Read Изге Язма, 2015 I Елъязма 28 Bible Online

I Елъязма 28 - Изге Язма, 2015 bible

I Елъязма 28

¹Шуннан Давыт Исраил халкының бөтен түрәләрен: ыруг җитәкчеләрен, патшага хезмәт итүче хәрби бүлек башлыкларын, меңбашларын, йөзбашларын, патша һәм аның угылларының барлык мөлкәте, мал-туары өчен җаваплы кешеләрне, сарай әһелләрен, батыр сугышчыларны һәм барлык баһадирларны үз янына Иерусалимгә җыеп алды да,

²аягүрә басып, болай диде: — Кардәшләрем вә халкым, тыңлагыз мине! Аллабыз аяк басасы урынны — Раббының Килешү сандыгын куяр өчен йорт салырга дигән ниятне күңелемдә йөрткән, әлеге йортны җиткерер өчен кирәк-яракларны да әзерләп куйган идем.

³Әмма Аллаһы миңа: «Миңа багышланган йортны син төземәссең, чөнки син сугышчан адәмсең һәм кеше каны койдың», — диде.

⁴Тик шулай да Исраил өстеннән гомер бакый патшалык итәр өчен, Исраилнең Раббы Алласы мине сайлап алды. Яһүдә ыругын Ул баш ыруг итеп куйды, Яһүдә йортыннан атам гаиләсен сайлады, ә атамның угылларыннан мине Исраил патшасы итеп куярга ихтыяр кылды!

⁵Раббы, миңа бик күп угыл биреп, Исраил өстеннән патшалык итүче Раббы тәхетенә утыртыр өчен, бөтен угылларым арасыннан Сөләйманны сайлады.

⁶Раббы миңа болай диде: «Миңа дигән йортны һәм ишегалларын синең углың Сөләйман җиткерер, чөнки Мин аны Үземнең углым итеп сайладым; Мин аның атасы булырмын.

⁷Бүгенге көндәге кебек, боерыкларымны вә карар-кануннарымны төгәл үтәп барса, Мин аның патшалыгын мәңгегә ихтыяр кылырмын».

⁸Ә хәзер Раббы каршына җыелган бөтен Исраилнең күз алдында, Аллаһы ишетерлек итеп, шуны җиткерәм: Раббы Аллабызның боерыкларын төгәл үтәгез, шул чагында сез шушы гүзәл җирне үзегезгә милек итә һәм балаларыгызга да мәңгелек мирас итеп калдыра алырсыз.

⁹Ә син, Сөләйман углым, атаңның Алласын таны! Бөтен йөрәгең вә күңелең белән Аңа хезмәт ит, чөнки Раббы һәркемнең йөрәгендә ни барын сыный, һәрбер фикер тирбәнеше Аңа мәгълүмдер. Әгәр син Аның йөз нурын эзләсәң — табарсың; ә инде Аңардан йөз чөерсәң, Ул сине мәңгегә кире кагар.

¹⁰Кара аны, Изге йорт төзер өчен, Раббы сине сайлады. Нык бул һәм эшкә кереш!

¹¹Давыт болдырның, биналарның, саклау урыннарының, югары бүлмәләрнең, эчке бүлмәләрнең һәм Аллаһы сандыгын куя торган бүлмәнең сызымын углы Сөләйманга тапшырды.

¹²Давыт шулай ук Рух аңа күрсәткән бөтен сызымнарны — Раббы йорты ишегаллары, йорт тирәсендәге барча бүлмәләр, Аллаһы йортының хәзинә саклагычлары, изге әйберләрне саклый торган урыннарның сызымын да — углына бирде.

¹³Руханилар һәм левиләрнең бүленеше турында, Раббы йортындагы хезмәт һәм гыйбадәт кылганда кулланыла торган савытлар турында да Сөләйманга күрсәтмәләрен ирештерде.

¹⁴Гыйбадәт кылганда кулланыла торган төрле алтын вә көмеш савытларның авырлыгы турында күрсәтмәләр бирде:

¹⁵шәмдәл вә яктырткычларның нинди максатта кулланылуына карап һәркайсына күпме алтын вә көмеш;

¹⁶изге икмәк куя торган алтын өстәлләрнең һәркайсы өчен күпме алтын, көмеш өстәлләр өчен күпме көмеш;

¹⁷чәнечкеләр, касәләр, чүлмәкләр өчен күпме саф алтын, тәлинкәләр өчен күпме алтын вә көмеш

¹⁸һәм хуш исле сумала-майлар көйрәтү мәзбәхе өчен күпме саф алтын кирәклеген билгеләде. Давыт шулай ук Раббының Килешү сандыгы өстенә канатларын җәйгән алтын керубимнәр урнашкан арбаның сызымын да тапшырды

¹⁹— Боларның һәммәсе Раббы миңа Үзе биргән күрсәтмәләр буенча язылды, — диде Давыт.

²⁰Углы Сөләйманга Давыт тагын болай диде: — Нык бул, батыр бул һәм эшкә тотын! Курыкма һәм төшенкелеккә бирелмә, чөнки Раббы Алла, минем Аллам, сиңа юлдаш булыр. Раббы йортындагы бөтен төзелеш эшләре төгәлләнми торып, Ул сине ялгызыңны калдырмас һәм сине ташламас.

²¹Менә, төркемнәргә бүленгән руханилар һәм левиләр Аллаһы йортындагы һәр төр хезмәтне башкарырга әзер торалар. Һәрбер эшне ихлас күңелдән башкарырдай оста куллы һөнәр ияләрең бар. Бар халык һәм аларның җитәкчеләре синең һәр сүзеңне үтәр.