Read Изге Язма, 2015 I Елъязма 12 Bible Online

I Елъязма 12 - Изге Язма, 2015 bible

I Елъязма 12

¹Кыйш углы Шаулдан яшеренеп Сыйкләгтә яткан чакта, Давытка сугышларда ярдәм итәр өчен, түбәндәге батыр кешеләр килде.

²Җәяләр белән коралланган, уң вә сул кулы белән дә дошманнарына таш һәм ук ата белүче бу сугышчылар Беньямин ыругыннан Шаулның туганнары иде.

³Гибгалы Шемага угыллары: Ахигызыр (башлыклары) һәм Йоаш; Азмавет угыллары Язиел һәм Пелет; Берәкә; Анатоттан Еһү.

⁴Утыз башлыктан берсе һәм аларның җитәкчесе булган гибгонлы Ишмая; Иремия; Яхәзиел; Йоханан; гедералы Йозабад;

⁵Элгузай; Яримут; Бегалья; Шемария; харуфлы Шефатия;

⁶Корах нәселеннән Элкана, Ишшия, Азарел, Йогызыр һәм Яшабгам;

⁷гедорлы Ерухам угыллары Йогыла һәм Зәбәдия.

⁸Давытның чүлдәге ныгытмасына гәдләрдән дә калкан һәм сөңге белән коралланган, сугышка әзер, батыр ир-егетләр килде. Аларның йөзләре арысланныкы кебектер, үзләре тау кәҗәседәй җитездер.

⁹Башлыклары Эзер булып, икенчесе — Убадия, өченчесе — Элиаб,

¹⁰дүртенчесе — Мишманна, бишенчесе — Иремия,

¹¹алтынчысы — Аттай, җиденчесе — Элиел,

¹²сигезенчесе — Йоханан, тугызынчысы — Элзабад,

¹³унынчысы — Иремия, унберенчесе — Махбаннай.

¹⁴Әлеге гәдләр гаскәр башлыклары. Аларның иң кечесе — йөзбашы, ә иң зурысы меңбашы иде.

¹⁵Үрдүн үзенең ярларыннан ташып чыккан беренче айда алар, елганы кичеп, үзәндә яшәүче халыкны көнчыгыш һәм көнбатыш тарафына куып тараттылар.

¹⁶Беньямин һәм Яһүдә ыругыннан башка кешеләр дә Давытның ныгытмасына килделәр.

¹⁷Аларны каршы алып, Давыт: — Әгәр минем янга изге ният белән, ярдәм итәр өчен килсәгез, мин сезнең белән туганлашырмын, әмма инде бер хаксызга мине дошманнарым кулына тапшырырга килгәнсез икән, ата-бабаларыбызның Алласы Үзе күреп сезгә хөкемен чыгарсын, — диде.

¹⁸Гаскәрбашы Амасайны шунда Аллаһы Рухы камап алып, Амасай: «И Давыт, без синекедер! И Ишай углы, без синең белән! Иминлек сиңа, иминлек! Синең яраннарың да имин булсын! Чөнки синең Аллаң синең яклыдыр!» — диде. Давыт, аларны кабул кылып, гаскәр башлыклары итеп билгеләде.

¹⁹Давыт, пелештиләргә кушылып, Шаулга каршы сугышка кузгалгач, Менашше ыругыннан кайберәүләр аңа иярде. Әмма Давыт һәм аның кешеләре чынлыкта пелештиләргә булышмады, чөнки Пелешет яубашлары бер-берсе белән киңәшләштеләр дә, Давыт үзенең әфәндесе Шаул ягына чыгар һәм шулай итеп башыбызны бәлагә салыр, дип аны кире кайтарып җибәрделәр.

²⁰Давыт Сыйкләгкә кайтып киткәндә, аның белән бергә менашшелардан Аднах, Йозабад, Едигаил, Микәил, Йозабад, Элиһу, Силлетәй дә китте; болар менашшеларның меңбашлары иде.

²¹Дошман баскынчыларына каршы бәрелешләрдә Давытка алар да ярдәм иттеләр, чөнки һәммәсе батыр йөрәкле яубашлары иде.

²²Шул рәвешле, Давытка ярдәмгә көннең-көнендә халык килә торды, һәм берзаман аның гаскәре Аллаһы явы сыман ишәеп китте.

²³Раббы сүзе буенча, Шаул урынына тәхеткә Давытны утыртыр өчен, Давыт янына Хебрунга килгән кораллы гаскәриләрнең саны шушыдыр:

²⁴калкан вә сөңге белән коралланган, сугышка әзер Яһүдә угылларыннан — алты мең сигез йөз кеше;

²⁵батыр йөрәкле Шимун угылларыннан — җиде мең бер йөз гаскәри;

²⁶левиләрдән — дүрт мең алты йөз кеше,

²⁷шул исәптән Һарун кабиләсенең башлыгы Еһояда һәм аның өч мең җиде йөз сугышчысы,

²⁸батыр йөрәкле егет Садыйк һәм аның гаиләсеннән егерме ике яубашы;

²⁹Шаулның кардәшләре булган Беньямин ыругыннан — өч мең кеше (моңарчы аларның байтагы Шаул яклы иде);

³⁰Эфраим ыругыннан — үз кабилә-нәселендә дан тоткан егерме мең дә сигез йөз батыр ир-егет;

³¹Көнбатыш менашшелардан — Давытны патша итеп куяр өчен исемнәре атап билгеләнгән унсигез мең кеше;

³²Исәсхәр ыругыннан — ике йөз җитәкче һәм аларның кул астындагы кардәшләре (әлеге җитәкчеләр заман үзенчәлекләрен һәм Исраилнең нәрсә эшләргә тиешлеген белүче кешеләр иде);

³³Зәбулун ыругыннан — һәр төр сугыш коралы белән коралланган, бөтенесе бер булып Давытка ярдәмгә кузгалган, сугышка әзер илле мең гаскәри;

³⁴Нәптали ыругыннан — мең гаскәрбашы һәм калкан, сөңге белән коралланган утыз җиде мең кеше;

³⁵Дан ыругыннан — сугышка әзер егерме сигез мең алты йөз кеше;

³⁶Ашер ыругыннан — сугышка әзер кырык мең гаскәри;

³⁷Үрдүн аръягында яшәүче Рубин, Гәд ыругыннан, Көнчыгыш менашшелардан — төрле сугыш коралы белән коралланган йөз егерме мең кеше.

³⁸Шулай итеп, әлеге сугышчылар, Давытны бөтен Исраил өстеннән патша итеп куярга чын йөрәктән өметләнеп, саф-саф тезелеп Хебрунга килделәр. Калган барча исраилиләр дә патшалыкны Давытка тапшыру теләгендә иде.

³⁹Килгән сугышчылар Давыт янында өч көнгә торып калды; аларның ашар-эчәренә туганнары һәммә нәрсәне хәстәрләп куйган иде.

⁴⁰Исәсхәр, Зәбулун һәм Нәптали җирендә яшәүче ерак күршеләре дә, ишәк, дөя, качыр, үгезләргә төяп, байтак кына он, инҗир, йөзем, шәраб, май, эре һәм вак терлек алып килде — Исраилнең шатлыгы чиксез иде.