Read Изге Язма, 2015 Эзра 8 Bible Online

Эзра 8 - Изге Язма, 2015 bible

Эзра 8

¹Артахшаста патшалык иткән чорда минем белән бергә Бабилдән киткән нәсел башлыклары һәм аларның токымы түбәндәгеләр:

²Пинхәс нәселеннән — Гершом; Итамар нәселеннән — Даниил; Давыт нәселеннән — Шекания углы Хаттуш;

³Паргош нәселеннән — Зәкәрия һәм аның белән бергә шәҗәрә исемлеге буенча йөз илле ир-ат;

⁴Пахат-Мәаб нәселеннән — Зерахия углы Эльеһогынай һәм аның белән бергә ике йөз ир-ат;

⁵Затту нәселеннән — Яхәзиел углы Шекания һәм аның белән бергә өч йөз ир-ат;

⁶Әдин нәселеннән — Йонатан углы Эбед һәм аның белән бергә илле ир-ат;

⁷Элам нәселеннән — Аталия углы Ишагыйя һәм аның белән бергә җитмеш ир-ат;

⁸Шефатия нәселеннән — Микәил углы Зәбәдия һәм аның белән бергә сиксән ир-ат;

⁹Йоав нәселеннән — Ехиел углы Убадия һәм аның белән бергә ике йөз унсигез ир-ат;

¹⁰Бани нәселеннән — Йосыпия углы Шеломит һәм аның белән бергә йөз алтмыш ир-ат;

¹¹Бебай нәселеннән — Бебай углы Зәкәрия һәм аның белән бергә егерме сигез ир-ат;

¹²Әзгәд нәселеннән — Һаккатан углы Йоханан һәм аның белән бергә йөз ун ир-ат;

¹³Адоникам нәселеннән (соңрак кайтканнары) — Элифелет, Егыил, Шәмәгыйя һәм алар белән бергә алтмыш ир-ат;

¹⁴Бигвәй нәселеннән — Утай, Забуд һәм алар белән бергә җитмеш ир-ат.

¹⁵Мин аларны Аһавага коючы елга буена җыйдым, без анда өч көн тордык, халыкны вә руханиларны карап чыктым, ләкин анда Леви ыругыннан беркемне дә тапмадым.

¹⁶Шуннан соң мин, башлыклардан Элигызырны, Ариилне, Шәмәгыйяне, Элнатанны, Ярибне, Элнатанны, Натанны, Зәкәрияне, Мешулламны, остазлардан Йоярибне вә Элнатанны чакыртып, кеше юлладым.

¹⁷Әлеге йомышчыларны мин Кәсипә төбәгенең башлыгы Идду янына җибәрдем һәм, Аллабыз йортына хезмәтчеләр алып килегез, дип Иддуга һәм аның кардәшләренә — Кәсипә төбәгендә яшәүче Аллаһы йорты хезмәтчеләренә әйтергә куштым.

¹⁸Аллабыз ярдәме белән алар Исраил углы Леви ыругыннан Махлинең нәсел варисы — акыллы вә зирәк ир Шәрәбия белән бергә аның угылларыннан һәм ир туганнарыннан унсигез кешене,

¹⁹шулай ук Хәшәбияне, аның белән бергә Мерари нәселеннән Ишагыйяне һәм аның ир туганнарыннан вә угылларыннан егерме кешене,

²⁰кайчандыр Давыт патша һәм аның түрәләре левиләргә ярдәм күрсәтергә билгеләгән хезмәтчеләрдән тагын ике йөз егерме кешене алып килделәр. Алар һәммәсе, исемнәре күрсәтелеп, аерым-аерым теркәлде.

²¹Шунда мин: «Безнең үзебезне, балаларыбызны, мал-мөлкәтебезне сәфәрдә сакла», — дип сорар өчен, Аллабыз алдында буйсынуыбызны күрсәтеп, Аһава елгасы буенда ураза игълан иттем.

²²Юлда безне дошманнан саклар өчен патшадан җәяүле вә атлы гаскәриләр сорарга оялдым, чөнки патшага: «Аллабыз Үзенә сыенган һәркемгә игелекле, ә Аны оныткан һәркемгә ачулыдыр!» — дип әйткән идек.

²³Шулай итеп, без ураза тоттык, Аллабызга ялвардык, һәм Ул ялваруларыбызны ишетте.

²⁴Шуннан соң мин баш руханиларга җитәкчелек иткән унике кешене — Шәрәбияне, Хәшәбияне һәм тагын ун кешене аерып алдым да

²⁵патша, аның киңәшчеләре, түрәләр һәм Бабилдә яшәүче исраилиләр Аллабыз йортына корбан итеп биргән алтын-көмеш вә савыт-сабаны аларга үлчәп бирдем.

²⁶Кулларына үлчәп тапшырганым шулдыр: көмеш — алты йөз илле талант, көмеш савыт-саба — йөз талант, алтын — йөз талант;

²⁷алтын җамаяклар — егерме данә, аларның бәһасе мең дарикка тәңгәл; һәм алтын бәһасендә йөргән, ялтырап торган иң яхшы бакырдан ике савыт.

²⁸Мин аларга әйттем: — Сез, шушы савытлар кебек, Раббыга багышлангансыз. Алтын белән көмеш — ата-бабаларыгызның Раббы Алласына ихтыяри иганәдер.

²⁹Баш руханилар, левиләр һәм Исраилнең нәсел башлыклары күз алдында үлчәп, Исраилдәге Раббы йортының хәзинәсенә тапшырганчы, бу әйберләрне кадерләп саклагыз, — дидем.

³⁰Шуннан соң руханилар вә левиләр үлчәнгән көмешне, алтынны вә савыт-сабаны Иерусалимдәге Аллаһы йортына илтү өчен кабул итеп алдылар.

³¹Иерусалимгә без Аһава елгасы буеннан беренче айның уникенче көнендә кузгалып киттек. Аллабызның кулы безне дошманнардан вә юлбасарлардан саклады.

³²Шулай итеп, Иерусалимгә килеп җиттек. Өч көннән соң

³³Аллабыз йортына килдек һәм алтын-көмешне, савыт-сабаны, үлчәп, руханилар Урия углы Меремот белән Пинхәс углы Элгазарга һәм левиләрдән Ешуа углы Йозабад белән Биннуй углы Нугадия кулына тапшырдык.

³⁴Һәммә нәрсә саналды, үлчәнде, һәм гомуми авырлыгы теркәп куелды.

³⁵Сөргеннән кайтканнар Исраил Алласына тулаем яндыру корбаны китерделәр: бөтен Исраил халкы өчен — унике үгез бозау, туксан алты сарык, җитмеш җиде бәрән; гөнаһ йолу өчен — унике кәҗә тәкәсе. Болар һәммәсе Раббыга корбан итеп яндырылды.

³⁶Сөргеннән кайткан кешеләр Елга аръягының өлкә башлыкларына вә түрәләренә патша боерыгын да җиткерделәр, һәм тегеләр Исраил халкына вә Аллаһы йортына ярдәм күрсәттеләр.