Read Изге Язма, 2015 Чыгыш 19 Bible Online

Чыгыш 19 - Изге Язма, 2015 bible

Чыгыш 19

¹ 1-2 Мисырдан китүләренең өченче аенда, айның беренче көнендә Исраил халкы Синай чүленә килеп җитте; Рефидимнән китеп, биредә тукталганнан соң, тау каршындагы бер урында чатырларын корды.

³Муса Аллаһы хозурына тауга менде, һәм Раббы таудан аңа болай дип сүз катты: — Ягъкуб токымына, ягъни Исраил халкына әйт:

⁴«Мисыр халкына Минем ниләр кылганымны һәм сезне, бөркет канатларына утырткандай, Мисырдан Үз яныма алып килгәнемне күрдегез.

⁵Хәзер, әгәр Миңа тулысынча буйсынсагыз һәм Минем белән төзегән килешүгә тугрылык сакласагыз, башка халыклар арасыннан Мин сайлап алган халык булырсыз. Бөтен җир — Минеке,

⁶ә сез Минем өчен руханилар патшалыгы, изге халык булырсыз». Минем шушы сүзләремне исраилиләргә җиткер.

⁷Шуннан соң Муса таудан төште һәм, халыкның өлкәннәрен җыеп, Раббы кушканнарның һәммәсен аларга җиткерде.

⁸Бар халык бертавыштан: — Без Раббы әйткәннәрнең барысын да үтәрбез, — дип җавап кайтарды. Муса халыкның җавабын Раббыга ирештерде.

⁹Раббы Мусага: — Халык Минем белән сөйләшүеңне ишетсен һәм сиңа һәрвакыт ышансын өчен, Мин синең янга куе болыт эчендә килермен, — диде. Кешеләрнең нәрсә әйткәнен Раббыга сөйләп биргәннән соң,

¹⁰Раббы Мусага болай диде: — Халык янына бар! Бүген һәм иртәгә аларны изгеләндер! Кешеләр үзләренең киемнәрен юсыннар һәм

¹¹өченче көнгә әзер булып торсыннар: Мин бөтен халыкның күз алдында Синай тавына төшәрмен.

¹²12-13 Син тау тирәли сызык сыз да халыкка әйт: «Сак булыгыз! Тауга күтәрелмәгез, хәтта тау итәгенә дә якынлашмагыз. Тауга орынган җан иясе — кешеме ул, хайванмы — үлем җәзасына тартылырга тиеш: аны таш яки ук атып үтерегез, тик кул белән кагылмагыз». Халык мөгез быргы кычкыртканны көтсен, бары тик шуннан соң гына алар тауга күтәрелә алырлар.

¹⁴Муса таудан төште дә халыкны изгеләндерде. Кешеләр үз киемнәрен юдылар.

¹⁵Муса халыкка: — Берсекөнгә әзер булып торыгыз, аңарчы хатыннарыгыз белән якынлык кылмагыз, — дип әйтеп куйды.

¹⁶Өченче көнне иртән тауга куе болыт төште, күк күкрәп, яшен яшьнәде һәм быргының колак яргыч тавышы ишетелде — стандагы халык курка калды.

¹⁷Шулвакыт Муса кешеләрне, Аллаһы белән очрашырга дип, станнан алып чыкты, һәм алар тау итәге янына килеп бастылар.

¹⁸Синай тавы төтенгә күмелде, чөнки Раббы тауга ут эчендә төште. Таудан, мичтән чыккан сыман, төтен бөркелә иде. Тау тоташтан селкенеп торды.

¹⁹Быргы тавышы көчәйгәннән-көчәя барды. Шулчак Муса Аллаһыга мөрәҗәгать итте, һәм Аллаһы, күк күкрәтеп, аңа җавап кайтарды.

²⁰Раббы Синай тавының башына төште һәм Мусаны Үз янына чакырды. Шуннан Муса тауга күтәрелде.

²¹Раббы Мусага әйтте: — Аска төш тә халыкны кисәт: Мине күрергә дип ашкынмасыннар, югыйсә күбесе үләр.

²²Хәтта Миңа якынлашырга җыенган руханилар да үзләрен пакьләргә тиеш; пакьләмәсәләр, аларны да һәлак итәрмен.

²³— Халык Синай тавына менә алмый, — диде Муса. — Син бит тау тирәли сызык сызарга һәм шул җирне изге дип исәпләргә куштың.

²⁴— Аска төш, — дип җавап кайтарды Раббы, — һәм бирегә Һарунны алып мен. Әмма руханилар һәм халык Минем янга тауга менәргә ашкынмасын, юкса Мин аларны җәзалармын.

²⁵Муса аска — халык янына төшеп, боларның барысын да аларга сөйләп бирде.