Read Изге Язма, 2015 II Елъязма 8 Bible Online

II Елъязма 8 - Изге Язма, 2015 bible

II Елъязма 8

¹Раббы йортын һәм үзенең сараен төзүгә Сөләйман егерме елын сарыф итте.

²Аннары Сөләйман Хирам биргән шәһәрләрне төзекләндерде һәм әлеге калаларда яшәргә исраилиләрне күчерде.

³Шуннан Сөләйман, Хамат-Собага каршы яуга кузгалып, аны яулап алды.

⁴Сөләйман чүлдә Тадмор шәһәрен, шулай ук, азык-төлек саклар өчен, Хаматта үзе нигезләгән шәһәрләрнең барысын төзеп бетерде.

⁵Югары Бәйт-Хорун белән Түбән Бәйт-Хорун калаларын кабаттан яңартты — диварлары корылган, капкалары, бикләре куелган ныгытмаларга әйләндерде;

⁶Багалат шәһәрен төзеде, азык-төлек саклар, сугыш арбалары тотар, атлар асрар өчен, шәһәрләр салды. Иерусалимдә, Ливанда һәм үзе идарә иткән бөтен җирләрдә үзе теләгән һәммә нәрсәне шулай төзеп бетерде.

⁷ 7-8 Исраилиләр кырып бетерә алмаган һәм алар арасында яшәп калган, Исраил нәселеннән булмаган халыкларны — хитти, амори, фәризи, хивви һәм явүсиләр токымын — Сөләйман мәҗбүр эшчеләр итте, һәм бу хәл бүгенге көндә дә дәвам итә.

⁹Исраилиләрдән исә Сөләйман үзенең эшләрен эшләтмәде, аларны кол итмәде: алар аның сугышчылары, гаскәр башлыклары, сугыш арбаларында һәм атлы гаскәрендә яубашлары булды.

¹⁰Халык белән идарә итәр өчен, Сөләйман патшаның ике йөз илле түрәсе бар иде.

¹¹Фиргавен кызын Сөләйман Давыт шәһәреннән махсус аның өчен салынган йортка күчерде: — Минем хатыным Исраил патшасы Давыт йортында яшәргә тиеш түгел, — диде ул, — чөнки Раббы сандыгы кергән урыннар изгедер.

¹²Шушы вакытларда Сөләйман болдыр каршында урнашкан Раббы мәзбәхендә Раббыга багышлап тулаем яндыру корбаннары китерә башлады;

¹³шимбә көннәрдә, Яңа ай бәйрәмендә һәм ел саен билгеләп үтә торган өч бәйрәмдә — Төче күмәч, Атналар һәм Чатырлар бәйрәмендә — Мусаның күрсәтмәләрендә әйтелгән көндәлек корбаннарны китерә торган булды.

¹⁴Ул, үзенең атасы Давыт әйтеп калдырганча, руханиларны вә левиләрне, башкарган хезмәтләренә карап, төркемнәргә бүлде. Левиләр Раббыга мактау яудырдылар һәм көн дә үтәлергә тишле хезмәтләрендә руханиларга ярдәм иттеләр. Аллаһы кешесе Давыт кушканча, Сөләйман төркемнәргә бүлеп һәр капка янына сакчылар билгеләде.

¹⁵Патшаның руханилар һәм левиләргә кагылышлы боерыклары, хәзинә саклагычына яисә нинди дә эшкә нисбәтле булуга карамастан, тайпылышсыз үтәлеп килде.

¹⁶Раббы йортының нигезе салынган көннән башлап төзелеш тәмамланганчы, Сөләйман бөтен эшне әнә шулай оештырган иде; һәм, шулай итеп, Раббы йорты төзелеп бетте.

¹⁷Шуннан Сөләйман диңгез буена, Эдом җирендәге Эсион-Гебер һәм Элот [12] шәһәрләренә таба юл алды.

¹⁸Хирам аңа диңгез эшен белүче хезмәтчеләре белән бергә корабларын җибәрде; һәм әлеге хезмәтчеләр, Сөләйман кешеләре белән берлектә Офир тарафына юл алып, Сөләйман патшага дүрт йөз илле талант алтын алып кайтып бирделәр.