Read Изге Язма, 2015 II Патшалар 22 Bible Online

II Патшалар 22 - Изге Язма, 2015 bible

II Патшалар 22

¹Раббы Давытны барча дошманнарыннан һәм Шаулдан коткарган көнне Давыт Раббыга җыр багышлады. Аның җыры мондый иде:

²Раббы — Кыям минем, Ныгытмам һәм Йолучым!

³Аллам — сыендыручы Кыяташым, Калканым, коткаручы Коралым, Кальгам вә Сыеныр урыным! Коткаручым, Син мине залимнәр кулыннан йолып алдың!

⁴Раббы мактауга лаектыр! Мин Аңа ялварып дәшәм, һәм Ул мине дошманымнан азат итә.

⁵Үлем дулкыннары биләп алган иде мине, һәлакәтле ташкыннар өстемә ябырылган иде.

⁶Үлеләр дөньясының зынҗырлары урап алган, әҗәл ятьмәләре чолгаган иде мине.

⁷Бәлага тарыгач, мин Раббыга дәштем, ярдәмгә үземнең Алламны чакырдым. Үз йортыннан Ул мине ишетте, зарлы авазым Аңа барып иреште.

⁸Шуннан Раббының ачуы кабарды: җир йөзе селкенә-тетри башлады, күкнең нигезләре чатнап кубарылды.

⁹Раббының борын тишекләреннән — төтен, авызыннан исә бар нәрсәне ялмап алучы утлар бөркелде, Аңардан ялкынлы күмерләр шартлап чәчрәде.

¹⁰Күкләрне янтайтып Раббы түбән төште, Аның аяк асты тоташ караңгылык иде.

¹¹Керубимнәрнең аркасына утырып очты Ул, җил канатларында алга омтылды.

¹²Караңгылыкка төренеп, куе-кара болытлардан Үзенә чатыр корды.

¹³Аның хозурындагы балкыштан боз вә утлы күмерләр яуды.

¹⁴Раббы күкләрне гөрселдәтте, Аллаһы Тәгалә Үзенең авазын ирештерде.

¹⁵Уклар атып таратты дошманны, яшеннәр чатнатып тар-мар китерде.

¹⁶Раббының дәһшәтле авазыннан, борыны бөркегән сулышыннан диңгез төпләре күренде, дөньяның нигезләре ачылды.

¹⁷Югарыдан сузылып Раббы кулымнан алды, тирән сулар эченнән тартып чыгарды;

¹⁸Көчле дошманымнан, мине күрәлмаучы, миннән куәтлерәк бәндәләрдән коткарды-аралады мине.

¹⁹Афәтле көнемдә алар юлыма төшкәннәр иде, әмма Раббы миңа терәк булды.

²⁰Ул мине иркенлеккә алып чыкты, коткарды, чөнки мин Аның күңеленә хуш килдем.

²¹Тәкъвалыгым өчен Раббы миңа әҗерен бирде, кулларым пакьлеге өчен бүләкләде.

²²Чөнки мин Раббы юлында йөрдем, Аллаһыдан йөз чөереп яман эш кылмадым.

²³Аның бөтен карарларын күз уңында тоттым, Канун кагыйдәләреннән читкә тайпылмадым.

²⁴Каршында һәрчак ихлас-саф булдым, гөнаһ эш кылудан сакландым.

²⁵Аның алдында тәкъвалыгымны, пакьлегемне күреп, Раббы миңа әҗерен кайтарды.

²⁶Тугры кешегә Син тугрысың, күңеле керсезгә мөгамәләң керсездер.

²⁷Пакь кешегә пакьлек кыласың, хәйләкәргә исә хәйлә корасың.

²⁸Мазлумнарны [14] Син яклыйсың, карашың белән тәкәббернең башын түбән идерәсең.

²⁹Шәм-чырагым — Синдер, Раббым! Караңгылыгымны Раббы яктырта!

³⁰Аллаһы ярдәме белән мин дошман яуларын җиңәм, Аның ярдәме белән диварларны кичәм.

³¹Аллаһының юлы кимчелексез, әйткән сүзе саф-пакьтер! Аңа сыгынган һәр кеше өчен калкан Ул!

³²Раббыдан башка тагын берәр алла бармы?! Аллабыздан башка икенче бер кыяташ бармы?!

³³Аллаһы — миңа көч-куәт бирүче, барыр юлымны хәвефсез кылучы.

³⁴Аякларымны боланныкыдай җитез кыла, биеклекләрдә мине тотрыклы итә.

³⁵Кулларымны сугыш һөнәренә өйрәтә, бакыр җәядән ук атарга көч бирә.

³⁶И Раббым, Син миңа коткаручы калканыңны бирдең, Синең ярдәмең мине биекләргә күтәрә.

³⁷Син минем барыр сукмагымны киңәйтәсең, аякларым шуңа ышанычлы атлый.

³⁸Эзәрлекли барып, дошманымны тар-мар иттем, кырып бетермичә кире борылмадым.

³⁹Шундый итеп тукмадым, издем ки, җирдән калыкмас иттем — аяк астында ятып калдылар.

⁴⁰Сугышыр өчен миңа көч бирдең Син, миңа каршы чыкканнарны аягым астына салдың.

⁴¹Дошманнарны борылып качарга мәҗбүр иттең Син — миңа үчлеләрне шулай тар-мар иттем.

⁴²Ярдәмгә чакырдылар, тик аларга котылу насыйп булмады, Раббыга ялвардылар, тик Ул жавап бирмәде.

⁴³Мин аларны җирдәге тузан кебек туздырып аттым, урам пычрагыдай таптап-издем.

⁴⁴Халык фетнәсеннән мине Син коткардың, кавемнәр өстеннән мине баш итеп калдырдың — мин белмәгән кабиләләр миңа хезмәт итә.

⁴⁵Каршымда билләрен бөгәләр, тавышымны ишетүгә, буйсыну белдерәләр.

⁴⁶Рухлары сынып, калтыранып кальгаларыннан чыгалар.

⁴⁷Раббы — тере Заттыр! Минем Кыяма мактау-шөкерләр яусын! Мине коткаручы Кыя, минем Аллам күкләргә күтәреп макталсын!

⁴⁸Ул — минем өчен Үч алучы, чит кавемнәрне миңа Буйсындыручы,

⁴⁹мине дошманнарымнан Йолып алучы, миңа каршы чыгучылардан мине Өстен итүче, залимнәрдән Коткаручы.

⁵⁰Шуның өчен, и Раббы, чит кавемнәр алдында Сиңа рәхмәтләр укырмын, исемеңә мәдхияләр җырлармын!

⁵¹Үзең куйган патшага Син бөек җиңүләр насыйп итәсең, Май сөрткән затың Давытка һәм аның нәсел-нәсәбенә мәңгелек мәрхәмәтеңне күндерәсең.