Read Изге Язма, 2015 II Патшалар 9 Bible Online

II Патшалар 9 - Изге Язма, 2015 bible

II Патшалар 9

¹Беркөн Давыт: — Шаул гаиләсеннән кем дә булса исәнме әле? Мин аңа Йонатан хакына игелек кылыр идем, — диде.

²Шаул йортында Сиба исемле хезмәтчеләр башлыгы бар иде. Аны Давыт янына чакырып китерделәр, һәм патша аңардан: — Сиба атлы кеше син буласыңмы? — дип сорады. — Мин ул, синең колың, — дип җаваплады теге.

³— Шаул гаиләсеннән тагын кем дә булса исәнме? — дип сорады Давыт. — Мин аңа Аллаһы мәрхәмәтенә тиң мәрхәмәт күрсәтердәй берәрсе бармы? — Йонатанның ике аягына да аксак углы бар, — дип җавап кайтарды Сиба.

⁴— Кайда ул? — дип сорады аңардан патша. — Ло-Дебарда ул, Аммиел углы Макир гаиләсендә, — диде Сиба.

⁵Шуннан Давыт үзенең кешеләрен Ло-Дебарга юллап, алар Аммиел углы Макир гаиләсеннән Йонатанның углын алып кайттылар.

⁶Шаулдан туган Йонатанның углы Мепибошет, Давыт янына килеп, йөзе белән җиргә капланды. — Мепибошет! — дип дәште аңа Давыт. — Мин ул, синең колың, — дип җаваплады теге.

⁷— Курыкма, — диде аңа Давыт, — атаң Йонатан хакына мин сине мәрхәмәтемнән аермам, бабаң Шаулның бөтен басу-кырларын мин сиңа кире кайтарырмын, һәм син һәрвакыт минем табынымнан ризыкланырсың.

⁸Мепибошет, башын иеп, болай диде: — Миңа, эт үләксәсенә тиң затка, шулай игелек күрсәтергә кем әле мин ул кадәр?!

⁹Аннары патша, Шаул хезмәтчесе Сибаны чакырып: — Шаулның һәм аның гаиләсенең барлык мал-мөлкәтен әфәндең Шаул оныгына тапшырам.

¹⁰Димәк ки, әфәндеңнең оныгы ризыктан өзелмәсен өчен, син үзең, синең угылларың вә хезмәтчеләрең Мепибошетның җирен эшкәртергә һәм уңышны җыеп алырга тиеш булырсыз; әфәндеңнең оныгы Мепибошет үзе һәрвакыт минем табынымнан ризыкланыр, — диде. Әлеге Сибаның унбиш углы һәм егерме хезмәтчесе бар иде.

¹¹Патшага Сиба: — Синең колың патша әфәнденең боерыгын җиренә җиткереп үтәр, — дип җаваплады. Шулай итеп, Мепибошет, патша углы кебек, Давыт өстәленнән тукланды.

¹²Мепибошетның Микә исемле кечкенә углы бар иде. Сиба йортында яшәүчеләрнең һәммәсе Мепибошетның хезмәтчеләре саналды.

¹³Ике аягына да аксак Мепибошет Иерусалимдә яшәде һәм һәрвакыт патша белән бер табыннан тукланды.