Read Изге Язма, 2015 I Елъязма 11 Bible Online

I Елъязма 11 - Изге Язма, 2015 bible

I Елъязма 11

¹Исраил халкы Давыт янына Хебрунга җыелып килеп: — Без синең белән бер җан, бер тәндер, — диде. —

²Әүвәле, Шаул патшалык иткән вакытларда, безне әйдәп сугышларга син алып бардың һәм Исраилне, яу кырыннан алып чыгып, кабат өенә син алып кайттың. Раббы Аллаң сиңа: «Син минем халкым Исраилнең көтүчесе булырсың һәм Исраил өстеннән идарә итәрсең», — диде.

³Исраилнең барча өлкәннәре патша янына Хебрунга килгәч, Давыт Раббы каршында алар белән килешү төзеде; һәм өлкәннәр, Шемуил аша Раббы вәгъдә иткәнчә, Давытны, зәйтүн мае сөртеп, Исраил патшасы итеп билгеләделәр.

⁴Бервакыт Давыт бөтен Исраил халкы белән Иерусалимгә каршы яуга кузгалды. Ул вакытта әле бу шәһәр Явүс дип аталып, анда шул җирнең халкы явүсиләр яши иде.

⁵Явүсиләр Давытка: — Син бирегә керә алмассың, — диделәр. Ләкин Давыт Сион кирмәнен яулап алды, һәм әлеге ныгытма Давыт шәһәренә әйләнде.

⁶Давыт: — Явүсиләргә каршы беренче булып һөҗүмгә ташланган кеше гаскәр башлыгы итеп билгеләнәчәк, — дигән иде; беренчеләрдән булып һөҗүмгә Сәрүя углы Йоав күтәрелде, һәм, шул рәвешле, гаскәрбашы итеп билгеләнде.

⁷Шуннан Давыт әлеге ныгытмада яши башлады, шуңа күрә ул Давыт шәһәре дигән исем алды;

⁸аннары Давыт, Милло кирмәненнән башлап, кала тирәли төзелгән диварга кадәр бөтен шәһәрне төзекләндереп чыкты. Шәһәрнең калган өлешен Йоав яңартып бетерде.

⁹Давыт зур уңышларга ирешеп, аның көч-гайрәте һаман арта барды, чөнки Күкләр Хуҗасы Раббы һәрчак Давыт янында булды.

¹⁰Раббының Исраил хакындагы сүзе буенча, Давытны тәхеткә утыртыр өчен, бөтен Исраил халкы белән беррәттән Давытка нык ярдәм иткән гаскәр башлыклары түбәндәгеләр иде.

¹¹Менә Давыт гаскәрендәге батыр сугышчыларның исемнәре: гаскәрбашы Хәкмүни углы Яшабгам. Ул, өч йөз кешегә каршы сөңгесен күтәреп, аларны бер алышуда тар-мар иткән баһадирдыр.

¹²Аңардан соң Өч каһарманның берсе — Ахуах нәселеннән Доду углы Элгазар.

¹³Пелештиләр, сугышырга әзерләнеп, Пас-Даммимдә тупланган вакытта, әлеге Элгазар Давыт янында булды: арпа басуында алышкан вакытта Исраил халкы пелештиләрдән кача башлагач,

¹⁴Давыт, Элгазар белән басу уртасына чыгып, басуны да саклап кала, пелештиләрне дә тар-мар китерә, һәм ул көнне Раббы Исраилгә бөек җиңү бүләк итә.

¹⁵Бервакыт шулай пелештиләр Рефаим үзәненә килеп тупландылар. Ул чакны Утыз башлык арасыннан өчесе Давыт катына, Адуллам мәгарәсе каршындагы кыя янына килде.

¹⁶Давыт — ныгытма эчендә, ә пелешти сугышчылары Бәйт-Лехемдә иде.

¹⁷Шунда Давыт бик нык сусап: — Бәйт-Лехем капкасы янындагы коедан берәрсе эчәремә су алып килсә иде, — диде.

