Read Изге Язма, 2015 II Патшалар 23 Bible Online

II Патшалар 23 - Изге Язма, 2015 bible

II Патшалар 23

¹Аллаһы югары күтәргән, Ягъкуб Алласы сайлаган затның — Исраилнең гүзәл тавышлы җырчысы Ишай углы Давытның соңгы сүзләре шушыдыр:

²«Раббы Рухы минем аша сөйли, телемдә — Аның сүзләредер.

³Исраил Алласы, Исраилнең Кыясы минем хакта болай дип әйтте: „Халыклар өстеннән гаделлек белән, Аллаһыдан куркып хакимлек итүче

⁴иртәнге нурга, аяз иртәдә калыккан кояшка, яңгырдан соң шытып чыккан үлән җемелдәвенә тиң“.

⁵Аллаһы каршында минем йорт-гаиләм әллә шундый түгелме?! Аллаһы минем белән мәңгегә килешү төзеде, һәм бу килешү какшамас вә ышанычлыдыр. Ул мине һәрчак коткара һәм теләгәнемне бирә.

⁶Явыз кешеләр исә читкә ташланган чәнечкеле куак кебек булыр — ул куакны беркем кулына алмас,

⁷кагыла калса да, кулына тимер кисәге яисә сөңге сабы алыр. Аны үсеп утырган урынында ук утка салалар».

⁸Менә Давыт гаскәрендәге батыр сугышчыларның исемнәре: тахкемони Йошеб-Башшебет — өч баһадирдан торган төркемнең башлыгы. Ул, сигез йөз кешегә каршы сөңгесен күтәреп, аларны бер алышуда тар-мар иткән баһадирдыр.

⁹Аңардан соң Өч каһарманның берсе — Ахуах нәселеннән Доду углы Элгазар. Сугышырга әзерләнгән пелештиләрне мәсхәрәләп көлгәндә, ул шунда, Давыт янында иде. Бу сугышта исраилиләр чигенергә мәҗбүр булды,

¹⁰Элгазар исә урынында торып калды — кулының хәле бетеп кылычына ябышып калганчы, пелештиләрне кырды. Ул көнне Раббы шулай Исраилгә бөек җиңү алып килде. Исраил гаскәриләре Элгазар янына сугыш беткәннән соң әйләнеп кайтты, анда да мәетләрне талар өчен генә.

¹¹Аннары Әге углы, һарарлы Шамма. Пелештиләр, Лехи шәһәре тирәсендәге ясмык басуы янында исраилиләргә һөҗүм итеп, исраилиләр пелештиләрдән кача башлагач,

¹²Шамма, басу уртасына чыгып, басуны да саклап кала, пелештиләрне дә тар-мар китерә, һәм ул көнне Раббы Исраилгә бөек җиңү бүләк итә.

¹³Бервакыт шулай, уракка төшәр алдыннан, пелештиләр Рефаим үзәненә килеп тупландылар. Ул чакны Утыз башлык арасыннан әлеге өчесе Давыт янына Адуллам мәгарәсенә килде.

¹⁴Давыт ныгытма эчендә, ә пелешти сугышчылары Бәйт-Лехемдә иде.

¹⁵Шунда Давыт бик нык сусап: — Бәйт-Лехем капкасы янындагы коедан берәрсе эчәремә су алып килсә иде, — диде.

¹⁶Әлеге өч батыр, пелештиләр станы аша сугышып үтеп, Бәйт-Лехем капкасы янындагы коедан Давытка су алып килеп бирде. Әмма Давыт әлеге судан баш тартты, ул аны Раббыга бүләк итеп җиргә койды.

¹⁷— Бу суны эчүдән мине Раббы сакласын! Тормышларын куркыныч астына куеп, миңа су алып кайтканнарның каны түгелмени бу?! — диде ул һәм суны эчәргә теләмәде. Менә ни-нәрсәләр эшләде әлеге өч батыр!

¹⁸Йоавның кардәше, Сәрүя углы Әвишәй, Өч каһарманның башлыгы иде. Бервакыт ул, өч йөз кешегә каршы сөңгесен күтәреп, аларны кырып бетерде һәм әлеге Өч каһарман сыман дан яулады.

¹⁹Әвишәй, шул Өч каһарманнан мәртәбәлерәк булып, аларның башлыгына әйләнде, гәрчә аларның берсе булмаса да.

²⁰Кабсеһел каласыннан Еһояда углы Бенаяһ зур батырлыклар кылган гаярь сугышчы иде. Ул мәабиләрнең иң көчле ике сугышчысын үтерде. Икенче бервакытны кышкы карлы көндә, чокырга төшеп, бер арысланны үтерде.

²¹Аннары ул алыптай бер мисырлының җанын кыйды: сөңге тоткан мисырлы каршына Бенаяһ таяк тотып китте һәм, тегенең сөңгесен тартып алып, мисырлының үз коралы белән аның үзен үтерде.

²²Еһояда углы Бенаяһ әнә шундый батырлыклар эшләде. Ул да, алдагы Өч каһарман сыман, зур дан-шөһрәт казанган кеше иде.

²³Утыз башлык арасында иң мәртәбәлесе булып, ул теге Өч каһарманның берсе түгел иде. Давыт аны үзенең җансакчылар башлыгы итеп куйды.

²⁴Шул Утыз гаскәри арасында түбәндәгеләр бар иде: Йоавның кардәше Асаһел, Бәйт-Лехемнән Доду углы Элханан,

²⁵хародлы Шамма, хародлы Элыйка,

²⁶пелетле Хелес, тыкуалы Иккыш углы Гыйра,

²⁷анатотлы Абигызер, хушалы Мебуннай,

²⁸Ахуах нәселеннән Салмон, нетофалы Маһрай,

²⁹нетофалы Багъна углы Хелеб, Беньямин җирендәге Гибгадан Рибай углы Иттай,

³⁰пиргатонлы Бенаяһ, Гәгаш үзәненнән Һиддай,

³¹арбаһи Аби-Албон, бахуримлы Азмавет,

³²шагалбимле Эльяхба, Яшән угыллары һәм Йонатан,

³³һарарлы Шамма, арарлы Шарар углы Ахиам,

³⁴мәгакәһи Ахасбай углы Элифелет, гилолы Ахитофел углы Элигам,

³⁵кәрмилле Хесро, араблы Пагарай,

³⁶собалы Натан углы Игәл, Гәд нәселеннән Бани,

³⁷аммони Селык, Сәрүя углы Йоавның корал йөртүчесе беһеротлы Нахрай,

³⁸итри Гыйра, итри Гәреб,

³⁹хитти Урия. Җәмгысы утыз җиде гаскәри.