Read Изге Язма, 2015 III Патшалар 4 Bible Online

III Патшалар 4 - Изге Язма, 2015 bible

III Патшалар 4

¹Шул рәвешле Сөләйман бөтен Исраил җиренең патшасы булды.

²Аның кул астында эшләүче башлыклар түбәндәгеләр иде: Садыйк углы Азария — рухани;

³Шиша угыллары Элихореп белән Ахия — сәркәтипләр; Ахилуд углы Еһошафат — елъязмачы;

⁴Еһояда углы Бенаяһ — гаскәр башлыгы; Садыйк белән Абъятар — руханилар;

⁵Натан углы Азария — өлкә башлыклары җитәкчесе; Натан углы Зәбүд — рухани һәм патша киңәшчесе;

⁶Әхишәр — патша сараен караучылар башлыгы; Абда углы Адунирам — мәҗбүри рәвештә эшләүчеләр өстеннән назыйр.

⁷Болардан тыш Сөләйманның бөтен Исраил төбәкләре белән идарә итүче унике башлыгы бар иде. Алар ел әйләнәсендә патшаны һәм аның йортын азык-төлек белән тәэмин итәргә — һәммәсе елга бер тапкыр ай буена ризык китерергә тиеш иде.

⁸Менә аларның исемнәре: таулы Эфраим төбәгендә — Бен-Хүр;

⁹Макаста, Шагалбим вә Бәйт-Шемеш авыл-калаларында һәм Элон-Бәйт-Хананда — Бен-Декыр;

¹⁰Арубботта, Сөкөһ шәһәрендә һәм Хепер җирләрендә — Бен-Хесед;

¹¹Напа-Дор җирендә — Бен-Абинадаб (Сөләйман кызы Тапат аның хатыны иде);

¹²Тәгънәк һәм Мегиддо шәһәрләрендә, шулай ук Изрегыл шәһәреннән түбәнрәк урнашкан Саретан шәһәре янындагы бөтен Бәйт-Шан җирләрендә һәм Бәйт-Шаннан алып Әбел-Мехола шәһәренә, хәтта Йокмыгам шәһәренең аръягына кадәр — Ахилуд углы Багъна;

¹³Рамот-Гилыгад шәһәрендә — Бен-Гебер (Гилыгад өлкәсендәге Менашше углы Яһирның авыл-калалары да, Башан өлкәсендәге Әргүб төбәге дә, диварлар белән әйләндереп алынган, капкаларына бакыр келәләр куелган алтмыш шәһәр дә аның карамагында иде);

¹⁴Маханаим шәһәрендә — Идду углы Әхинадаб;

¹⁵Нәптали җирендә — Ахимагас (ул Сөләйман кызы Басематка өйләнгән иде);

¹⁶Ашер җирендә һәм Бегалутта — Хушай углы Багъна;

¹⁷Исәсхәр җирендә — Паруах углы Еһошафат;

¹⁸Беньямин җирендә — Эла углы Шимгый;

¹⁹Гилыгад өлкәсендә (амориләр патшасы Сихон һәм Башан патшасы Ог җирләрендә) — Ури углы Гебер. Ул берүзе идарә итте.

²⁰Яһүдә вә Исраилнең диңгез буендагы ком бөртегедәй күп санлы халкы ашап-эчеп, рәхәт гомер кичерде.

²¹Сөләйман патша Фырат елгасыннан алып Мисыр чигенә һәм пелештиләр җиренә кадәр булган патшалыкларны биләп торды. Алар һәммәсе, Сөләйманга бүләкләр китереп, гомер буе аңа хезмәт күрсәттеләр.

²²Сөләйманга китерелә торган көндәлек азык-төлек түбәндәгедән гыйбарәт иде: утыз кор [3] сыйфатлы бодай оны һәм алтмыш кор эре итеп тарттырылган он,

²³аранда симертелгән ун баш һәм көтүлектә йөргән егерме баш сыер; боланнар, тау һәм кыр кәҗәләре, симертелгән кош-корттан тыш тагын йөз баш сарык.

²⁴Чөнки ул Типсахтан алып Газага кадәр — Фырат елгасының бирге ягындагы барча патшалар өстеннән идарә итте, шулай ук әйләнә-тирәдәге барча илләр белән дә дус-тату яшәде.

²⁵Сөләйман идарә иткән дәвердә, Яһүдә һәм Исраил халкы, Даннан алып Беер-Шебага кадәр, хәсрәт күрмичә, һәркайсы үзенең йөзем куагы, үзенең инҗир агачы төбендә тыныч гомер кичерде.

²⁶Сөләйманның арбага җигә торган атлары өчен дүрт мең [4] араны булып, унике мең арба йөртүчесе бар иде.

²⁷Билгеләнгән айда өлкә башлыкларының һәркайсы Сөләйман патшага һәм аның белән табын бүлешкән кешеләргә җитәрлек күләмдә азык-төлек китереп торды;

²⁸җигү атлары һәм башка төр атлар өчен арпа белән саламны да һәркайсы үз нәүбәтендә тиешле урынга ташыды.

²⁹Сөләйманга Аллаһы зирәклек, гаять үткер зиһен һәм тирән гакылны диңгез буендагы ком бөртегедәй мулдан биргән иде.

³⁰Аңардагы зирәклек көнчыгышның һәм Мисырның барча акыл ияләренекеннән өстен булды.

³¹Ул җир йөзендәге барча кешедән, шул исәптән эзрахлы Этаннан да, Махул угыллары Һеман, Кәлкөл вә Дардадан да зирәгрәк иде; аның исеме әйләнә-тирәдәге халыклар арасында мәшһүр булды.

³²Үз гомерендә ул, өч мең гыйбрәтле хикәя сөйләп, мең дә биш җыр чыгарды;

³³Ливанда үсә торган эрбет агачыннан башлап дивар ярыкларыннан баш төртә торган һүссөпкә кадәр бөтен үсемлекләр, шулай ук хайваннар, кошлар, сөйрәлүчеләр вә балыклар хакында сөйләп калдырды.

³⁴Сөләйманның зирәклеге хакында ишетеп-белгәннәр барлык мәмләкәтләрдән, җир йөзендәге бөтен патшалыклардан аны тыңларга килә торганнар иде.