Read Изге Язма, 2015 Чыгыш 25 Bible Online

Чыгыш 25 - Изге Язма, 2015 bible

Чыгыш 25

¹Раббы Мусага болай диде:

²— Исраилиләргә әйт: Миңа бүләкләр китерсеннәр, ә син бирергә теләгән һәркемнән бүләкне кабул итеп ал.

³Син алардан түбәндәге әйберләрне ал: алтын, көмеш, бакыр,

⁴зәңгәр, җете кызыл вә кызыл төстәге йон, нәфис җитен, кәҗә мамыгы,

⁵кызыл төскә буялган сарык тәкәсе тиреләре, диңгез филе тиреләре, сәрви агачы,

⁶яктырткыч өчен зәйтүн мае, изгеләндерү мае һәм көйрәтү мае өчен хуш исле матдәләр,

⁷эфодка һәм рухани күкрәкчәсенә беркетү өчен, ахак вә башка кыйммәтле ташлар.

⁸Кешеләр Минем өчен Изге чатыр корсыннар, һәм Мин алар арасында яши алачакмын.

⁹Чатыр һәм андагы бар нәрсәне Мин сиңа күрсәтәчәк үрнәк буенча эшлә.

¹⁰Кешеләр сәрви агачыннан Аллаһы сандыгы ясасыннар. Сандыкның буе ике терсәк [25] ярым, иңе һәм биеклеге терсәк ярым булсын.

¹¹Сандыкның эчен һәм тышын саф алтын белән каплап, кырыйларын да алтынлап бизә.

¹²Дүрт алтын боҗра коеп, аларны, һәр ягына икешәр итеп, сандыкның дүрт аягына беркет.

¹³Шуннан соң сәрви агачыннан колгалар ясап, алтын белән йөгерт.

¹⁴Сандыкны күчереп йөртү өчен, әлеге колгаларны аның ян-якларындагы боҗраларга кидер.

¹⁵Бу колгалар һәрвакыт сандыкның боҗралары эчендә булырга тиеш, аларны аннан чыгарма.

¹⁶Мин сиңа боерыклар язылган таш такталарны бирермен. Аларны шушы сандыкка сал.

¹⁷Сандыкның капкачын саф алтыннан эшлә. Аның буе ике терсәк ярым, иңе терсәк ярым булсын.

¹⁸Алтынны чүкеп, ике керубим сурәтен капкачның ике очына яса:

¹⁹берсен — бер очына, икенчесен — икенче очына беркетеп куй; алар икесе дә капкач белән тоташ итеп эшләнсен.

²⁰Керубимнәрнең канатлары, күккә җәелеп, сандык капкачын каплап торсыннар. Алар бер-берсенә кара-каршы торып, йөзләрен сандык капкачына төбәсеннәр.

²¹Мин сиңа боерыклар язылган таш такталарны бирермен; аларны сандыкка сал да капкачын яп.

²²Шунда — Боерыклар сандыгының капкачы өстендә, ике керубим арасында — синең белән очрашып, Исраил халкына Үземнең әмерләремне бирә торган булырмын.

²³Сәрви агачыннан буе ике терсәк, иңе бер терсәк һәм биеклеге терсәк ярым булган өстәл яса.

²⁴Аны саф алтын белән каплап, кырыйларын алтын белән каймалап ал.

²⁵Өстәлгә бер уч киңлегендәге [26] кыса ясап, кысаның кырыйларын да алтын белән каймалап ал.

²⁶Соңыннан дүрт алтын боҗра ясап, аларны өстәлнең дүрт почмагындагы дүрт аякка беркет.

²⁷Боҗраларны кыса янына урнаштыр; бу боҗраларга, өстәлне күчереп йөртү өчен, колгалар кидерелсен.

²⁸Колгаларны сәрви агачыннан ясап, алтын белән йөгерт. Бу колгалар өстәлне күчереп йөртү өчен кирәк.

²⁹Өстәлгә куя торган тәлинкәләрне, җамаякларны, шәраб бүләкләре өчен чүлмәкләрне һәм касәләрне саф алтыннан яса.

³⁰Минем алга — өстәл өстенә — һәрвакыт изге икмәк куй.

³¹Шәмдәлне саф алтыннан чүкеп яса. Аның нигезен, сабагын, касәләрен, бөреләрен һәм таҗ яфракчыгын бербөтен итеп тоташтыр.

³²Шәмдәлдәге алты ботакның өчесе бер якта, өчесе икенче якта булсын.

³³Касә исә бөре һәм таҗ яфракчыгы булган бадәм чәчәгенә охшап, һәр ботакта өч касә булсын — шәмдәл белән тоташкан алты ботак менә шул рәвештә ясалсын.

³⁴Шәмдәлдә бөре һәм таҗ яфракчыгы булган бадәм чәчәгенә охшаш тагын дүрт касә яса.

³⁵Шәмдәлдәге алты ботак өч пар булсын, ә һәр ботак пары астында берәр бөре ясалсын.

³⁶Шәмдәл, бөреләр һәм ботаклар белән бербөтен итеп, тулысынча саф алтыннан чүкелсен.

³⁷Шуннан соң, шәмдәл алдындагы урынны яктыртып тору өчен, бу шәмдәлгә җиде яктырткыч эшлә.

³⁸Филтә кыскычы һәм улаклары саф алтыннан булсын.

³⁹Шәмдәлне һәм аның өчен кирәкле барлык әйберләрне бер талант [27] саф алтыннан яса.

⁴⁰Кара аны, аларны тауда күрсәтелгән үрнәк буенча эшлә.