Read Изге Язма, 2015 II Елъязма 26 Bible Online

II Елъязма 26 - Изге Язма, 2015 bible

II Елъязма 26

¹Шушы хәлләрдән соң бөтен Яһүдә халкы уналты яшьлек Уззияне [35] атасы Амасия урынына патша итеп куйды.

²Амасия ата-бабалары янында мәңгелек йокыга талганнан соң, Уззия өр-яңадан Элат каласын тергезде һәм аны кабат Яһүдәгә кайтарды.

³Тәхеткә утырганда, Уззия уналты яшендә булып, Иерусалимдә ул илле ике ел дәвамында идарә итте. Аның әнкәсе Якүлья тумышы белән Иерусалим кызы иде.

⁴Уззия, Раббы күзенә ятышлы күренгән гамәлләр кылып, һәр нәрсәдә атасы Амасияне кабатлады.

⁵Зәкәрия исән чакта, Уззия Аллаһының йөз нурын табарга омтылып яшәде; һәм Зәкәрия аны Аллаһыдан куркырга өйрәтте. Уззия Раббыны эзләп яшәгән көннәрдә, Аллаһы аның тормышын уңышлы итте.

⁶Уззия, яуга кузгалып, пелештиләр белән сугышты, Гәттә, Явнедә һәм Ашдодта шәһәр диварларын җимерде; шуннан соң Ашдод янында һәм Пелешет җиренең төрле урыннарында калалар төзеде.

⁷Пелештиләргә, Гур-Багалда яшәүче гарәпләргә һәм Мыгуним халкына каршы алып барган сугышларда Аллаһы аны Үзенең ярдәменнән ташламады.

⁸Аммониләр Уззиягә салым түләп торды, шул рәвешле, аның даны Мисыр чикләренә кадәр таралды, чөнки ул гаҗәеп дәрәҗәдә көчле иде.

⁹Уззия, Иерусалимнең Почмак капкасында, Үзән капкасында, шулай ук шәһәр дивары борылган урында манаралар куйдырып, аларны ныгытты;

¹⁰чүлләрдә дә манаралар салдырды. Үзәндә һәм уйсулыкларда аның күп санлы маллары утлап йөргәнгә, ул байтак кына коелар казытты; күңеле игенчелеккә ятканга күрә, тау битләрендә һәм уңдырышлы җирләрдә игенчеләре, бакчачылары эшләде.

¹¹Уззиянең исемлеккә теркәлеп төркемнәргә бүленгән, сугышка әзер, өйрәтелгән гаскәре бар иде. Бу исемлек патша түрәсе Ханания карамагындагы кәтип Егыил һәм Магасея атлы бер түрә тарафыннан төзелә иде.

¹²Әлеге батыр сугышчылар белән ике мең алты йөз кабилә башлыгы җитәкчелек итте.

¹³Алар кул астында дошманнарга каршы көрәшләрдә патшага ярдәм итәрдәй өч йөз җиде мең дә биш йөз батыр-көчле сугышчы бар иде.

¹⁴Уззия бөтен гаскәр өчен калкан вә сөңге, очлым вә көбә кием, җәя вә ташаткыч өчен таш әзерләде.

¹⁵Иерусалимдә ул оста итеп эшләнгән җайланмалар ясатты. Әлеге җайланмалар манара башларына, дивар почмакларына куелып, югарыдан ук һәм таш очырта иде. Шул рәвешле, Уззиянең даны еракларга таралды, чөнки Аллаһы ярдәме белән ул кодрәтле патшага әйләнде.

¹⁶Әмма көче арткан саен, аның йөрәгендә тәкәбберлек тә үсә барды, һәм шул нәрсә аны һәлакәткә китерде дә: ул, мәзбәх өстендә хуш исле сумала-майлар көйрәтергә дип Раббы йортына аяк басып, үзенең Раббы Алласы алдында гөнаһ эш кылды.

¹⁷17-18 Рухани Азария һәм аның белән бергә Раббының сиксән кыю рухание, патша Уззияне тоткарламакчы булып, аның артыннан иярде һәм: — Раббы хөрмәтенә хуш исле сумала-майлар көйрәтү синең эш түгел, Уззия; шушы эшкә багышланган руханиларның, Һарун угылларының вазифасы ул; син хилаф эш кыласың, чык изге урыннан, бу эшең өчен Раббы Алла сиңа мәртәбә өстәмәс! — диде.

¹⁹Раббы йортының сумала-майлар көйрәтү мәзбәхе каршында сумала-майлар көйрәтү савытын тотып торган Уззиянең аларга бик нык ачуы килде; һәм шул вакытны, руханиларга ачуы кузгалган чакта, руханиларның күз алдында Уззия патшаның маңгаена махау зәхмәте бәреп чыкты.

²⁰Баш рухани Азария һәм башка руханилар, Уззия маңгаендагы махау зәхмәтен күреп, аны Раббы йортыннан чыгарга мәҗбүр иттеләр; патша үзе дә тизрәк чыгып китү җаен карады, чөнки Раббы аңа зыян салган иде.

²¹Уззия патша, ахыргы сәгатенә кадәр махау зәхмәтеннән азапланып, аерым йортта яшәде; аңа Раббы йортына керү дә тыелган иде. Аның углы Иотам патша сараен да кайгыртты, Яһүдә җирендә яшәүче халык белән дә идарә итте.

²²Уззия патшалык иткән чордагы башка вакыйгалар, беренчесеннән алып соңгысына кадәр, Амотс углы пәйгамбәр Ишагыйя тарафыннан язып калдырылган.

²³Уззия, дөнья куеп, махау зәхмәтле булганга күрә, патша төрбәләре тирәсендә, патшалар күмелә торган кырда ата-бабалары янында дәфен кылынды. Аның урынына патша булып углы Иотам килде.