Read Изге Язма, 2015 Яратылыш 9 Bible Online

Яратылыш 9 - Изге Язма, 2015 bible

Яратылыш 9

¹Аллаһы Нухны һәм аның угылларын мөбарәк кылып әйтте: — Үрчегез, ишәегез, җир йөзен тутырыгыз! — диде. —

²Җирдәге хайваннар, күктәге кошлар, җир өстендә сөйрәлүче барлык хәшәрәтләр, диңгездәге балыклар — һәммәсе сездән куркып-калтырап торсыннар. Барысын да сезнең хөкемгә тапшырам.

³Җирдә хәрәкәт иткән һәрбер җанлы нәрсә, яшел чирәм кебек үк, сезнең өчен ризык булыр; аларның һәммәсен сезгә бирәм.

⁴Әмма канлы итне, ягъни җаны бар итне ашамагыз!

⁵Сезнең җаныгыз яшерелгән үз каныгыз түгелсә дә, гаеплене Мин җавапка тартачакмын. Һәр хайваннан хисап алачакмын. Кешенең җанына кул сузган һәр бәндәдән үч алачакмын.

⁶Кеше канын койган адәмнең үз каны да кеше кулыннан коелыр. Чөнки кешене Аллаһы Үз сурәтендә яратты.

⁷Үрчегез, ишәегез; җир йөзенә сибелеп, артканнан-арта барыгыз!

⁸Нухка һәм аның угылларына Аллаһы болай диде:

⁹ 9-10 — Менә, Мин сезнең белән һәм сездән соң туачак нәсел-нәсәбегез, шулай ук сезнең янда булган барлык җан ияләре — кошлар, терлекләр, кыргый хайваннар һәм көймәдән чыкканнарның барчасы белән килешү төзим.

¹¹Минем бу килешүем буенча, моннан соң бернинди җан иясе дә туфан суларында һәлак булмаячак, җир йөзен суга батырган туфан бүтән беркайчан да кабатланмаячак.

¹² 12-13 Аллаһы Үзенең сүзен дәвам итте: — Минем белән сезнең арада, Минем белән сездән соңгы нәсел-нәсәбегез, һәрбер җан иясе арасында — Минем белән җир арасында төзелгән килешүемнең мәңгелек галәмәте итеп, Мин болыттан җиргә таба салават күпере сузам.

¹⁴Җир йөзенә яңгыр болыты җибәреп, болыттан җиргә таба салават күпере сузылуга,

¹⁵Мин сезнең белән, барлык җан ияләре белән ике арада төзелгән килешүемне хәтеремә төшерермен һәм терек дөньяны юк итәрдәй туфан сулары ташуына беркайчан да юл куймам.

¹⁶Болыттан җиргә таба сузылган салават күпере калкуга, Мин, аны күреп, җир йөзендәге барлык җан ияләре белән төзегән мәңгелек килешүемне хәтергә төшерәчәкмен.

¹⁷Аллаһы Нухка: — Минем белән җир йөзендәге барлык терек җан ияләре арасында төзелгән килешүемнең галәмәте менә шулдыр, — диде.

¹⁸Нухның көймәдән чыккан өч углының исемнәре Шем, Хам вә Яфет булып, Хам дигәне Кәнганга ата тиешле иде.

¹⁹Кешелек дөньясы, шушы өч угылдан яралып, бөтен җир өстенә таралган иде.

²⁰Нух, җир эшкәртә башлап, әүвәл йөзем агачлары утыртты.

²¹Беркөнне, шәраб эчеп исергәч, ул үзенең чатырында шәп-шәрә килеш йокларга ятты.

²²Хам, Кәнганның атасы, үз әтисенең шәп-шәрә йоклап ятуын күреп, чатырдан чыкты да моны ике туганына сөйләде.

²³Шем белән Яфет, өс киеменнән нәрсәләрнедер иңбашларына салып, арт белән чигенә-чигенә чатыр эченә керделәр дә әтиләренең өстенә яптылар. Арт белән чигенеп кергәнлектән, алар Нухның шәрә икәнлеген күрмәделәр.

²⁴24-25 Нух, шәрабтан айнып, йокысыннан уянгач, кече углының ни эшләгәнен белде дә әйтте: «Ләгънәт төшсен Кәнганга, колларның колы булсын кардәшләренә!»

²⁶Аннары өстәде: «Мөбарәк булсын Шемның Раббы Алласы, Кәнган исә Шемга кол булсын!

²⁷Аллаһы Яфетка киңлек бирсен; Шемның чатырларында яшәсен, Кәнган исә Яфетка кол булсын!»

²⁸Туфаннан соң Нух тагын өч йөз дә илле ел яшәде.

²⁹Нух барлыгы тугыз йөз дә илле ел яшәп вафат булды.