Read Изге Язма, 2015 Чыгыш 24 Bible Online

Чыгыш 24 - Изге Язма, 2015 bible

Чыгыш 24

¹Шуннан соң Раббы Мусага: — Син үзең, Һарун, Надаб, Абиһу һәм җитмеш Исраил өлкәне тауга күтәрелегез дә ерактан гына Миңа табыныгыз.

²Әмма Раббы янына Муса үзе генә якынлашсын, ә калганнар моны эшләмәсен. Халык исә аның белән тауга менәргә тиеш түгел, — диде.

³Муса, халык янына барып, Раббының барлык сүзләре һәм кануннары турында сөйләп бирде, һәм барысы да бертавыштан: — Без Раббының барлык сүзләрен үтәрбез, — дип җавап кайтарды.

⁴Раббының барлык сүзләрен Муса язып алды, ә иртәгесен иртүк торып, тау итәгендә мәзбәх төзеде һәм Исраилнең һәр ыругыннан бер таш исәбеннән унике таш утыртып куйды.

⁵Аннары Муса Исраил егетләрен корбанлык мал алып килергә җибәрде. Бу егетләр тулаем яндыру корбаннары китерделәр һәм үгезләрне, татулык корбаны буларак, Раббыга тәкъдим иттеләр.

⁶Муса, бу хайваннарның канын алып, яртысын касәләргә салды, ә калган яртысын мәзбәхкә чәчрәтте.

⁷Муса төргәккә язылган Килешүне халыкка укыды, һәм кешеләр: — Без Раббының барлык сүзләрен үтәрбез һәм Аңа буйсынырбыз, — диделәр.

⁸Шулчак Муса корбан канын халык өстенә чәчрәтте һәм әйтте: — Бу — Раббының сезнең белән төзегән Килешүне раслаучы кан. Шушы барлык сүзләр — Килешүнең нигезе.

⁹Шуннан соң Муса, Һарун, Надаб, Абиһу һәм Исраилнең җитмеш өлкәне тауга күтәрелделәр

¹⁰һәм шунда Исраил Алласын күрделәр. Аның аяклары астында зәңгәр якуттан ясалган, аяз күк төсендә басма сыман бер нәрсә бар иде.

¹¹Исраилнең башлыклары Аллаһыны күрделәр, әмма Аллаһы, кулын сузып, аларга зыян китермәде, һәм алар ашадылар, эчтеләр.

¹²Раббы Мусага: — Минем янга тауга күтәрел һәм шунда кал. Мин Үземнең канун һәм боерыкларымны, ике таш тактага язып, халыкка җиткерү өчен, сиңа бирермен, — диде.

¹³Муса һәм аның ярдәмчесе Ешуа юлга кузгалдылар, һәм Муса Аллаһы тавына күтәрелде.

¹⁴Өлкәннәргә ул: — Без сезнең янга әйләнеп кайтканчы, безне шушында көтегез; Һарун белән Хүр сезнең янда кала — дәгъваларын чишәр өчен, кешеләр аларга мөрәҗәгать итсен, — диде.

¹⁵Муса менеп җитүгә, тауны болыт каплап алды.

¹⁶Раббы шөһрәте Синай тавына иңде, һәм болыт алты көн буена тауны каплап торды, ә җиденче көнне Раббы болытлар арасыннан Мусага мөрәҗәгать итте.

¹⁷Исраилиләр тау башында ялкынланып янган утка охшаган Раббы шөһрәтен күрделәр.

¹⁸Муса, тауга күтәрелеп, болытлар эченә керде; әлеге тауда ул кырык көн һәм кырык төн булды.