Read Изге Язма, 2015 Яратылыш 8 Bible Online

Яратылыш 8 - Изге Язма, 2015 bible

Яратылыш 8

¹Ахырда Аллаһы, Нухны һәм аның белән бергә көймәдә булган барлык хайваннарны исенә төшереп, җир өстенә җил истерде. Суның артуы бетте.

²Күк капулары ябылып, төпсез упкыннар эченнән коеп яуган яңгыр туктады.

³Йөз дә илле көн кичкәннән соң, җир өстендәге сулар кими башлады.

⁴Җиденче айның унҗиденче көнендә көймә Арарат таулары түбәсенә утырды.

⁵Суның кимүе унынчы айга кадәр дәвам итте. Унынчы айның беренче көнендә тау башлары күренде.

⁶Кырык көн үткәч, Нух үзе ясаган көймәнең тәрәзәсен ачты.

⁷Тәрәзәдән бер козгынны тышка очырды. Козгын, җир өсте сулардан арынганга кадәр, бер очып китеп, бер очып кайтып йөрде.

⁸Җир өстеннән су китеп беткәнме-юкмы икәнен белер өчен, Нух күгәрченне очырды.

⁹Күгәрчен, аякларына кунар җир тапмыйча, Нух янына көймәгә кире әйләнеп кайтты; чөнки җир өстеннән су китеп бетмәгән иде әле. Нух, куллары белән тәрәзәдән сузылып, күгәрченне көймә эченә, үз янына алды.

¹⁰Нух тагын җиде көн узганны көтеп торды да күгәрченне янә тышка очырды.

¹¹Кичен күгәрчен, томшыгына яшь зәйтүн яфрагы эләктереп, кире кайтты. Шуңардан Нух җир өстендәге суларның кимегәнлеген белде.

¹²Җиде көн үткәннән соң, Нух күгәрченне тагын очырды. Бу юлы күгәрчен кире әйләнеп кайтмады.

¹³Нух гомеренең алты йөз дә беренче елында, беренче айның беренче көнендә җир өстендәге сулар китеп бетте. Нух көймәнең түбәсен ачып карады һәм җирнең коры икәнлеген күрде.

¹⁴Икенче айның егерме җиденче көнендә туфрак тәмам кипте.

¹⁵15-16 Аллаһы Нухка: — Хатының, угылларың һәм киленнәрең белән бергә көймәдән чык, — диде. —

¹⁷Синең белән бергә яныңдагы барлык төр җан ияләре: кошлар, хайваннар, җир өстендә сөйрәлүче хәшәрәтләр — һәммәсе көймәдән чыксыннар; чыгып, җир йөзенә таралсыннар, үрчеп, ишәеп, җир өстен тутырсыннар.

¹⁸Нух үзенең хатыны, угыллары һәм киленнәре белән бергә көймәдән чыкты.

¹⁹Җир йөзендә хәрәкәт итүче төрле токымдагы барлык җан ияләре — хайваннар, кошлар, хәшәрәтләр көймәне ташлап чыктылар.

²⁰Раббы хөрмәтенә Нух бер мәзбәх корды һәм, чиста саналган хайван һәм кошлар арасыннан берничәсен сайлап алып, ут өстендә яндырып корбан китерде.

²¹Хуш истән күңеле булган Раббы үзалдына әйтте: — Кешеләр аркасында җир йөзен бүтән нәгъләтләмәячәкмен, — диде. — Чөнки кешенең йөрәгендә туа торган явызлыклар аның балачагыннан ук килә; инде терек дөньяны, бу юлы эшләгәнем кебек, кабат үлемгә дучар итмәячәкмен.

²²Дөньяның киләчәк яшәешендә чәчү дә, уру да булыр, суык та, эссе дә булыр, җәй дә, кыш та булыр, көн дә, төн дә булып торыр.