¹⁸Әлеге өч батыр, пелештиләр станы аша сугышып үтеп, Бәйт-Лехем капкасы янындагы коедан Давытка су алып килеп бирде. Әмма Давыт әлеге судан баш тартты, ул аны Раббыга бүләк итеп җиргә койды.

¹⁹— Бу суны эчүдән мине Аллам сакласын! Шушы ирләрнең канын эчәммени мин?! Тормышларын куркыныч астына куеп алып килде алар миңа бу суны, — диде ул һәм суны эчәргә теләмәде. Менә ни-нәрсәләр эшләде әлеге өч батыр!

²⁰Йоавның кардәше Әвишәй Өч каһарманның башлыгы иде. Бервакыт ул, өч йөз кешегә каршы сөңгесен күтәреп, аларны кырып бетерде һәм әлеге Өч каһарман сыман дан яулады.

²¹Әвишәй, шул Өч каһарманнан мәртәбәлерәк булып, аларның башлыгына әйләнде, гәрчә аларның берсе булмаса да.

²²Кабсеһел каласыннан Еһояда углы Бенаяһ зур батырлыклар кылган гаярь сугышчы иде. Ул мәабиләрнең иң көчле ике сугышчысын үтерде. Икенче бервакытны кышкы карлы көндә, чокырга төшеп, бер арысланны үтерде.

²³Аннары ул буе биш терсәк [37] булган бер мисырлының җанын кыйды: туку күшәседәй [38] сөңгесен тоткан мисырлы каршына Бенаяһ таяк тотып китте һәм, тегенең сөңгесен тартып алып, мисырлының үз коралы белән аның үзен үтерде.

²⁴Еһояда углы Бенаяһ әнә шундый батырлыклар эшләде. Ул да, алдагы Өч каһарман сыман, зур дан-шөһрәт казанган кеше иде.

²⁵Утыз башлык арасында иң мәртәбәлесе булып, ул теге Өч каһарманның берсе түгел иде. Давыт аны үзенең җансакчылар башлыгы итеп куйды.

²⁶Каһарманнар арасында түбәндәгеләр бар иде: Йоавның кардәше Асаһел; Бәйт-Лехемнән Доду углы Элханан;

²⁷һарорлы Шаммот; пелонлы Хелес;

²⁸тыкуалы Иккыш углы Гыйра; анатотлы Абигызер;

²⁹хушалы Сиббекәй; Ахуах нәселеннән Гыйлай;

³⁰нетофалы Маһрай; нетофалы Багъна углы Хелед;

³¹Беньямин җирендәге Гибгадан Рибай углы Итай; пиргатонлы Бенаяһ;

³²Гәгаш үзәненнән Хурай; арбаһи Абиел;

³³бахуримлы [39] Азмавет; шагалбимле Эльяхба;

³⁴гизонлы Һашемның угыллары; һарарлы Шаге углы Йонатан;

³⁵һарарлы Сәкәр углы Ахиам; Ур углы Элифал;

³⁶мекералы Хепер; пелонлы Ахия;

³⁷кәрмилле Хесро; Эзбай углы Нагарай;

³⁸Натанның кардәше Йоил; Һагри углы Мибхар;

³⁹аммони Селык; Сәрүя углы Йоавның корал йөртүчесе беһеротлы Нахрай;

⁴⁰итри Гыйра; итри Гәреб;

⁴¹хитти Урия; Ахлай углы Забад;

⁴²Шизә углы Адинә — Рубин ыругыннан нәсел башлыгы (аның утыз сугышчысы бар иде);

⁴³Мәгакәһ углы Ханан; митанлы Йошафат;

⁴⁴аштыралы Уззия; арогырлы Хотам угыллары Шама һәм Егыил;

⁴⁵Шимри углы Едигаил һәм аның ир кардәше тисле Йоха;

⁴⁶махавалы Элиел; Элнагам угыллары Ярибай һәм Йошавия; мәаби Итма;

⁴⁷Элиел; Обид; месобалы Ягасиел.