Read Изге Язма, 2015 I Елъязма 14 Bible Online

I Елъязма 14 - Изге Язма, 2015 bible

I Елъязма 14

¹Сур патшасы Хирам үзенең илчеләрен, шулай ук сарайны төзү өчен эрбет агачы, ташчыларын һәм балта осталарын Давыт янына җибәрде.

²Давыт шуны аңлады ки, Раббы аны Үзенең халкы — исраилиләр хакына Исраил патшасы итеп билгеләгән һәм патшалыгының дәрәҗәсен югары күтәргән булырга тиеш.

³Давыт Иерусалимдә дә үзенә хатыннар алды. Аның тагын да угыл-кызлары туды.

⁴Иерусалимдә дөньяга килгән балаларының исемнәре мондыйдыр: Шаммуа һәм Шобаб, Натан һәм Сөләйман,

⁵Ибхар һәм Элишуа, Элпелет [41] һәм

⁶Нога, Непег һәм Япиа,

⁷Элишама, Быгыльяда [42] һәм Элифелет.

⁸Давытка май сөртеп Исраил патшасы итеп куюларын белгәч, пелештиләр Давытны эзләргә тотындылар. Бу хакта ишетеп, Давыт аларга каршы юнәлде.

⁹Пелештиләр, килеп, Рефаим үзәнендә талап-басып йөри башлаган иделәр инде.

¹⁰Шулчак Давыт: — Пелештиләргә каршы чыгаргамы миңа? Аларны минем кулга тапшырырсыңмы? — дип, Аллаһыга мөрәҗәгать итте. — Бар, каршы чык, Мин аларны синең кулга тапшырачакмын, — диде Давытка Раббы.

¹¹Давыт Багал-Перасим тарафына кузгалды һәм пелештиләрне шунда тар-мар китерде. — Су ташкыны буаны җимергән кебек, Аллаһы да минем кулым белән дошманнарымны таратып-туздырып ташлады, — диде Давыт. Шуңа күрә әлеге урынга соңыннан Багал-Перасим [43] дип исем куштылар.

¹²Пелештиләр үзләренең пот-сыннарын шунда ташлап калдырдылар, һәм Давыт үзенең кешеләренә аларны яндырырга әмер бирде.

¹³Күпмедер вакыттан соң пелештиләр кабат үзәндә талап-басып йөри башладылар.

¹⁴Давыт тагын сорау белән Аллаһыга мөрәҗәгать итте, һәм Ул аңа: — Дошманның каршысына барма, әйләнеп, бәлзәм агачлыгы ягыннан артларыннан бәр.

¹⁵Бәлзәм агачларының очлары адәмнәр атлавына охшатып шаулый башлагач, һөҗүмгә күч; димәк, Пелешет гаскәрләрен тар-мар итәргә синең алдан Аллаһы Үзе бара дигән сүз бу, — диде.

¹⁶Аллаһы ничек кушса, Давыт шулай эшләде, һәм исраилиләр, Гибгоннан Газерга җиткәнче, Пелешет гаскәрен юл буе кырып бардылар.

¹⁷Давытның даны бөтен илләргә таралды, һәм Раббының кодрәте белән барча халыклар аңардан курка торган булды.