Read Изге Язма, 2015 Чыгыш 37 Bible Online

Чыгыш 37 - Изге Язма, 2015 bible

Чыгыш 37

¹Бесалел сәрви агачыннан Аллаһы сандыгы ясады. Сандыкның буе ике терсәк ярым, иңе һәм биеклеге терсәк ярым булды.

²Ул аның эчен һәм тышын саф алтын белән каплап, кырыйларын да алтынлап бизәде.

³Дүрт алтын боҗра коеп, аларны, һәр ягына икешәр итеп, сандыкның дүрт аягына беркетте.

⁴Шуннан соң ул, сәрви агачыннан колгалар ясап, алтын белән йөгертте.

⁵Сандыкны күчереп йөртү өчен, әлеге колгаларны аның ян-якларындагы боҗраларга кидерде.

⁶Бесалел сандыкның капкачын саф алтыннан эшләде. Аның буе ике терсәк ярым, иңе терсәк ярым булды.

⁷Аннары, алтынны чүкеп, ике керубим сурәтен капкачның ике очына ясады:

⁸берсен — бер очына, икенчесен — икенче очына беркетте; алар икесе дә капкач белән тоташ итеп эшләнде.

⁹Керубимнәрнең канатлары, күккә җәелеп, сандык капкачын каплап тордылар. Алар, бер-берсенә кара-каршы торып, йөзләрен сандык капкачына төбәделәр.

¹⁰Бесалел сәрви агачыннан буе ике терсәк, иңе бер терсәк һәм биеклеге терсәк ярым булган өстәл ясады.

¹¹Ул, аны саф алтын белән каплап, кырыйларын алтын белән каймалап алды;

¹²өстәлгә бер уч киңлегендәге кыса ясап, кысаның кырыйларын да алтын белән каймалап алды.

¹³Соңыннан дүрт алтын боҗра коеп, аларны өстәлнең дүрт почмагындагы дүрт аякка беркетте.

¹⁴Боҗраларны ул кыса янына урнаштырды; бу боҗраларга, өстәлне күчереп йөртү өчен, колгалар кидерде.

¹⁵Колгаларны, сәрви агачыннан ясап, алтын белән йөгертте. Бу колгалар өстәлне күчереп йөртү өчен кирәк иде.

¹⁶Бесалел өстәлгә куя торган савыт-сабаны — тәлинкәләрне, җамаякларны, шәраб бүләкләре өчен касәләрне һәм чүлмәкләрне саф алтыннан ясады.

¹⁷Бесалел шәмдәлне саф алтыннан чүкеп ясады. Ул аның нигезен, сабагын, касәләрен, бөреләрен һәм таҗ яфракчыгын бербөтен итеп ясады.

¹⁸Шәмдәлдәге алты ботакның өчесе — бер якта, өчесе икенче якта булды.

¹⁹Касә үзе бөре һәм таҗ яфракчыгы булган бадәм чәчәгенә охшап, һәр ботакта өч касә булды — шәмдәл белән тоташкан алты ботак менә шул рәвештә ясалды.

²⁰Бесалел шәмдәлдә бөре һәм таҗ яфракчыгы булган бадәм чәчәгенә охшаш тагын дүрт касә ясады.

²¹Шәмдәлдәге алты ботак өч пар булды, ә һәр ботак пары астында берәр бөре ясалды.

²²Шәмдәл, бөреләр һәм ботаклар белән бербөтен итеп, тулысынча саф алтыннан чүкелде.

²³Бесалел шәмдәлнең җиде яктырткычын, филтә кыскычын һәм улакларын саф алтыннан ясады.

²⁴Ул шәмдәлне һәм аның өчен кирәкле барлык әйберләрне бер талант саф алтыннан ясады.

²⁵Бесалел сәрви агачыннан хуш исле сумала-майлар көйрәтү мәзбәхен ясады. Бу мәзбәх тигезьяклы турыпочмак рәвешендә — буе һәм иңе берәр терсәк, биеклеге ике терсәк булды. Аның дүрт почмагына мөгезләр ясалып, алар мәзбәх белән бербөтен булдылар.

²⁶Бесалел, мәзбәхнең өстен, ян-якларын һәм мөгезләрен саф алтын белән каплап, кырыйларын да алтын белән бизәде.

²⁷Мәзбәхнең өске ягыннан бераз аскарак төшеп, кара-каршы ике ягына алтын боҗралар беркетте. Бу боҗраларга, мәзбәхне күчереп йөртү өчен, колгалар кидерелде.

²⁸Бесалел колгаларны, сәрви агачыннан ясап, алтын белән каплады.

²⁹Соңыннан Бесалел, хушбуй әзерләгәндәге кебек, изгеләндерү мае һәм хуш исле саф сумала-майлар ясады.