Read Изге Язма, 2015 III Патшалар 16 Bible Online

III Патшалар 16 - Изге Язма, 2015 bible

III Патшалар 16

¹Шуннан Багша хакында Ханани углы Еһүгә Раббы сүзе иңде.

²— Мин сине, юктан бар кылып, Үз халкым Исраилнең хакиме итеп куйдым, — диде Раббы, — син исә Яробам юлыннан киттең. Минем халкым Исраилне гөнаһ кылуга этәреп ачуымны чыгардың.

³Шуның өчен Багшаның үзен вә аның йортын Мин зил-зәбәр китерәчәкмен, Небат углы Яробамның йортын нишләткән булсам, синең йортың белән дә шуны ук кылачакмын.

⁴Багша ыругыннан кем дә булса калада җан тәслим кылса, аны этләр ботарлар, кырда үлеп калганын исә күк кошлары чукып бетерер.

⁵Багша патшалык иткән чордагы башка вакыйгалар, ул башкарган бөтен эшләр һәм күрсәткән батырлыклар Исраил патшаларының елъязмасында бәян ителгән.

⁶Багша, дөнья куеп, Тирса каласында гүргә иңдерелде. Аның урынына тәхеткә углы Элаһ килде.

⁷Әмма Раббы күзенә ятышсыз күренгән гамәлләр кылып, Аның ачуын чыгарган һәм Яробам йортына ияреп хилаф эшләр башкарган, шулай ук Яробам йортын тар-мар китергән өчен, Багшаның үзе вә аның йорты турында Раббы пәйгамбәре Ханани углы Еһү аша җиткергән сүзләре әйтеп куелган иде инде.

⁸Яһүдә патшасы Аса хакимлегенең егерме алтынчы елында Багша углы Элаһ, Исраил өстеннән патша булып, Тирсада тәхеткә утырды һәм ике ел дәвамында патшалык итте.

⁹Аның хезмәтчеләреннән Зимри исемле берәү — сугыш арбаларының яртысы белән җитәкчелек итүче адәм — аңа каршы фетнә оештырды: Элаһ Тирсадагы патша сарае башлыгы Арса йортында эчеп исергәч,

¹⁰Зимри шунда килеп керде дә аны үтерде. Бу хәл Яһүдә патшасы Аса хакимлегенең егерме җиденче елында булды. Элаһ урынына тәхеткә Зимри утырды.

¹¹Патшалыкны кулына төшереп тәхеткә менеп утыруга, Зимри, Багша йортының бер генә ир-ат затын да калдырмыйча, бөтенесен кырып бетерде. Шулай ук аның бөтен туган-тумачалары һәм дусларының да башына җитте.

¹²12-13 Багшаның йортын Зимри тулысынча юкка чыгарды, һәм бу хәл Багша үзе һәм аның углы Элаһ кылган барлык гөнаһлар өчен һәм шул хилаф эшләре белән Исраил халкын да гөнаһ юлына этәргән һәм үзләренең файдасыз сыннары белән Раббының — Исраил Алласының ачуын чыгарган өчен, Раббының Багша турында Еһү пәйгамбәр аша җиткергән сүзләренең тормышка ашуы иде.

¹⁴Элаһ патшалык иткән чордагы башка вакыйгалар, ул башкарган бөтен эшләр Исраил патшаларының елъязмасында бәян ителгән.

¹⁵Яһүдә патшасы Аса хакимлегенең егерме җиденче елында тәхеткә Зимри килеп Тирсада җиде көн патша булып торды. Ул көннәрдә Исраил гаскәренең пелештиләр шәһәре Гиббетонны камалышта тоткан вакыты иде.

¹⁶Шәһәрне камап алган исраилиләр, Зимринең фетнә оештырып патша җанын кыюын белгәннән соң, шул көнне үк үзләренең станында яубашы Омрине Исраил патшасы дип игълан иттеләр.

