Read Изге Язма, 2015 I Елъязма 4 Bible Online

I Елъязма 4 - Изге Язма, 2015 bible

I Елъязма 4

¹Яһүдәнең Перес, Хесрон, Кәрми, Хүр һәм Шобал атлы угыллары бар иде.

²Шобал углы Реһаядан Яхат туды; Яхатның Ахумай һәм Лаһад атлы угыллары булды — Сорга шәһәрендә яшәүчеләр чыгышлары белән шулардандыр.

³Этамның угыллары Изрегыл, Ишма һәм Идбаш атлы булып, аларның тагын Һаслелпони атлы сеңелләре дә бар иде.

⁴Пенуил — Гедорның, Эзер исә Хушаның атасыдыр. Болар — Эфратаның беренче углы Хүр балалары. Әлеге Хүр — Бәйт-Лехемнең атасыдыр.

⁵Тыкуа атасы Ахшурның Хела һәм Нагара атлы ике хатыны бар иде.

⁶Нагара аңа угыллары — Ахузам, Хепер, Темени һәм Һа-Ахаштарине табып бирде; болар Нагараның балаларыдыр.

⁷Хеладан туган угыллар исә менә шулар: Серет, Сохар, Этнан

⁸һәм Көс. Көснең Ануб һәм Һа-Собеба атлы угыллары булды. Көс шулай ук Һарум углы Ахархел кабиләләренең нәсел атасы иде.

⁹Ягбес үзенең ир туганнары арасында иң абруйлысы иде. Анасы аны бик авырдан, авыртынып тапканга күрә, углына Ягбес [20] дип исем кушкан була.

¹⁰Ошбу Ягбес Исраил Алласына: — Мөбарәк фатихаларыңны күндереп, минем җирләремне киң итсәң иде дә, юлдашым булып, бәла-казага юлыктырмыйча явызлыктан сакласаң иде! — дип мөрәҗәгать итә, һәм Аллаһы аңа сораганын бирә.

¹¹Шуханың ир туганы Кәлүбтән Мехир дөньяга килде; Мехир — Эштонның,

¹²Эштон — Бәйт-Рапа, Пасеах һәм Техиннаның, Техинна исә Ир-Нахашның атасы иде. Болар барысы да — Рекә шәһәрендә яшәүчеләр.

¹³Кыназның Отниел һәм Сераяһ атлы угыллары бар иде. Отниелнең угыллары исә болардыр: Хатат һәм Мегонотай [21].

¹⁴Мегонотайдан — Офра, Сераяһтан Йоав туды. Йоав — Ге-Харашимнең [22] атасыдыр; әлеге җирдә яшәгән кешеләр оста һөнәрчеләр иде.

¹⁵Ифунни углы Кәлебнең Иру, Элаһ һәм Нагам атлы угыллары бар иде. Ә Элаһтан Кыназ туды.

¹⁶Яһаллелелның угыллары: Зиф, Зифа, Тирия һәм Асарһел.

¹⁷ 17-18 Эзраның Етер, Меред, Эфер һәм Ялон атлы угыллары булды. Меред хатынлыкка алган фиргавен кызы Битьядән бер кыз — Мәрьям, һәм ике угыл — Шаммай белән Ишбах дөньяга килде. Ишбах — Эштемоганың атасыдыр. Мереднең яһүди хатыны исә Гедорның атасы Ередны, Сөкөһнең атасы Хеберны һәм Зануахның атасы Якутиелне тапты.

¹⁸

¹⁹Нахамның кыз туганыннан — Һодиянең хатыныннан — гәрми Кыгыйләнең атасы һәм мәгакәһи Эштемоганың атасы туды.

²⁰Шимуннан Амнун, Ринна, Бен-Ханан һәм Тилун дөньяга килде. Ишидән Зохет һәм Бен-Зохет туды.

²¹Яһүдә углы Шеланың нәсел варислары: Леханың атасы Эр, Марешаның һәм Бәйт-Ашбеадагы җитен эшкәртүче эшчеләр кабиләсенең атасы Лада,

²²Йокыйм, Көзебә шәһәрендә яшәүчеләр, Мәабта идарә иткән Йоаш белән Сараф, шулай ук Яшуби-Лехем. (Бу мәгълүмат — борынгы язмалардан.)

²³Әлеге кешеләр чүлмәкчеләр иде; алар, Нетагыйм һәм Гедера каласында яшәп, патшага хезмәт күрсәттеләр.

²⁴Шимуннан Немуил, Ямин, Яриб, Зерах һәм Шаул атлы угыллар туды.

²⁵Шаулдан соң нәсел җебенең дәвамы: Шаллум, Мибсам, Мишма,

²⁶Хаммуил, Зәкүр, Шимгый.

²⁷Шимгый — уналты ир бала вә алты кыз баланың атасыдыр. Әмма Шимгыйның ир туганнарында угыллар алай күп тумый — аларның нәселе Яһүдә ыругыныкы сыман күп санлы түгел.

²⁸Шимгыйның кыз-угыллары Беер-Шеба, Молада, Хатсар-Шугал,

²⁹Билһа, Эсем, Толад,

³⁰Бетуил, Хорма, Сыйкләг,

³¹Бәйт-Мәркәбүт, Хатсар-Сусим, Бәйт-Бири һәм Шагараимдә яшәде. Патша тәхетенә Давыт утырганчы, әлеге шәһәрләр аларныкы булып кала бирде.

³²Алар шулай ук биш кала — Этам, Аин, Риммун, Төкен һәм Ашанда,

³³әлеге калалар тирәсендәге авылларда — Багалга кадәр сузылган җирләрдә дә яшәделәр. Аларның көн күргән һәм нәселләренең исемлеге теркәлеп барган җирләре шушыдыр.

³⁴Мешубаб, Ямлек, Амасия углы Йоша,

³⁵Йоил, Асиел углы Сераяһтан туган Йошибья углы Еһү,

³⁶Элиогынай, Ягакуба, Яшухая, Асая, Адиел, Ясимиел, Бенаяһ,

³⁷шулай ук Шәмәгыйя углы Шимридән туган Едайя углы Аллонның оныгы, ягъни Шифгыйның Зиза атлы углы —

³⁸югарыда саналган әлеге ирләрнең һәммәсе үз кабиләләренең җитәкчесе булып, аларның төп гаилә-йортлары шактый тармакланып китте

³⁹һәм алар, терлекләрен йөртер өчен яңа көтүлек җирләре эзләп, үзәнлекнең көнчыгышындагы Гедор читләренә кадәр барып җиттеләр

⁴⁰һәм яхшы, мул көтүлекле, иркен, тыныч вә хәвефсез җирләр таптылар; аларга кадәр анда Хам токымы яшәгән була.

⁴¹Шул рәвешле, алда исемнәре саналган әлеге кешеләр, Яһүдә патшасы Хизәкыйя патшалык иткән чорда шушы җирләргә килеп чыгып, анда яшәгән Хам токымы белән Мыгуним халкын кырып бетерделәр һәм аларның җирләрен тартып алдылар (алар бүгенге көндә дә шунда яши бирәләр), чөнки анда терлек-туар йөртердәй көтүлек җирләре мул була.

⁴²Шимун угылларыннан биш йөз кеше исә Сәгыйрь тауларына таба юнәлде, алгы сафларда Иши угыллары Пелатия, Ныгарья, Репая һәм Уззиел булды;

⁴³алар, шул тарафларга качып киткән амалыкыйларның калдыкларын кырып бетереп, әле дә шул җирләрдә көн күреп яталар.