Read Изге Язма, 2015 Чыгыш 26 Bible Online

Чыгыш 26 - Изге Язма, 2015 bible

Чыгыш 26

¹Чатыр өчен ун пәрдә тегелсен, пәрдәләр исә нәфис җитеннән һәм зәңгәр, җете кызыл вә кызыл төстәге йоннан тукылып, аларга керубим сурәтләре чигелсен.

²Пәрдәләрнең барысын да бер зурлыкта эшлә: буе егерме сигез, иңе дүрт терсәк булсын.

³Пәрдәләрне бер-берсенә тоташтырып, биш пәрдәне аерым һәм калган бишесен тагын аерым тек.

⁴Зәңгәр тукымадан ясалган элмәкләрне беренче биш пәрдәнең кырыена тегеп куй, шулай ук икенче биш пәрдәнең кырыена тек:

⁵беренче биш пәрдәнең кырыенда — илле элмәк һәм икенче биш пәрдәнең кырыенда шулай ук илле элмәк. Беренче пәрдәдәге һәр элмәк икенче пәрдәдәге һәр элмәккә пар килсен.

⁶Аннары барлык пәрдәләрне бергә беркетү, ягъни чатырны бербөтен итеп җыю өчен, алтыннан илле каптырма яса.

⁷Чатырны каплау өчен, янә бер каплавыч яса. Бу каплавыч өчен кәҗә мамыгыннан унбер пәрдә әзерлә.

⁸Барлык пәрдәләр бер үлчәмдә — буе утыз һәм иңе дүрт терсәк булсын.

⁹Башта биш пәрдәне, аннары тагын алтыны бер-берсенә тоташтыр. Чатырның алгы ягындагы алтынчы пәрдәне ике кат итеп бөклә.

¹⁰Тоташтырып тегелгән биш пәрдәнең һәм тоташтырып тегелгән алты пәрдәнең кырыйларына иллешәр элмәк яса.

¹¹Аннары барлык пәрдәләрне бергә беркетү, ягъни каплавычны бербөтен итеп тоташтыру өчен, бакырдан илле каптырма эшлә һәм аларны элмәкләргә кидер.

¹²Ә пәрдәләрнең өстәмә өлеше — каплавычның артып калган бер яртысы — чатырның арт ягына асылынып төшсен.

¹³Пәрдәләрнең һәр ике ягыннан да бер терсәккә чыгып калган кисәге исә чатырның ян-якларын капласын.

¹⁴Чатыр өчен янә ике каплавыч эшлә: аларның берсе кызыл төскә буялган сарык тәкәсе тиреләреннән, ә икенчесе — беренчесе өстендәгесе — диңгез филе тиреләреннән булсын.

¹⁵Чатыр өчен сәрви агачыннан рамнар яса.

¹⁶Һәр рамның биеклеге ун терсәк һәм киңлеге терсәк ярым булырга тиеш.

¹⁷Рамнарны бер-берсенә беркетер өчен, һәр рамның ике чыгынтысы булып, чатырның барча рамнары шулай эшләнсен.

¹⁸Чатырның көньякка караган ягы өчен егерме рам

¹⁹һәм көмештән кырык нигез яса — һәр рам астында, чыгынтыларга туры китереп, икешәр нигез булсын.

²⁰Чатырның икенче, ягъни төньякка караган ягы өчен дә егерме рам

²¹һәм һәрбер рам өчен икешәр итеп көмештән кырык нигез яса.

²²Чатырның арткы, ягъни көнбатышка караган ягы өчен тагын алты рам,

²³ә чатырның арткы ягындагы почмаклар өчен ике рам яса.

²⁴Почмактагы рамнар аскы яктан тоташтырылып, өстән беренче боҗра янында беркетелсен; ике почмак та бертөрле ясалсын.

²⁵Шулай итеп, әлеге сигез рам өчен көмештән уналты нигез булыр — һәр рам астына икешәр нигез.

²⁶Борысларны сәрви агачыннан яса: чатырның бер ягындагы рамнар өчен биш борыс,

²⁷икенче ягындагылары өчен янә биш борыс һәм арткы яктагы, ягъни көнбатыштагы рамнар өчен тагын биш борыс булсын.

²⁸Рамнар уртасындагы борыс чатырның бер очыннан икенче очына кадәр сузылсын.

²⁹Рамнарны алтын белән капла һәм аларга, борысларны утырту өчен, алтын боҗралар беркет; бу борысларны да алтын белән капла.

³⁰Чатырны тауда күрсәтелгән үрнәк буенча төзе.

³¹Зәңгәр, җете кызыл вә кызыл төстәге йоннан һәм нәфис җитеннән махсус пәрдә тукы да аның өстенә керубим сурәтләре чик.

³²Сәрви агачыннан дүрт багана яса һәм аларны алтын белән капла. Дүрт баганага алтыннан эшләнгән ыргаклар беркет, баганалар астына дүрт көмеш нигез куй һәм алтын ыргакларга пәрдәне эл.

³³Пәрдәне чатыр түбәсендәге каптырмалар астына урнаштыр һәм пәрдә артына Боерыклар сандыгын куй. Бу пәрдә Изге бүлмәне Иң изге бүлмәдән аерып торсын.

³⁴Иң изге бүлмәдәге Боерыклар сандыгы өстенә капкач куй.

³⁵Пәрдәнең икенче ягына, изге икмәкне кую өчен, өстәл урнаштыр: өстәл чатырның төньягында торсын. Чатырның көньягына, өстәл каршысына, шәмдәл куй.

³⁶Соңыннан, чатырга керү юлын каплау өчен, пәрдә эшлә; ул зәңгәр, җете кызыл вә кызыл төстәге йоннан һәм нәфис җитеннән тукылып, аның өстенә бизәкләр чигелсен.

³⁷Пәрдәне элү өчен, сәрви агачыннан биш багана һәм алтын ыргаклар ясап, аларны да алтын белән капла. Баганалар өчен биш бакыр нигез кой.