¹⁷Шуннан Омри һәм аның белән бергә бөтен исраилиләр, Гиббетонны ташлап, Тирса каласын камап алдылар.

¹⁸18-19 Зимри исә, шәһәрнең алынганын күреп, патша сарае кальгасына кереп бикләнде һәм үзе артыннан патша сараена ут төртте. Гөнаһ эшләр эшләгән, Раббы күзенә ятышсыз күренгән гамәлләр кылган һәм, Яробам юлыннан китеп, шул хилаф эшләре белән Исраил халкын да гөнаһ юлына этәргән өчен, ул шунда әҗәлен тапты.

²⁰Зимри патшалык иткән чордагы башка вакыйгалар, ул оештырган фетнә хакында Исраил патшаларының елъязмасында бәян ителгән.

²¹Шул вакытны Исраил халкы икегә бүленде: аның бер яртысы тәхеткә Гинат углы Тибнине утыртмакчы булды, икенче яртысы исә Омри ягына чыкты.

²²Ахырда Омри яклы халык Гинат углы Тибни теләктәшләрен җиңеп чыкты, һәм, Тибни җан тәслим кылып, патша тәхетенә Омри утырды.

²³Яһүдә патшасы Аса хакимлегенең утыз беренче елында Исраил тәхетенә Омри утырды һәм унике ел дәвамында патша булып торды. Шуның алты елын ул Тирсада патшалык итте.

²⁴Шулай бервакыт Омри, ике талант көмеш бәрабәренә Самар атлы берәүдән Самарея калкулыгын сатып алып, шунда шәһәр төзетте һәм калкулыкның элекке хуҗасы Самар хөрмәтенә әлеге шәһәргә Самарея дип исем кушты.

²⁵Әмма Омри, Раббы күзенә ятышсыз күренгән гамәлләр кылып, үзенә кадәр булганнарның барсына караганда да күбрәк явызлык эшләде.

²⁶Ул, Небат углы Яробам юлыннан китеп, үзенең хилаф эшләре белән Исраил халкын гөнаһ юлына этәрде, файдасыз сыннары белән Раббының — Исраил Алласының ачуын чыгарды.

²⁷Омри патшалык иткән чордагы башка вакыйгалар, ул башкарган бөтен эшләр һәм күрсәткән батырлыклар Исраил патшаларының елъязмасында бәян ителгән.

²⁸Омри, дөнья куеп, Самареядә гүргә иңдерелде. Аның урынына тәхеткә углы Ахаб килде.

²⁹Омри углы Ахаб Исраил тәхетенә Яһүдә патшасы Аса хакимлегенең утыз сигезенче елында килде һәм Исраил өстеннән Самареядә егерме ике ел дәвамында патша булып торды.

³⁰Раббы күзенә ятышсыз күренгән гамәлләрне Омри углы Ахаб үзенә кадәр булганнарның барысына караганда да күбрәк эшләде.

³¹Небат углы Яробам кылган гөнаһ эшләрне кабатлап кына калмыйча, ул, Сидун патшасы Этбагалның Изебел атлы кызын хатынлыкка алып, Багалга табына һәм гыйбадәт кыла башлады.

³²Самареядә Багалга багышлап төзеткән гыйбадәтханәдә мәзбәх эшләтте.

³³Ахаб шулай ук Аширәгә табыныр өчен махсус багана утыртты. Шул рәвешле, Ахаб Исраил Алласы Раббының ачуын кабартырдай хилаф эшләрне үзенә кадәр булган бөтен Исраил патшаларына караганда да күбрәк кылды.

³⁴Ахаб идарәсе чорында Бәйт-Эл каласыннан Хиел атлы берәү өр-яңадан Әрихә шәһәрен тергезде: шәһәр нигезен ул беренче углы Абирамның җаны бәрабәренә салды, ә шәһәр капкасын төпчек углы Сигүвнең җаны бәрабәренә куйды. Һәм бу — Нун углы Ешуа аша Раббы әйткән сүзләрнең тормышка ашуы иде.