Read Изге Язма, 2015 Эзра 10 Bible Online

Эзра 10 - Изге Язма, 2015 bible

Эзра 10

¹Эзра, Аллаһы йорты каршында йөзтүбән капланып, елый-елый гөнаһларын таныган, дога кылган чагында, аның янына бик күп исраилиләр — ир-ат, хатын-кыз вә бала-чага җыелды, алар да ачыргаланып күз яшьләре түкте.

²Элам нәселеннән Ехиел углы Шекания Эзрага болай дип әйтте: — Аллабызга тугры булмадык без — чит кавемнәрдән хатыннар алдык, әмма Исраил халкының хәле әле өметсез түгел.

³Әйдәгез, Аллабыз белән килешү төзик: син әфәндемнең һәм Аллабыз боерыкларын ихтирам итүчеләрнең киңәше буенча, хатыннарыбызны һәм алардан туган балаларны аерып җибәрик — барысы да Канун буенча эшләнсен.

⁴Аягыңа торып бас — бу эш сиңа йөкләнә! Без синең белән! Эшкә кереш һәм нык бул!

⁵Эзра аягына торып басты һәм руханиларны, левиләрне, Исраил халкының башлыкларын, әйтелгәннәрне үтәрбез, дип ант иттерде.

⁶Аннары ул, Аллаһы йорты алдындагы мәйданнан китеп, Эльяшиб углы Еһоханан торагына юнәлде һәм шунда төн кунды. Сөргеннән кайткан исраилиләрнең хыянәте өчен борчылып, ул ашамады да, эчмәде дә.

⁷Шуннан соң бөтен Яһүдә җирендә һәм Иерусалимдә: «Сөргендә булган барлык кешеләр Иерусалимгә җыелсын.

⁸Өч көн дәвамында килеп җитмәгән кешенең барлык мал-мөлкәте, башлыкларның вә өлкәннәрнең кушуы буенча, тартып алыначак, ә үзе ул сөргеннән кайткан халык арасыннан куылачак», — дип игълан иттеләр.

⁹Өч көн эчендә Яһүдә вә Беньямин ыругы ирләре Иерусалимгә җыелды. Бу хәл тугызынчы айның егерменче көнендә булды. Бар халык Аллаһы йорты алдындагы мәйданда шушы хәлдән һәм коеп яуган яңгырдан калтырап утырды.

¹⁰Рухани Эзра, урыныннан торып, халыкка болай диде: — Сез Раббыга хыянәт иттегез: чит кавемнәрдән хатыннар алып, Исраилнең гаебен арттырдыгыз.

¹¹Инде аталарыбызның Раббы Алласы алдында гөнаһларыбызны танып, Аның ихтыярын үтәгез: җирле кавемнәр һәм шулардан алган хатыннарыгыз белән араны өзегез!

¹²Җыелган халык: — Син ничек әйтсәң, шулай эшләрбез! — дип кычкырды.

¹³— Әмма биредә халык күп, яңгыр да ява, шуңа күрә ачык һавада басып тора алмыйбыз. Аннары бер-ике көндә генә хәл итә торган эш түгел бу, чөнки күбебез гаепле.

¹⁴Шулай эшлик: бу эшне бөтен җәмәгать исеменнән башлыкларыбыз үз өстенә алсын. Чит кавемнәрдән үзенә хатын алган кеше билгеләнгән вакытка үз шәһәренең өлкәннәре вә хөкемчеләре белән бирегә килсен. Шушы гөнаһыбыз аркасында Аллабызның безгә кабынган ярсуы басылыр.

¹⁵(Асаһел углы Йонатан вә Тикъва углы Яхзия генә бу эшкә каршы төште, ә Мешуллам вә леви Шаббетай аларның фикерен хуплап чыкты.)

¹⁶Сөргеннән кайтканнар нәкъ шулай эшләделәр дә. Рухани Эзра, һәрберсен исеме белән атап, гаилә-йорт башлыклары булган ир-атларны сайлап алды. Сайлап куелган башлыклар унынчы айның беренче көнендә бу мәсьәләне тикшерә башладылар.

¹⁷Чит кавемнәрдән хатын алган һәр кешенең эшен алар беренче айның беренче көненә карап бетерделәр.

¹⁸Чит кавемнәрдән хатын алган кешеләр түбәндәгеләр: Руханилар токымыннан: Йосадак углы Ешуа нәселеннән һәм аның туганнарыннан — Магасея, Элигызыр, Яриб вә Гедалия.

¹⁹(Алар хатыннарын аерып җиберергә вәгъдә бирделәр һәм гөнаһлары өчен сарык тәкәсе корбан иттеләр.)

²⁰Иммер нәселеннән: Ханани вә Зәбәдия.

²¹Харим нәселеннән: Магасея, Элия, Шәмәгыйя, Ехиел вә Уззия.

²²Пашхур нәселеннән: Элиогынай, Магасея, Исмәгыйль, Нетанел, Йозабад вә Элгаса.

²³Левиләрдән: Йозабад, Шимгый вә Кыйлая (яисә Кылита), Петахия, Яһүдә вә Элигызыр.

²⁴Җырчылардан: Эльяшиб. Капка сакчыларыннан: Шаллум, Телем вә Ури.

²⁵Башка исраилиләрдән түбәндәгеләр: Паргош нәселеннән: Рамия, Иззия, Малкия, Миямин, Элгазар, Малкия вә Беная.

²⁶Элам нәселеннән: Маттания, Зәкәрия, Ехиел, Әбди, Еремот вә Элия.

²⁷Затту нәселеннән: Элиогынай, Эльяшиб, Маттания, Еремот, Забад вә Азиза.

²⁸Бебай нәселеннән: Еһоханан, Ханания, Зәббай вә Атлай.

²⁹Бани нәселеннән: Мешуллам, Мәллүк, Адая, Яшуб, Шеал вә Еремот.

³⁰Пахат-Мәаб нәселеннән: Әднә, Келал, Беная, Магасея, Маттания, Бесалел, Биннуй вә Менашше.

³¹Харим нәселеннән: Элигызыр, Ишшия, Малкия, Шәмәгыйя, Шимун,

³²Беньямин, Мәллүк, Шемария.

³³Хашум нәселеннән: Маттынай, Маттата, Забад, Элифелет, Еремай, Менашше вә Шимгый.

³⁴Бани нәселеннән: Магадай, Амрам, Уил,

³⁵Беная, Бәдия, Келуһи,

³⁶Вания, Меремот, Эльяшиб,

³⁷Маттания, Маттынай вә Ягасай.

³⁸Биннуй нәселеннән: Шимгый,

³⁹Шелемия, Натан, Адая,

⁴⁰Мәкнәдеббай, Шашай, Шарай,

⁴¹Азарел, Шелемия, Шемария,

⁴²Шаллум, Амария вә Йосыф.

⁴³Нәбу нәселеннән: Егыил, Мәттития, Забад, Зәбинә, Яддай, Йоил вә Беная.

⁴⁴Болар һәммәсе үзләренә чит кавем хатыннары алып, аларның кайберләре инде бала да тапкан иде.