Read Изге Язма, 2015 II Патшалар 24 Bible Online

II Патшалар 24 - Изге Язма, 2015 bible

II Патшалар 24

¹Бервакыт Исраил халкына Раббының кабат ачуы кузгалды, һәм Ул, Давытны исраилиләргә каршы котыртып, аңа: — Бар, Исраил вә Яһүдә халкының исәбен ал! — диде.

²Давыт үзенең гаскәр башлыгы Йоавка: — Кайда күпме халык яшәгәнен белер өчен, Даннан алып Беер-Шебага кадәр Исраилнең бөтен ыругларын йөреп чыгып, халыкның исәбен алыгыз, — дип боерды.

³Әмма патшага Йоав: — Синең Раббы Аллаң халык санын тагын йөз тапкырга ишәйтсен, һәм әфәндем патшага моны үз күзләре белән күрергә язсын иде! Ләкин әфәндем патшага бу ни өчен кирәк?! — дип җаваплады.

⁴Тик патша үз сүзендә нык торды, һәм Йоав белән гаскәр башлыклары, патша хозурыннан чыгып, Исраил халкының исәбен алырга дип киттеләр.

⁵Алар, Үрдүнне кичеп, Гәд үзәненең урта бер җирендә урнашкан Арогыр шәһәренең уң ягына җитеп тукталдылар, шуннан соң Ягызер шәһәре аша үттеләр дә

⁶Гилыгад төбәгенә, аннан Тахтим-Ходши җиренә юнәлделәр; аннары Дан-Яган шәһәренә, Сидун чигенә җиттеләр.

⁷Шуннан Сур кирмәненә һәм хиввиләр белән кәнганиләрнең барлык шәһәрләренә таба киттеләр. Ахырдан Яһүдәнең көньягындагы Беер-Шебага килеп җиттеләр.

⁸Тугыз ай да егерме көн дигәндә алар, бөтен илне әйләнеп чыгып, кабат Иерусалимгә әйләнеп кайттылар.

⁹Йоав халыкның исәбен патшага җиткерде; исемлек буенча исраилиләрдә — сигез йөз мең, яһүдиләрдә исә сугышка яраклы, көчле биш йөз мең ир-егет булуы ачыкланды.

¹⁰Әмма халык исәбен алганнан соң, Давыт, намусына көч килеп, Раббыга: — Әлеге гамәлем белән мин гөнаһ эш кылдым; шуның өчен бүген мин Сиңа, колыңның гөнаһын кичер, дип ялварам, чөнки зур ахмаклык эшләдем, — диде.

¹¹Икенче көнне иртән Давыт йокыдан торуга Давыт хезмәтендәге гаиптән хәбәр [15] бирүчегә, пәйгамбәр Гәдкә Раббы сүзе иңде:

¹²— Давытка, барып, минем сүзләремне җиткер: «Раббы болай дип әйтә, диген: „Мин сиңа өч төрле җәза тәкъдим итәм, шуларның берсен үзең сайлап ал“».

¹³Гәд, Давыт янына килеп, боларның һәммәсен аңа җиткерде. Гәд болай диде: — Әлеге җәзаларның берсен сайлап ал: илеңә җиде ел буе тоташтан ачлык килсенме, яисә сине эзәрлекләгән дошманнарыңнан өч ай буе качып йөрисеңме, әллә инде илеңдә өч көн дәвамында халык үләт зәхмәтеннән кырылсынмы? Хәзер уйла да хәл ит: мине бирегә җибәргән Раббыга нинди җавап бирергә тиешмен?

¹⁴Гәдкә Давыт болай дип җавап кайтарды: — Миңа бик авырдыр, ләкин адәм кулыннан җәза алганчы, Раббы кулыннан җәза күрүең хәерлерәк, чөнки Аның рәхим-шәфкате чиксездер.

¹⁵Шуннан Раббы, шул көннең иртәсеннән алып билгеләнгән вакыт тәмамланганчы, исраилиләргә үләт зәхмәте җибәрде, һәм Даннан алып Беер-Шебага кадәр җитмеш мең кешенең гомере киселде.

¹⁶Халыкны кырып баручы фәрештә Иерусалим каласына таба кулын сузгач, Раббы, җәза бирүдән баш тартып, фәрештәгә: — Җитәр, төшер кулыңны! — диде. Бу вакытта Раббы фәрештәсе явүси Орна ындыры янына җиткән иде.

¹⁷Халыкны кырып баручы фәрештәне күргәч, Давыт Раббыга: — Гөнаһлы мин: яманлык кылдым! Бу кешеләр, Синең сарыкларың, бернинди начарлык эшләмәде ич. Синең җәзаң миңа һәм атам гаиләсенә төшсен, — диде.

¹⁸Ул көнне Давыт янына Гәд килеп: — Бар, явүси Орна ындырында Раббыга мәзбәх кор! — диде.

¹⁹Давыт шулай Гәд аша Раббы кушканны эшләргә китте.

²⁰Үзенә таба килүче патшаны, аның хезмәтчеләрен күреп, Орна алар каршына чыкты һәм патша алдында җиргә кадәр башын иде,

²¹аннары аңардан: — Әфәндем патша үзенең колы янына ни йомыш белән килде? — дип сорады. Давыт аңа: — Халык үләт зәхмәтеннән кырылмасын өчен, Раббыга мәзбәх төзергә синең ындырыңны сатып алмакчы булам, — дип җавап бирде.

²²— Әфәндем патша корбан китерү өчен җаны теләгәнне алсын. Менә сиңа тулаем яндыру корбаны өчен үгезләр, ә ашлык сугу җайланмасы һәм үгез җигү кирәк-яраклары утын булыр.

²³Мин, Орна, боларның һәммәсен патшага тапшырам, — диде Орна һәм, — Раббы Аллаң синнән разый булсын! — дип өстәде.

²⁴Әмма патша аңа: — Юк, боларның һәммәсе өчен мин сиңа тиешле бәясен түлим, бушка килгән әйберне мин Раббы Аллама корбан китерә алмыйм, — дип җавап кайтарды һәм, илле шәкыл [16] көмеш түләп, ындыр белән үгезләрне сатып алды.

²⁵Аннары Давыт шул урында Раббыга багышлап мәзбәх корды һәм Аңа тулаем яндыру корбаны белән татулык корбаны китерде. Раббы, Давытның Исраил хакындагы ялыну-ялваруларына җавап итеп, Исраил илендә үләт зәхмәтен туктатты.