Read Изге Язма, 2015 IV Патшалар 22 Bible Online

IV Патшалар 22 - Изге Язма, 2015 bible

IV Патшалар 22

¹Тәхеткә утырганда, Йошиягә сигез яшь булып, Иерусалимдә ул утыз бер ел дәвамында идарә итте. Аның әнкәсе Едидә — боскатлы Адая кызы иде.

²Йошия, Раббы күзенә ятышлы күренгән гамәлләр кылып, уңга-сулга тайпылмыйча һәрчак бабасы Давыт юлыннан йөрде.

³Патшалык итүенең унсигезенче елында Йошия патша үзенең кәтибен — Мешулламнан туган Асальяның углы Шапанны — Раббы йортына йомыш белән җибәрде.

⁴— Баш рухани Хилкыйя янына барып, шуны әйт, — диде ул. — Раббы йортына килүче халыктан җыелган көмешне, бусага төбендә сакта торучылардан алып, санап куйсын һәм

⁵Раббы йортында төзү эшләре белән җитәкчелек итүчеләр кулына тапшырсын. Алар исә аны Раббы йортын төзәтү-яңарту белән шөгыльләнүче эшчеләргә,

⁶балта осталарына, төзүчеләргә, ташчыларга түләсен, йортны төзекләндерү өчен агач һәм эшкәртелгән таш алуга тотсын.

⁷Аларга биргән көмешнең ни-нәрсәгә тотканнарын тикшермәскә дә мөмкин, чөнки алар намус белән эш итә.

⁸Баш рухани Хилкыйя: — Раббы йортында мин Канун китабына тап булдым, — дип, табылдык китапны кәтип Шапанга бирде. Ул аны укыды.

⁹Шуннан соң Шапан, җавап белән патша хозурына әйләнеп килеп: — Синең хезмәтчеләрең Раббы йортында булган көмешнең барысын да төзекләндерү эшләре белән җитәкчелек итүчеләргә тапшырдылар, — диде.

¹⁰Аннары кәтип Шапан: — Рухани Хилкыйя миңа бер китап бирде, — дип, аны патшага укып күрсәтте.

¹¹Канун китабында язылган сүзләрне ишетүгә, патша, өстендәге киемнәрен ертып,

¹²рухани Хилкыйягә, Шапан углы Ахикамга, Микәя углы Ахборга, кәтип Шапанга һәм патша хезмәтчесе Асаягә:

¹³— Барыгыз, минем хакка, халык хакына, бөтен Яһүдә хакына әлеге табылдык китапта язылган сүзләр турында Раббыдан сорап белешегез; Раббының безгә кабынган ачуы зурдыр, чөнки ата-бабаларыбыз әлеге китаптагы сүзләргә колак салмадылар — безгә төбәп язылганнар буенча гамәл кылмадылар, — дип боерды.

¹⁴Шуннан соң рухани Хилкыйя, Ахикам, Ахбор, Шапан һәм Асая, Иерусалимнең икенче төбәгенә барып, кием-салымнарны карап-барлап торучы Хархастан туган Тикъва углы Шаллумның хатыны — пәйгамбәр Хулда белән киңәштеләр.

¹⁵Хулда аларга: — Исраилнең Раббы Алласы менә нәрсә ди! Сезне минем янга җибәргән кешегә,

¹⁶Раббы болай дип әйтә, диген: «Шушы урынга һәм шушында яшәүчеләргә Мин бәла-каза җибәрермен — һәммәсе дә Яһүдә патшасы Йошия укыган китапта язылганча булыр.

¹⁷Миннән йөз чөереп, чит илаһларга багышлап корбан китергән, кылган бөтен гамәлләре белән ярсуымны кузгаткан өчен, бу урынга Минем ачуым чыкты, һәм ул басылырлык түгел».

¹⁸Сезне Раббыдан сорашып-белешер өчен җибәргән Яһүдә патшасына әйтегез: «Исраилнең Раббы Алласы син ишеткән сүзләр хакында болай ди:

¹⁹„Шушы урын котычкыч афәткә дучар булыр һәм шушында яшәүчеләргә ләгънәт-каргыш төшәр дигән сүзләремне ишеткәннән соң, син, йөрәгең йомшап, Раббы алдында түбәнчелек күрсәткән өчен, өстеңдәге киемнәреңне ертып, Минем каршыда күз яшьләре түккән өчен, Мин сине ишеттем, — ди Раббы. —

²⁰Әнә шуның өчен Мин сине ата-бабаларың янына озатырмын, һәм син, шушы урынга Мин җибәрәсе барлык бәла-казаларны күрмичә, тынычлыкта дәфен кылынырсың“», — диде. Әлеге җавапны хәбәрчеләр патшага җиткерделәр.