Read Изге Язма, 2015 IV Патшалар 20 Bible Online

IV Патшалар 20 - Изге Язма, 2015 bible

IV Патшалар 20

¹Хизәкыйянең, бик каты авырып, үлем түшәгендә яткан чагы иде. Аның янына Амотс углы Ишагыйя пәйгамбәр килеп әйтте: — Раббы болай ди: «Эшләреңне тәртипкә китер, чөнки әҗәлең якын, син инде терелмәячәксең».

²Шунда Хизәкыйя йөзе белән диварга таба борылды да Раббыга ялварырга тотынды:

³— Йа Раббым, Синең күзеңә ятышлы гамәлләр кылып, тугрылык белән, чын йөрәктән Синең юлдан йөргәнемне исеңә төшерсәң иде. Шуларны әйтеп, Хизәкыйя әче күз яшьләре белән елый башлады.

⁴Бу вакытта Ишагыйя эчке ишегалдыннан чыгып өлгермәгән иде әле, шунда аңа Раббы сүзе килеп иреште:

⁵— Кире әйләнеп кер дә Минем халкымның хакиме Хизәкыйягә әйт, атаң Давытның Раббы Алласы болай дип әйтә, диген: «Мин синең догаңны ишеттем, күз яшьләреңне күрдем — инде терелтермен Мин сине, берсекөнгә Раббы йортына барырсың;

⁶Мин сиңа унбиш ел гомер өстим. Ашшур патшасы кулыннан сине дә, бу каланы да коткарырмын, бу каланы Мин Үзем вә колым Давыт хакына яклап калырмын».

⁷Шуннан соң Ишагыйя: — Инҗир кагы китерсеннәр, — диде. Хизәкыйянең җәрәхәтенә инҗир кагы яптылар, шуннан Хизәкыйя сихәтләнә башлады.

⁸Хизәкыйя Ишагыйядән: — Раббының мине савыктырасына һәм берсекөнгә Раббы йортына барасыма ишарә итүче билге нинди? — дип сорады.

⁹Ишагыйя аңа болай дип җаваплады: — Вәгъдәсенең үтәлүенә ишарә итеп, Раббыдан сиңа мондый билге: әйт әле, күләгә ун баскычка алгарак үтсенме, әллә ун баскычка кирегә чигенсенме?

¹⁰— Күләгәнең ун баскычка алга китүе гадәти хәлдер, — диде аңа Хизәкыйя, — юк, ун баскычка кире китсен әле.

¹¹Ишагыйя пәйгамбәр Раббыга мөрәҗәгать итте, һәм Әхәз баскычы буйлап түбән төшеп барган күләгәне Раббы ун баскычка кирегә күчереп куйды.

¹²Шул көннәрдә Бабил патшасы — Баладанның углы Меродах-Баладан — Хизәкыйянең авырып ятканын ишетеп, аңа хат вә бүләкләр җибәрде.

¹³Хизәкыйя илчеләрне каршы алды, аларга хәзинә саклагычларын, көмеш вә алтынын, хуш исле сумала вә кыйммәтле майларын, корал сакланган йортын вә саклау урыннарындагы барлык байлыгын күрсәтте; үз сараенда һәм дәүләтендә кунакларга күрсәтмәгән бер нәрсә дә калмады.

¹⁴Ишагыйя пәйгамбәр, Хизәкыйя патшага килеп: — Бу кешеләр ниләр сөйләде? Алар каян килгәннәр? — дип сорады. Хизәкыйя: — Алар ерак җирдән, Бабилдән килгәннәр, — дип җавап бирде.

¹⁵Ишагыйя: — Синең сараеңда ниләр күрде алар? — дип сорады. Хизәкыйя: — Сараемда булган бар нәрсәне күрделәр; саклау урыннарымда аларга күрсәтмәгән берни калмады, — дип җаваплады.

¹⁶Шунда Ишагыйя Хизәкыйягә болай диде: — Раббының сүзен тыңла:

¹⁷«Менә, шундый көннәр килер: синең сараеңда булган бар нәрсәне, шушы көнгә кадәр ата-бабаларың җыйган бар байлыкны Бабилгә алып китәрләр, берни дә калмас, — ди Раббы. —

¹⁸Синең нәселдәге угылларның да кайберләрен алып китәрләр, алар Бабил патшасы сараенда хәрәм агалары булып хезмәт итәрләр».

¹⁹Хизәкыйя исә Ишагыйягә: — Синең аша Раббы тапшырган сүзләр әйбәт, — диде, чөнки күңеленнән ул: «Минем гомердә тынычлык-иминлек хөкем сөрәчәк икән әле», — дип уйлады.

²⁰Хизәкыйя патшалык иткән чордагы башка вакыйгалар, ул күрсәткән бөтен батырлыклар, шулай ук аның буа төзүе, суүткәргеч ясап, шәһәргә су уздыруы хакында Яһүдә патшаларының елъязмасында бәян ителгән.

²¹Хизәкыйя дөнья куйгач, аның урынына патша булып углы Менашше килде.