүзен колак салып тыңлагыз!

³Рубин, өлкән углым! Син — минем кодрәтем, ирлек куәтемнең әүвәлге җимеше! Иң абруйлысы һәм көч-шөһрәттә иң беренчесе!

⁴Ләкин син — ташкын судай дуамал; беренчелек сиңа бүтән тимәячәк, чөнки син атаңның ятагына мендең, ятагымны хыянәтең белән нәҗесләдең.

⁵Бертуган кардәшләр Шимун белән Левинең кылычлары — дәһшәт коралыдыр!

⁶Уй-ниятләре мәкерледер — саклан, җаным! Алар җәмгыятеннән күңелем-тәнем ерак торсын! Ачу-үчтән үтерделәр алар ир-егетне һәм йөрделәр, кызык ясап, үгезләрнең сеңер-тамырларын кисеп.

⁷Нәфрәтле күңелләренә ләгънәт төшсен, ачулары — дәһшәтле, ярсулары — афәтледер! Нәселләрен Ягъкуб токымнары арасына чәчәрмен, исраилиләр арасына сибеп таратырмын!

⁸Яһүдә! Кардәшләрең сине данлар, мактар! Дошманнарың сыртында булыр синең кулың, кардәшләрең, буйсынып, сиңа баш иярләр!

⁹Яшь бер арысландыр син, Яһүдә углым! Менә син ау йөреп кайткансың да ата арыслан, ана арысландай җиргә чүккәнсең — арысланны борчырга кем соң җөрьәт итсен?!

¹⁰Хөкемдарлык тәхетеннән Яһүдә һич төшмәс! Хуҗасы [99] килгәнчегә кадәр, аның хөкемдарлык таягын кулдан ычкындырмас! Ил-халыклар аңа буйсынырлар.

¹¹Аның ишәгенең бәе — йөзем агачыдыр, ишәк колыннарының бәе — йөзем ботагы. Киемнәрен чайкар ул шәрабта, япанчасын юар йөзем канында.

¹²Шәрабтандыр аның куе-кучкыл күзләре, сөттәндер аның җете ап-ак тешләре.

¹³Зәбулун яшәр диңгез буе җирләрендә, диңгез көймәләре туктый торган ярда. Җирләренең чиге булыр Сидунгача.

¹⁴Исәсхәр — ияргә сала торган ике биштәр арасында яткан, көче-куәте ташып торган ишәккә тиң.

¹⁵Ялы-тынычлыгы өчен яхшы, күңеленә хуш бер җир күргәч, шунда ул, йөк ташырга сыртын куеп, авыр хезмәткә әзер булып яшәр.

¹⁶Дан, исраилиләрнең бер ыругы буларак, үз халкы өстеннән хөкем итәр.

¹⁷Дан — юл өстендә, сукмак буйларында сузылып яткан елан, зәһәр елан ул. Шундый елан ки, атның аягын чагып, җайдагы шундук аркасына егылып төшәдер.

¹⁸Йа Раббы, Синең коткаруыңа өмет баглыймын!

¹⁹Гәд һәрчак юлбасарлар һөҗүменә дучар булыр, әмма, һөҗүмне кире кагып, үзе һөҗүмгә күчәр.

²⁰Ашер иккән икмәк тук һәм мул булыр, тәмле ризыклары патшалар табынына куелыр.

²¹Нәптали — табигатьнең ирекле боланы, аның авызыннан хикмәтле сүзләр чыгар.

²²Йосыф — чишмә ярында үскән, җимешле, мул җимешле йөзем агачының бер тармагыдыр. Аның ботаклары диварларны каплап алган.

²³Аны күп бимазаладылар, аның белән дошманлаштылар, укчылар, аңа төбәп, уклар аттылар.

²⁴Әмма аның үз ук-җәясе куәтен киметмәде, беләкләре таза-нык, егәрле калды, чөнки кулларына көчне ул Исраилнең Көтүчесе һәм Кыяташы — Ягъкубның Кодрәт Иясеннән алды.

²⁵Атаңның Алласы сине ярдәмсез калдырмас, Кодрәт иясе фатихасыннан аермас! Югарыдан күкләрнең бәрәкәте, түбәннән төпсез упкыннар бәрәкәте, күкрәк сөте вә ана карыны бәрәкәте белән Ул сине мөбарәк кылыр.

²⁶Атаңның хәер-догасы борынгы таулар, борынгы калкулыклар бәрәкәтеннән артыграк. Бу бәрәкәтләрнең барчасын Йосыф углыма — кардәшләре арасында иң өстен торганына насыйп итсен!

²⁷Беньямин ерткыч бүре белән бер: иртәнге авын ашап бетерер, ә кичке ганимәтен [100] кисәкләп бүләр».

²⁸Исраил токымының унике ыругы менә шулардыр. Әлеге сүзләрне әйтеп, Исраил үз угылларының барысын мөбарәк кылды, һәркайсына тиешле үз фатихасын бирде.

²⁹ 29-30 Ягъкуб, үзенең угылларына боерыклар биреп, болай диде: — Озакламый мин халкымның ата-бабалары белән кушылачакмын. Мине ата-бабаларым янына — Кәнган җиренә, Мәмре янындагы Махпела кырында урнашкан мәгарәгә алып кайтып дәфен кылыгыз. Ул мәгарәне, каберлек өчен, шул кыр белән берлектә бабам Ибраһим хосусый милек итеп хитти Эфроннан сатып алган иде.

³¹Анда Ибраһим белән бергә аның җәмәгате Сара, Исхак белән аның җәмәгате Рәбика дәфен кылынган. Хатыным Лияне дә мин шунда дәфен кылдым.

³²Электә андагы бу кыр һәм мәгарә хиттиләр кулында иде.

³³Ягъкуб, үзенең угылларына җиткерәсе боерыкларын, васыятьләрен әйтеп бетереп, ятагына сузылып ятты һәм, җан тәслим кылып, үз халкының ата-бабалары белән кушылды.