Read Изге Язма, 2015 Чыгыш 1 Bible Online

Чыгыш 1 - Изге Язма, 2015 bible

Чыгыш 1

¹Мисырга Ягъкуб үзенең угыллары һәм аларның гаиләләре белән күченеп килә. Ягъкуб угылларының исемнәре түбәндәгечә:

²Рубин, Шимун, Леви, Яһүдә,

³Исәсхәр, Зәбулун, Беньямин,

⁴Дан, Нәптали, Гәд һәм Ашер.

⁵Ягъкубның нәсел варислары җитмеш кеше исәпләнеп, углы Йосыф бу вакытта инде Мисырда яши иде.

⁶Соңрак Йосыф үзе, аның барча ир туганнары һәм әлеге буынның барлык кешеләре дә үлеп бетә,

⁷ә исраилиләр үрчеп-ишәеп, аларның саны артканнан-арта бара. Шул рәвешле, алар бөтен Мисыр җире буйлап таралалар.

⁸Вакытлар үтеп, Мисыр тәхетенә Йосыф турында берни белмәүче патша килә.

⁹Үзенең халкына ул болай дип әйтә: — Карагыз, исраилиләр бездән күбрәк тә һәм безгә караганда көчлерәк тә!

¹⁰Безгә, бик әйбәт уйлап, алар белән нәрсәдер эшләргә кирәк. Югыйсә исраилиләр, тагын да ишәеп, яу-фәлән булган очракта, дошманнарыбызга кушылып, безгә каршы сугышырга һәм бездән аерылып китәргә мөмкиннәр.

¹¹Шуңа күрә мисырлылар, исраилиләрне авыр эш белән интектерү максатыннан, алар өстеннән назыйрлар билгеләделәр һәм, фиргавенгә мал-мөлкәт туплау өчен, Питом һәм Рәмесес шәһәрләрен төзергә мәҗбүр иттеләр.

¹²Әмма мисырлылар исраилиләрне нинди генә авырлыкларга дучар итсәләр дә, тегеләр артканнан-арта гына бардылар һәм ил буйлап һаман күбрәк таралдылар. Мисырлылар исраилиләрдән тагын да ныграк курка башладылар,

¹³шуңа күрә, һич кызганмыйча, аларны эшләргә мәҗбүр иттеләр.

¹⁴Мисырлылар, алардан балчык издереп, кирпеч суктырып, кырлардагы бөтен эшләрен эшләтеп, тормышларын аяныч хәлгә төшерделәр — исраилиләр нинди генә эштә булмасын, аларга карата миһербансыз кыландылар.

¹⁵Шифра һәм Пуга исемле гыйбри [1] кендек әбиләренә Мисыр патшасы болай диде:

¹⁶— Гыйбри хатын-кызларга бала табарга ярдәм иткәндә, яңа туган сабыйның нинди җенестән булуын карагыз: ир бала булса — үтерегез, кыз бала туса — калдырыгыз!

¹⁷Әмма кендек әбиләре Аллаһыдан курка һәм Аны хөрмәт итә иделәр, шуңа күрә Мисыр патшасы әмерен тыңламадылар — ир балаларны исән калдыра бардылар.

¹⁸Мисыр патшасы, кендек әбиләрен үз янына чакыртып: — Ни өчен сез болай эшлисез? Ни өчен яңа туган ир балаларны исән калдырасыз? — дип сорады.

¹⁹Кендек әбиләре фиргавенгә: — Гыйбри хатын-кызлар Мисыр хатын-кызлары кебек түгел, алар тазалар һәм, без барып җиткәндә, балаларын инде тудырган булалар, — дип җавап кайтардылар.

²⁰ 20-21 Кендек әбиләре Аллаһыдан курыкканга һәм Аны хөрмәт иткәнгә күрә, Ул аларга игелек күрсәтте — гаиләле итте. Исраилиләр исә артканнан-арта барды.

²²Ахыр чиктә, фиргавен үзенең барлык халкына әмер бирде: — Гыйбриләрнең яңа туган ир балаларын Нил елгасына ташлагыз, ә кыз балаларын исән калдырыгыз.