Read Изге Язма, 2015 IV Патшалар 5 Bible Online

IV Патшалар 5 - Изге Язма, 2015 bible

IV Патшалар 5

¹Арам патшасының Нагаман исемле гаскәрбашы үз хуҗасы патшаның хөрмәтен казанган бөек кеше иде, чөнки Раббы аның аша арамиләргә җиңү китергән иде. Шушы батыр гаскәри махау зәхмәтеннән интегә иде.

²Кайчандыр бервакыт арамиләр, Исраил җиренә басып кергәч, кечкенә бер кызны әсир алган булалар, шуннан әлеге кыз Нагаман хатынында хезмәтче булып кала.

³Беркөн шул кыз үзенең хуҗабикәсенә: — Әгәр әфәндем Нагаман Самареядәге пәйгамбәр янына барып килсә, ул аны махау зәхмәтеннән коткарыр иде! — диде.

⁴Исраил җиреннән килгән кыз шулай дип әйтә дип, Нагаман үзенең хуҗасы патшага җиткерде.

⁵— Барып кил син аның янына, — диде Нагаманга Арам патшасы, — Исраил патшасына мин хат җибәрермен. Нагаман үзе белән ун талант [1] көмеш, алты мең шәкыл [2] алтын һәм ун алмаш кием алды.

⁶Исраил патшасына дип Нагаман алып килгән хатта «ошбу хатым белән бергә синең хозурыңа хезмәтчем Нагаманны җибәрәм, аны махау зәхмәтеннән коткарсаң иде» дип язылган иде.

⁷Исраил патшасы, хатны укыганнан соң, өстендәге киемнәрен ертып: — Үтерер яки терелтер өчен Аллаһы түгел бит мин! Нәрсә ул минем янга: «махау зәхмәтеннән коткар», — дип, кеше җибәрә?! Менә, күреп-белеп торыгыз, минем белән дошманлашыр өчен сәбәп эзли ул, — диде.

⁸«Исраил патшасы өстендәге киемнәрен ерткан», дигән хәбәрне ишеткәч, Аллаһы кешесе Элиша: — Нәрсә дип син өстеңдәге киемеңне ертасың? Минем янга килсен ул, Исраилдә пәйгамбәр барлыгын күрсен, — дип әйттерергә патша янына кеше җибәрде.

⁹Шуннан Нагаман, Элиша янына юнәлеп, ат-арбалары белән аның ишек төбенә килеп туктады.

¹⁰Элиша: — Бар, җиде кат Үрдүн суында коенып чык, шуннан тәнең яңарыр, һәм син чистарынырсың, — дип әйтер өчен, Нагаман янына үзенең хезмәтчесен чыгарды.

¹¹Нагаман ачуланып китеп барды. — Пәйгамбәр яныма чыгар, Раббы Алласының исемен атап, авырткан урынга кулын салыр, махау зәхмәтеннән арындырыр, дип уйлаган идем.

¹²Дәмәшкътәге Абана вә Парпар елгалары Исраилнең барлык елгаларыннан яхшырак түгелме әллә?! Шул суларда коенып чистарына алмый идеммени мин?! — дип ярсый бирде ул, кайту ягына уңайлап.

¹³Ләкин хезмәтчеләре аның янына килеп: — Атабыз, әгәр пәйгамбәр сиңа башка бер зур эш кушкан булса, әллә үтәмәс идеңме? «Коенып чык, чистарынырсың» дигәнне генә башкарырсың инде, — диделәр.

¹⁴Һәм ул, Аллаһы кешесе кушканча, Үрдүнгә җиде тапкыр чумып чыкты; шуннан соң тәне сабый баланыкы сыман яңарып калды, һәм ул чистарынды.

¹⁵Аннары ул үзе һәм аны озата баручылар һәммәсе Аллаһы кешесе янына әйләнеп кайттылар; яубашы аның каршысына килеп басты һәм: — Хәзер миңа төгәл мәгълүмдер: Исраил Алласыннан кала бөтен җир йөзендә бүтән илаһ юктыр; инде хезмәтчеңнең бүләкләрен кабул итеп ал, — диде.

¹⁶Аңа җавап итеп Элиша: — Мин хезмәт итә торган Раббы Үзе шаһиттыр: кабул итә алмыйм бүләгеңне! — диде. Тегесе аны күндерергә тырышты, монысы исә ризалашмады.

¹⁷— Алай булгач, — диде Нагаман, — миңа, синең хезмәтчеңә, ике качыр күтәрерлек туфрак бирсеннәр [3], чөнки моннан ары синең хезмәтчең Раббыдан кала бүтән илаһларга тулаем яндыру корбаны да, башка төр корбан да китермәячәк.

¹⁸Тик Раббы синең хезмәтчеңне гафу кылсын: Риммун илаһы йортында гыйбадәт кылганда, хуҗа патшам минем кулыма таянган чакта, мин дә сәҗдә кыламын. Риммун йортында сәҗдә кылганда, Раббы синең колыңны гафу кылса иде.

¹⁹ 19-20 — Юлың имин булсын! — диде аңа Элиша, һәм Нагаман аның яныннан китеп барды. Аллаһы кешесе Элишаның хезмәтчесе Гехази: «Менә, әфәндем әлеге арами Нагаман алып килгән әйберләрдән баш тартты. Раббы Үзе шаһиттыр: артыннан йөгерим әле, нәрсә дә булса алыйм аңардан!» — дип, инде китеп өлгергән

²¹Нагаман артыннан чапты. Артыннан йөгерүче кешене күреп, Нагаман арбасыннан төште һәм аңа каршы атлады: — Барысы да иминме? — дип сорады ул.

²²— Имин, — дип җавап кайтарды тегесе, аннары: — әфәндем: «хәзер генә минем янга таулы Эфраим төбәгендәге пәйгамбәрләрдән ике егет килде; шуларга бер талант көмеш белән ике алмаш кием бирмәссеңме», — дип әйтергә җибәргән иде, — дип өстәде.

²³— Әлбәттә ал, ике талант ал, — дип күндерде аны Нагаман. Аннары, ике капчыкка ике талант көмеш белән ике алмаш кием салып, үзенең ике хезмәтчесенә тоттырды, һәм тегеләр, Гехазинең алдына төшеп, капчыкларны күтәреп киттеләр.

²⁴Калкулык янына җиткәч, Гехази, алар кулыннан капчыкларны алып, өендә яшереп куйды да тегеләрне кайтарып җибәрде, хезмәтчеләр кире киттеләр.

²⁵Гехази үзенең әфәндесе янына әйләнеп килгәч, Элиша аңардан: — Кайларда йөрдең, Гехази? — дип сорады. — Синең хезмәтчең беркая да бармады, — дип җаваплады тегесе.

²⁶— Теге кеше, арбасыннан төшеп, синең каршыңа атлаганда, минем йөрәгем синең янда түгел иде дип уйлыйсыңмы?! Көмеш вә кием-салым, зәйтүн вә йөзем бакчалары, вак вә эре терлек, кол ир вә кол хатын-кыз ала торган вакытмы хәзер?!

²⁷Шушы гамәлең өчен Нагаманның махау зәхмәте сиңа һәм синең нәселеңә мәңгегә йогып калсын, — диде. Элиша яныннан чыкканда, Гехази махаудан кар кебек ап-ак иде.