Read Изге Язма, 2015 Әюб 13 Bible Online

Әюб 13 - Изге Язма, 2015 bible

Әюб 13

¹Боларның барысын мин үз күзләрем белән күрдем, үз колакларым белән ишеттем һәм аңладым.

²Сез белгәнне мин дә беләм — бер дә сездән ким түгелмен.

³Мин Кодрәт иясенә эндәшергә җөрьәт итәм, дәгъвам турында Аллаһы белән сөйләшергә телим!

⁴Ә сез ялганыгыз белән хакыйкатьне пычратасыз, сез барыгыз да булдыксыз табиблар.

⁵Сез, ниһаять, тынып калсагыз иде — бу сезнең бер акыллы эшегез булыр иде.

⁶Минем дәлилләремне тыңлагыз, үземне яклап, нәрсә дим, аңларга тырышып карагыз.

⁷Аллаһы хакына дип, ялган сөйләрсезме, ә сезнең ялганыгыз Аңа кирәкме соң?!

⁸Аңа бар күңелегездән ярарга тырышасызмы?! Аллаһының эшен яклап чыгарга телисезме?!

⁹Ул сезне сынап карарга теләсә, бик шәп булырмы?! Кешеләрне алдаган кебек, Аны да алдый алырсызмы?!

¹⁰Яшертен генә эш йөртеп, бер якны гына яклыйсыз икән, Ул, һичшиксез, сезне гаепләми калмас.

¹¹Аның дан-шөһрәте сезне куркытмыймы?! Дәһшәте өстегезгә төшмәсме?!

¹²Сезнең сүзләрегез көлгә охшаш, аклануларыгыз — уалучан балчыктан ясалган калкандыр.

¹³Туктагыз сөйләүдән, мин сөйлим; миңа ни булса, шул булыр.

¹⁴Тормышымны куркыныч астына куеп, үземне хәвеф-хәтәргә дучар итәм [12].

¹⁵Ул мине юк итәр — инде өметем өзелгән [13], үз юлымны мин Аның алдында барыбер яклаячакмын —

¹⁶минем өчен котылу шул булыр! Денсез бәндә Аңа якын килергә дә җөрьәт итмәячәк бит!

¹⁷Тыңлагыз, дикъкать белән тыңлагыз сүзләремне, әйткәннәремне колак салып тыңлагыз!

¹⁸Менә мин сезгә үземнең дәгъвамны әзерләдем, беләмен ки, мин хаклымын.

¹⁹Берәр каршы төшәрлек кеше бармы миңа? Булса, мин тын калырмын һәм җан тәслим кылырмын.

²⁰И Аллам, Синнән бары ике нәрсәне ялварам һәм моннан ары Синнән яшеренмәм:

²¹кулларыңны миннән читкә ал Син, һәм дәһшәтең мине куркытмасын!

²²Шуннан соң чакыр мине, һәм мин җавабымны бирермен, яки сөйләргә рөхсәт ит миңа, ә Үзең җавабыңны әйт.

²³Ялгыш гамәлләрем, кылган гөнаһларым күпме икән? Күрсәт кимчелекләремне, гөнаһларымны.

²⁴Ни өчен Син йөзеңне миннән яшерәсең һәм мине Үзеңнең дошманың итеп күрәсең?

²⁵Коелган яфракны куркытмакчы, коры саламны куып йөртмәкчеме Син?

²⁶Син мине бик авыр нәрсәләрдә гаеплисең, яшьлек гөнаһларымны гаепкә саныйсың.

²⁷Аякларымны калыпка кыстырып, Син һәр юлымны күзәтеп торасың, һәр адымымны билгеләп барасың.

²⁸Ә кеше ул черек кебек, көя күбәләге тишкәләгән кием кебек таралып бетүчән.