Read Изге Язма, 2015 Нәхәмия 3 Bible Online

Нәхәмия 3 - Изге Язма, 2015 bible

Нәхәмия 3

¹Шуннан баш рухани Эльяшиб белән бүтән руханилар, эшкә тотынып, Сарык капкасын төзеделәр. Изгеләштерү йоласын үткәреп, капканың ишекләрен элделәр, Меа [1] манарасыннан алып Хананел манарасына кадәр булган диварны изгеләштерделәр.

²Руханилар күршесендә диварны — әрихәлеләр, әрихәлеләрдән соң Имри углы Зәкүр төзеде.

³Балык капкасын Һассенаһа нәселе төзеде: алар борысларны, ишекләрне, йозакларны вә бикләрне куйды.

⁴Алардан арырак диварны Һаккостан туган Урия углы Меремот төзеде; алар белән янәшәдә Мишезәбелдән туган Бәрәхия углы Мешуллам, ә тагын да арырак Баһана углы Садыйк эшләде.

⁵Алар белән янәшәдә тыкуалылар эшләде, әмма Тыкуа аксөякләре, Хуҗа-Хакимнәре өчен эшләп, билләрен бөкрәйтмәде.

⁶Иске капканы Пасеах углы Йояда вә Бәсүдия углы Мешуллам төзеде: алар борысларны, ишекләрне, йозакларны, бикләрне куйды.

⁷Алар күршесендә — гибгонлы Мелатия, меронотлы Ядон һәм Елга аръягының өлкә башлыгына буйсынган Гибгон вә Миспа кешеләре эшләде.

⁸Алардан арырак диварны — Харһая углы көмешче Уззиел, тагын да арырак хушбуй ясаучы Ханания төзеде. Иерусалим диварларын алар Киң диварга җиткәнче төзәттеләр.

⁹Алар белән янәшәдә Иерусалим өлкәсенең бер яртысы белән идарә итүче Хүр углы Репая эшләде.

¹⁰Арырак — үз йорты каршында — Харумап углы Едайя, ә аның янында Хәшәбния углы Хаттуш эшләде.

¹¹Тагын да арырак диварны Харим углы Малкия вә Пахат-Мәаб углы Хашшуб төзеде; алар Мичләр манарасын да төзәттеләр.

¹²Алар күршесендә Иерусалим өлкәсенең икенче яртысы белән идарә итүче Һаллухеш углы Шаллум һәм аның кызлары эшләде.

¹³Үзәнлек капкасын Зануах кешеләре вә Ханун төзәтте: алар, аны төзеп, ишекләрен, йозакларын вә бикләрен куйды. Алар тагын Тирес капкасына кадәр мең терсәк [2] диварны төзәттеләр.

¹⁴Ә Тирес капкасын Бәйт-Һаккерем өлкәсе башлыгы Рехаб углы Малкия төзәтте; ул, аны төзеп, ишекләрен, йозакларын вә бикләрен куйды.

¹⁵Чишмә капкасын Миспа өлкәсе башлыгы, Хөл-Хөзе углы Шаллун төзәтте; ул, аны төзеп, түбәсен япты, ишекләрен, йозакларын вә бикләрен куйды. Ул әле тагын патша бакчасы каршында Шелах сусаклагычы янындагы һәм Давыт шәһәреннән төшүче басмаларга кадәрге диварны төзеде.

¹⁶Аңардан соң — Давыт гаиләсенең төрбәләре каршына, казылган буага, Батырлар йортына кадәр — Бәйт-Сур өлкәсенең бер яртысы белән идарә итүче Әзвук углы Нәхәмия эшләде.

¹⁷Аңардан арырак — Леви нәселеннән булган Бани углы Рәхум, ә аның янында, үз төбәгенең вәкиле буларак, Кыгыйлә өлкәсенең бер яртысы белән идарә итүче Хәшәбия эшләде.

¹⁸Тагын да арырак аның ир кардәше — Кыгыйлә өлкәсенең икенче яртысы белән идарә итүче Хенадад углы Баввай эшләде.

¹⁹Аның күршесендә — үр өстендәге коралханәгә илтүче юл каршында, почмакка кадәр — Миспа башлыгы Ешуа углы Эзер эшләде.

²⁰Аңардан арырак — почмактан алып баш рухани Эльяшиб йортының ишегенә кадәр — диварны Заббай углы Барух төзеде.

²¹Тагын да арырак — Эльяшиб йорты ишегеннән алып, шул йортның азагына кадәр — Һаккос углы Уриядән туган Меремот төзеде.

²²Аның күршесендә Иерусалимнең әйләнә-тирәсеннән килгән руханилар эшләде.

²³Алардан арырак — үз йортлары каршында — Беньямин вә Хашшуб, тагын да арырак — үз йорты каршында — Ананиядән туган Магасея углы Азария эшләде.

²⁴Янәшәдә — Азария йортыннан алып почмакка, борылышка кадәр — Хенадад углы Биннуй эшләде.

²⁵Аңардан арырак — каравыл йортының ишегалды белән чиктәш булган Өске патша сараеннан алгарак чыгып торган манара почмагыннан башлап — диварны Узай углы Палал төзеде. Паргош углы Пәдая

²⁶һәм Офел калкулыгында яшәүче Аллаһы йорты хезмәтчеләре эшләде. Алар диварны көнчыгышка таба — Су капкасы каршына һәм алгарак чыгып торган манарага кадәр төзәттеләр.

²⁷Тагын да арырак — алгарак чыгып торган манара каршыннан башлап, Офел диварына кадәр — тыкуалылар эшләде.

²⁸Диварның Ат капкасыннан арырак өлешен руханилар төзәтте; аларның һәркайсы үз йорты каршында эшләде.

²⁹Алар күршесендә, үз йорты каршында, — Иммер углы Садыйк, ә аның белән янәшәдә Көнчыгыш капканы саклаучы Шекания углы Шәмәгыйя эшләде.

³⁰Аңардан арырак диварны Шелемия углы Ханания вә Салапның алтынчы углы Ханун төзеде. Тагын да арырак, үз бүлмәсе каршында, Бәрәхия углы Мешуллам эшләде.

³¹Диварның шуннан соңгы өлешен — Аллаһы йорты хезмәтчеләре вә сәүдәгәрләр бинасына (ул бина Күзәтү капкасы каршында иде), өске бүлмәсе булган дивар почмагына кадәр — көмешче Малкия төзеде.

³²Ә шул почмак бүлмәдән башлап, Сарык капкасына кадәр диварны көмешчеләр вә сәүдәгәрләр төзеде.