Read Изге Язма, 2015 I Елъязма 5 Bible Online

I Елъязма 5 - Изге Язма, 2015 bible

I Елъязма 5

¹Рубин — Исраилнең беренче баласы иде, әмма атасының ятагын мәсхәрә иткән [23] өчен, Исраилнең беренче угыл хокукы Йосыфка тапшырылды. Нәсел шәҗәрәсендә Рубин баш угыл буларак теркәлмәгән.

²Үзенең ир туганнары арасында Яһүдә иң көчлесе иде, һәм аның гаиләсеннән юлбашчы чыкты, әмма беренче бала хокукы Йосыфка күчте.

³Исраилнең беренче баласы Рубин угыллары: Ханох, Паллу, Хесрон һәм Кәрми.

⁴Йоилнең нәсел шәҗәрәсе: Йоил, Шәмәгыйя, Гог, Шимгый,

⁵Михә, Реһая, Багал,

⁶Беһерә. Әлеге Беһерәне Ашшур патшасы Тилгат-Пилнеһесер [24] әсирлеккә алды. Беһерә — Рубин ыругының җитәкчесе иде.

⁷Нәсел шәҗәрәсендә кабилә-кабилә булып теркәлгәнчә, аның ир туганнары: иң өлкәне — Егыил, аннары Зәкәрия

⁸һәм Бела. Йоил токымыннан Бела — Азазның углы, Шеманың оныгы. Алар Арогырда, Нәбу һәм Багал-Мегон шәһәрләрендә яши;

⁹Гилыгад төбәгендә терлекләре артып китеп, алар көнчыгышка таба — Фырат елгасына чиктәш чүл читенә кадәр җирләрне били башлыйлар.

¹⁰Шаул патшалык иткән заманнарда һаҗәриләргә каршы сугышта җиңеп чыгып, алар Гилыгад җиренең көнчыгыш тарафындагы биләмә-чатырларны яулап алалар.

¹¹Гәд ыругы исә аларның каршында, Сәлкә шәһәренә кадәр җәелгән Башан җирләрендә көн күрде.

¹²Башанда түрә булып Йоил утырды, аңардан кала икенче түрә булып Шафам, аннары Янай һәм Шафат тора иде.

¹³Аларның кардәшләре (һәркем үз нәсел-гаиләсе белән) җидәү иде: Микәил, Мешуллам, Шеба, Йорай, Якән, Зиа һәм Гыйбер.

¹⁴Алар һәммәсе Абихаил угыллары булып, Абихаил үзе — Хуринең, Хури — Яруахның, Яруах — Гилыгадның, Гилыгад — Микәилнең, Микәил — Яшишайның, Яшишай — Яхдуның, Яхду исә Бузның углы иде.

¹⁵Ә Гүни углы Абдиелдән туган Ахи үз нәселенең башлыгы иде.

¹⁶Гәдләр Гилыгадта, Башанда һәм аның тирәсендәге авылларда, Шаронда барча көтүлекләрне биләп көн күрде;

¹⁷аларның исемнәре, Яһүдә патшасы Иотам, Исраил патшасы Яробам идарә иткән заманда, нәсел шәҗәрәләренә теркәлгән була.

¹⁸Рубиннәрдә һәм гәдләрдә, шулай ук Көнчыгыш менашшеларда [25] кылыч вә калкан тотардай, ук атардай, сугыш һөнәрен белгән кырык дүрт мең җиде йөз алтмыш гаскәри бар иде.

¹⁹Һаҗәриләргә, Итур, Нафиш һәм Нодаб гаскәрләренә каршы сугышка чыккач, алар,

²⁰Аллаһыдан ярдәм алып, дошманнарын җиңеп чыктылар, чөнки, орыш барган мәлдә, Аллаһы аларның ялынып-ялваруларын ишетте һәм Үзенә булган ышану хакына җавапсыз калмады.

²¹Алар дошманның илле мең дөя, ике йөз илле мең сарык, ике мең данә ишәктән гыйбарәт булган көтү-көтү малларын үз кулына төшереп, шулай ук йөз мең кешесен әсир иттеләр;

²²дошманның күбесе исә яу кырында ятып калды, чөнки әлеге сугыш белән Аллаһы Үзе идарә итте. Биләп алган шушы җирләрдә гәдләр сөргенгә куылганчы гомер кичерделәр.

²³Менашше ыругына караган кабиләләрнең бер яртысы Башаннан алып Багал-Хәрмун, Сенир һәм Хәрмун тавына кадәр булган җирләрдә көн күрде; аларның саны исәпсез-хисапсыз иде.

²⁴Аларның гаилә башлыклары шулардыр: Эфер, Иши, Элиел, Азриел, Иремия, Һодавия һәм Яхдиел. Батыр гаскәриләр булып саналган әлеге ир-егетләр үз гаиләләренең мәшһүр җитәкчеләре иде.

²⁵Әмма алар үзләренең ата-бабалары табынган Аллаһыга тугры булмадылар, Аллаһы аларның күз алдында һәлак иткән халыкларның потларына табына башладылар.

²⁶Шуңа күрә Исраил Алласы ихтыяры буенча Ашшур патшасы Пул, ягъни Ашшур патшасы Тилгат-Пилнеһесер, Рубин белән Гәд ыругларын һәм Көнчыгыш менашшеларны әсирлеккә төшереп, аларны Халак, Хабур, Һара җирләренә, шулай ук Гөзән елгасы буена сөрде. Әлеге ыруглар хәзерге көндә дә шул җирләрдә гомер итеп яталар.